22°C , Mostly cloudy | Kigali-Rwanda
Shaban Hussein Tchabalala (11) na Nahimana Shassir (10) bakomoka i Burundi bari mu bitezweho gufasha Rayon Sports kwitwara neza

Abarundi bakina mu Rwanda barasaba Rayon Sports kwitondera LLB

Yanditswe na BIZIMANA ERIC

Ku ya 07-02-2018 saa 07:38:05

Bamwe mu bakinnyi bakina mu Rwanda bakomoka i Burundi barasaba Rayon Sports kwitondera LLB  bazahura kuri uyu wa Gatandatu  tariki 10 Gashyantare 2018 mu mikino y’Afurika y’amakipe yabaye aya mbere iwayo ” Total CAF Champions league 2018”

Shaban Hussein Tchabalala (11) na Nahimana Shassir (10) bakomoka i Burundi bari mu bitezweho gufasha Rayon Sports kwitwara neza

Aba barimo myugariro David Nshimirimana, ukinira Mukura n’ikipe y’igihugu y’u Burundi wemeza ko iyi kipe ifite ba myugariro beza kandi bazagora ba rutahizamu ba Rayon Sports.

Yagize ati “Ni ikipe imeze neza kandi ifite abakinnyi bafite ubunararibonye. Ifite abakinnyi bakomeye. Hari abo twakinanye muri Vitalo, barimo Jules, Moussa Mossi barabizi cyane. Abafana ntibumve ko ari ikipe yoroshye, bo ubwabo bazabyibonera. Ni umukino uzaba ukomeye, kuko ifite abakinnyi bashaka kugera kure”.

Duhayindavyi Gael wigeze gukina muri LLB agaragaza ko iyi ari ikipe imaze igihe yitabira aya marushanwa ku buryo itangiye kugira ubunararibonye muri iyi mikino. Ati “LLB ni ikipe njye nakinnyemo, ni ikipe ifite amateka meza, mu mikino y’Afurika imenyereye iri rushanwa, cyane ko twigeze gukina tugera kure. Ni ikipe ifite abakinnyi bamenyereye amarushanwa”.

Duhayindavyi ukina nawe mu ikipe y’igihugu y’u Burundi  yagaragaje bamwe mu bakinnyi bayo bakomeye bakinana mu ikipe y’igihugu barimo Ndoriyobija Eric ukina inyuma, Harerimana Rachid Léon ukina inyuma ku ruhande rw’ibumoso, Harerimana Moussa Hafiz ukina hagati  na Moussa Mossi  usatira wanigaragaje muri CECAFA 2017.

Ati “Ba myugariro nzi neza ni abitwa Rachid n’uwitwa Eric bafite ubunararibonye kandi bakina mu ikipe y’igihugu, bashobora gufasha cyane ikipe mu mikino y’Afurika. N’ubwo maze igihe  mu Rwanda sinkurikire buri munsi uko ihagaze, ariko nshingiye ku bakinnyi babo dukinana mu ikipe y’igihugu bafite abakinnyi beza”.

Duhayindavyi wabaye umukinnyi mwiza wa shampiyona y’umwaka ushize wa 2016-2017  mu Burundi yanavuze ko LLB ari yo kipe igerageza kubaho nk’ikipe y’abanyamwuga ugereranyije n’andi makipe yo mu Burundi, ndetse ikaba imaze kugira abafana bijyanye n’umusaruro muri iyi myaka ya vuba.

Ati “LLB ifite abafana kuko nko mu myaka nk’ine iri ku rwego rwo hejuru ku buryo yishakiye abafana ba bandi babashyigikiye cyane. Usibye abafana, banafite umuterakunga. Niyo kipe iri ku murongo mu Burundi, igerageza gukora nk’abanyamwuga”.

LLB niyo iyoboye shampiyona y’u Burundi ku munsi wa  17 aho ifite amanota 41  ikaba irusha inota rimwe Le Messager de Ngozi n’amanota atatu Aigle Noir ya gatatu.

Ku ruhande rw’ikipe ya Rayon Sports, abakinnyi bakomeje imyitozo bitegura uyu mukino  gusa abakinnyi barimo  Mugume Yassin ukomoka muri Uganda na Christ Mbondi ukomoka muri Cameroun  baguzwe n’iyi kipe ntabwo bazakina uyu mukino kuko  bageze muri iyi kipe yaramaze kohereza urutonde rw’abakinnyi izifashisha.

 

 

 

TANGA IGITEKEREZO

Leave a Reply

Be the First to Comment!

avatar