18°C , Partly sunny | Kigali-Rwanda

Abarokotse Jenoside bafashijwe na RSSB barashima

Yanditswe na Amani Claude

Ku ya Apr 27, 2018 saa 9:52

Ibikorwa by’Ikigo cy’Ubwiteganyirize mu Rwanda (RSSB) bikomeje kurenga imbibi zijyanye n’inshingano z’umwihariko ku misanzu y’ubwiteganyirize, Pansiyo ndetse na mituweli, ku buryo abamaze gufashwa bishimira ko cyabahaye intangiriro y’ubuzima buganisha ku iterambere rirambye.

Gaturarwanda Thomas Umwe mu baturage bashimira RSSB ku kuba yaramusaniye inzu

Ikigo cy’Ubwiteganyirize mu Rwanda (RSSB) cyashyizweho  n’itegeko No 45/2010 ryo kuwa 14/12/2010, rigena inshingano, imiterere n’imikorere yacyo. Iri tegeko kandi ni ryo ryahuje icyahoze ari Isanduku y’Ubwiteganyirize bw’Abakozi mu  Rwanda (Caisse Sociale du Rwanda/CSR) n’Ikigo cy’Ubwishingizi bw’Indwara mu Rwanda (RAMA).

Iri tegeko ryahinduwe kandi ryuzuzwa n’Itegeko No 04/2015 ryo kuwa 11/03/2015 riha RSSB indi nshingano yo gucunga ishami ry’Ubwisungane mu kwivuza (Mutuelle de Santé).

Inshingano y’ingenzi ya RSSB ni ugutanga serivisi zijyanye n’ubwiteganyirize mu Rwanda, ariko ikora n’imirimo ifitiye abaturage akamaro harimo nk’imishinga ibyara inyungu, gufasha abatishoboye n’ibindi.

Abarokotse Jenoside yakorewe Abatsi muri Mata 1994 baherereye mu turere dutandukanye tw’Igihugu barashimira iki kigo cyabahinduriye ubuzima, kikabaha ubufasha bwabakuye mu bwigunge .

Mu bikorwa RSSB yakoreye abarokotse Jenoside yakorewe Abatutsi harimo kurihira kaminuza abana bavutse ku babyeyi bahoze ari abakozi ba Caisse Social bishwe muri Jenoside, gusana inzu z’abarokotse Jenoside, kubaha umuriro w’amashanyarazi, kubagabira inka n’ibindi.

Abarihiwe na RSSB yababereye nk’umubyeyi

Abana b’abahoze ari abakozi ba “Caisse Sociale du Rwanda” banyuzwe byimazeyo n’uburyo RSSB yabakuye mu bwigunge ikanabafasha kubona intangiriro y’ubuzima, ikemera gufata inshingano zifatwa n’umubyeyi.

Mugiraneza Emilien, ni umwe mu bana bane RSSB yiyemeje kurihira amafaranga y’ishuri, akaba yiga mu mwaka wa kane muri Kaminuza y’u Rwanda, Ishami ry’ikoranabuhanga (mu cyahoze ari KKST) “Electronics and Telecommunication”.

Mugiraneza Emilien, ni umwe mu bana bane RSSB yiyemeje kurihira amafaranga y’ishuri muri kaminuza

Mu kiganiro yagiranye n’Imvaho Nshya, Mugiraneza yasobanuye ubuzima bugoye we n’abavandimwe be babiri banyuzemo kuva ababyeyi babo bicwa muri Jenoside yakorewe Abatutsi.

Icyo gihe yari afite imyaka ibiri, mushiki we umukurikira afite umwaka umwe, naho mukuru wabo afite imyaka ine. Yasobanuye ko RSSB yamufashije guhera mu mwaka w’amashuri wa 2013/2014 akimara gucutswa na FARG yamurihiye mu mashuri yisumbuye akabona buruse ya Leta.

Ati: “Ndangije amashuri yisumbuye natsinze ku manota ari hejuru mbona buruse ya Leta. Icyo gihe baje kudusobanurira ko umuntu wese ufite buruse ya Leta FARG itazamurihira, ahubwo tuzasaba inguzanyo nk’abandi banyeshuri babonye buruse. Icyo gihe byasaga nk’aho bigiye guhita biba imbogamizi kuko nabonaga ntazabasha kuyishyura.”

RSSB yatoranyije abahungu babiri n’abakobwa babiri mu bacukijwe na FARG ibizeza ko izabarihira kugeza barangije ikiciro cya gatatu cya Kaminuza, ubu Mugiraneza akaba ari we usigaye ku ntebe y’ishuri kuko bagenzi be batatu bamaze kurangiza iki kiciro.

Kuba RSSB yariyemeje kumurihira ngo byamufashije kwiga neza adatekereza ku ngorane zo kwishyura amafaranga yari kuba yagurijwe na BRD nk’uko bikorwa ku banyeshuri babonye buruse za Leta.

Ikindi Mugiraneza yishimira ni uko abaye umwana wa kabiri mu muryango wabo urihiwe na RSSB kuko mukuru we yarangije, ubuyobozi bw’iki kigo bukaba budahwema no kubaba hafi mu buzima bwabo bwa buri munsi.

Akomeza agira ati “N’iyo tugize ikindi kibazo mu bijyanye n’ubuzima tubayeho, RSSB igerageza kutugira inama. Kandi no mu bihe byo kwibuka badufasha mu bikorwa byo kwibuka ababyeyi bacu mu cyubahiro bakaduhuza n’indi miryango yabuze ababo bakoreraga “Caisse Sociale du Rwanda”.

Aha ngo bahakura ubuhamya bubafasha gukomera kuko babona abo bahuje ubuzima babashije kwiyubaka,  bigatuma bahorana ikizere ko na bo imbere yabo ari heza.

Bugesera: RSSB yatumye basezerera agatadowa

Nyuma y’igihe kinini bakoresha agatadowa, abatuye mu Mudugudu wa Karambi uherereye mu Kagari ka Kayumba, Umurenge wa Nyamata, Akarere ka Bugesera, baravuga imyato  RSSB yahagobotse ikabagezaho amashanyarazi.

Dore bamwe mu baganiriye n’Imvaho Nshya:

Rwagasana Theoneste, umuturage: Mbere y’uko duhabwa amashanyarazi na RSSB twacanaga udutadowa, ariko ubu umwana wange  wavutse tumaze kuyabona ntiyakamenya. Kugira ngo dushyire umuriro muri telefoni byadusabaga kujya i Nyamata mu mugi, tukishyura amafaranga twanagenze ibirometero. Ikindi dufite radiyo, turacuranga tukumva amakuru y’aho Igihugu kigeze mu iterambere tudahangayikishijwe n’uko amabuye yashira. Inzu yose iba ibona ku buryo abanyeshuri basubiramo amasomo bize, n’abakora indi mirimo yo mu rugo nta kibazo bagira.

Rwagasana Theoneste

Kanamugire Moses, umwogoshi:  Uwavuga ibyiza by’iterambere RSSB yatugejejeho ntiyabirangiza. Amashanyarazi yaranzamuye kuva ageze hano muri Karambi. Nabashije kwiteza imbere nkora Salon (icyumba bogosheramo imisatsi) n’ibindi bitandukanye kuko kuva umuriro ugeze ahangaha ndumva impinduka zambayeho ari nyinshi. Hashize imyaka ibiri nogosha; tuvuge ku munsi iyo byagenze neza simbura amafaranga y’u Rwanda 2500.

Uwiragiye Jean Bosco, umucuruzi: Tutarabona amashanyarazi twari tubayeho mu bwigunge kubera ko umuntu n’iyo yacanaga buji urumuri rwabaga rukeya. Urabona nkange ndi umucuruzi, iyo ucuruje ucanye agatadowa urumuri ntabwo rukwira hose ngo mu nzu habone ariko ubungubu turacuruza tukageza saa tanu z’ijoro nta kibazo dufite.  Amashanyarazi yazanye impinduka zikomeye kuko byonyine buji na peteroli twakoreshaga byari byinshi ku buryo igiciro cy’amashanyarazi kiri hasi cyane ugereranyije n’ubundi buryo twakoreshaga bwo gucana. Amahirwe yo kunguka yariyongereye cyane kuko abacuruza ibinyobwa bazanye ibyuma bikonjesha ku buryo abakiriya babo batabura ibinyobwa bikonje.

Munyeshuri Alfred, umusuderi: Natangiye gusudira nkiva mu ishuri mu 2012. Ubu mfite inka niguriye, naguze  n’igare  n’imashini zange nkoresha; iyo nabonye akazi kenshi nange hari abandi mpamagara twiganye cyangwa na bo bazi gusudira nkabaha akazi, akaba ari nge ubahemba kuko mba napatanye.

Havugimana Eugene, Umuyobozi w’Umudugudu wa Karambi: Umudugudu wa Karambi ni umwe mu midugudu yatewe inkunga na RSSB; yaduteye inkunga y’amashanyarazi ingo zacu zabaga mu bwigunge ni kure y’Umujyi wa Nyamata. RSSB turayishimira ariko iyo abantu bari kumwe ntabwo bajya babura ibyo bakeneranaho; ikindi gihe nibona ubushobozi mu gihe cyose ikiri kumwe natwe tuzayishyikiriza ibyifuzo dufite turebe niba yagira icyo ibikoraho. Nibabishobora, mwabonye y’uko n’icy’amazi kiracyahari kandi natwe twiteguye kubunganira dushyiraho uruhare rwacu.

Ngirinshuti Viateur, umucuruzi w’ibinyobwa: Amashanyarazi yamfashije gukoresha firigo ku buryo no mu zuba ryaka babona ibinyobwa bikonje, kandi bafata icyo kunywa bareba televiziyo, nta nama zikomeye mu Rwanda ziducika n’imyiherero y’abayobozi yose tuba tuyireba imbonankubone.  Mu bucuruzi na bwo byanyongereye inyungu kuko abakiriya baranywa bakageza mu masaha ya nijoro ariko mbere bageraga saa moya batashye.

Ngirinshuti Viateur

Nyanza: RSSB yabakuye mu icuraburindi

Abarokotse Jenoside yakorewe Abatutsi batuye mu Mudugudu wa Mugali, Akagari ka Nyundo, Umurenge wa Muyira mu Karere ka Nyanza barashimira Ikigo cy’Ubwiteganyirize mu Rwanda (RSSB) cyabakuye mu icuraburindi ryatumye ubuzima buhinduka, bakaba batakiri mu bwigunge.

Aba baturage bavuga ko nyuma yo kubakirwa amacumbi n’Ikigega gishinzwe gushyigikira no gutera inkunga abarokotse Jenoside yakorewe Abatutsi batishoboye (FARG), babanje kubaho mu icuraburindi, bikaba byaratumaga bagorwa no gukora imirimo y’ijoro.

RSSB ibinyujije muri FARG yabakururiye umuriro w’amashanyarazi ugezwa ku nzu 52 zo muri uyu mudugudu, mu gihe bitari kubashobokera kuwikururira kubera ubushobozi bwabo buke.

Kabasinga Liberata, umwe mu baturage bo muri uyu mudugudu yagize ati: “Twarishimye cyane, impinduka nziza twarazibonye nyuma yo kubona umuriro. Mbere twari mu bwigunge abana bacu ntibanige neza, ariko nk’ubu mfite umwana wari umuswa mu ishuri ariko yaratsinze kubera ko yiga nijoro. Nange w’umupfakazi byaramfashije cyane, si mbona neza kubera ko bantemye mu mutwe mu gihe cya Jenoside, ariko ubu nkora uturimo twose ngatekera abana nijoro nta kibazo.”

Kabasinga Liberata, umwe mu baturage bo muri uyu mudugudu wishimira kuba yaracaniwe

Igenukwayo Maria na we yongeyeho ati: “Tutarabona umuriro twari mu icuraburindi. Urabyumva na we kuba usohoka ugasohokera ahatabona, nkange w’umukecuru hari ubwo nasohokaga mu ijoro ngakubita inkokora ku kibambasi nkagwa, none ubu ndakora ku rukuta ngasohoka, simbura umuriro muri terefoni, ncomeka akaradiyo nkamenya aho Igihugu kigeze.”

Uyu mukecuru arashimira cyane Nyakubawa Perezida wa Repubulika Paul Kagame, kuko imiyoborere myiza no kwita ku batishoboye n’abandi bababaye ari we bikomokaho.

Vumiliya Beatrice ahamya ko nk’umubyeyi ufite uruhinja amashanyarazi amufasha cyane, ati: “Iyo umwana arize cyangwa akituma, nshana itara nkamutunganya mbona. Mbere ho wacanaga umwambi ukaba watwika inzitiramubu cyangwa wawujugunya hasi ukaba wanakwitwikiraho inzu.”

Bampire Fortunée Umunyamabanga Nshingwabikorwa w’Akagari ka Nyundo, yashimiye RSSB n’abandi bafatanyabikorwa ba FARG badahwema gushyigikira abatishoboye barokotse Jenoside yakorewe Abatutsi.

Yagize ati: “Kuba abaturage bacu batishoboye barokotse Jenoside barahawe amashanyarazi, tubona ari inkunga ikomeye cyane kuko yabakuye mu bwigunge. Wasangaga bafite ibibazo bitandukanye, ariko byibuze umuriro watumye babasha gutarama nijoro, abana biga na nijoro, abafite ubushobozi baguze ibikoresho bikoresha umuriro nka televiziyo n’ibindi.”

Ahamya ko kubona amashanyarazi byabaruhuye gucana agatadowa, kuko ari ko gatwara  amafaranga ya buri gihe yo kugura ibibiriti na peteroli kandi nta bushobozi buhoraho bwo kubigura babona.t

Rubavu: Abo inzu zari zarasaziyeho basaniwe kijyambere

Abarokotse Jenoside yakorewe Abatutsi batishoboye batujwe mu mudugudu wa Kabari, Umurenge wa Kanzeze mu karere ka Rubavu barashimira RSSB yabakijije kunyagirirwa mu nzu zari zishaje zikeneye gusanwa.

Izi nzu zari amatafari ya Rukarakara ahujwe n’igitaka, kimwe n’ibikoni byayo. Kuba muri izi nzu byari bigoranye ku miryango yatujwemo na FARG kuko zubatswe mu gace gakonja cyane.

RSSB yahatanze umuganda isana inzu 58 zari zibabaje kurusha izindi zitwara akayabo ka miliyoni 160 z’amafaranga y’u Rwanda, nyuma yo kuzishyiramo  sima, kuzihomesha umucanga na sima, kuzisakara bundi bushya , kuzitera amarangi no gushyiraho inzugi z’ibyuma.

Mu gihe cyo kubaka, abenshi mu bagenerwabikorwa bahawe imirimo bahembwa miliyoni 40 z’amafaranga y’u Rwanda, babona ubushobozi bwo kuzitaha zifite ibikoresho byo mu nzu byuzuye.

Gaturarwanda Thomas: Nabaye hano muri iyi nzu  isa nabi none FARG yazanye abafatanyabikorwa bayo baradusanira. Narashimye cyane kuko noneho bayubatse bakagenda bayirangije, keretse ibikoni ni byo bataradusanira. Nta kintu nabavebaho, ubu ibi bintu bimeze neza nge n’umugore n’abana bacu ntitugihangayikishwa n’uko imvura yaza ikatunyagira cyangwa ikadusenyera.

Mukeshimana Ancilla: Iyi nzu yaranshimishije cyane iyo nari ndimo ntiyari imeze neza, ari amatafari itanahomye. Akazi nakozemo na ko gafite byinshi kangejejeho kuko narakoraga nkabona ibintunga n’abana bange. Naguzemo ibikoresho byo mu nzu birimo “rideaux”, intebe n’ibindi. Ndashimira Leta ko yatwibutse, twari mu nzu yari yaratuguyeho ariko uyu munsi turi mu mutekano ukomeye, dufite inzu nziza banaduhaye ibyiringiro ko bazadusanira n’igikoni.

Nyiramutuzo Olive: Ngewe nari narabungabunze inzu yange narashyizemo sima nyitera n’igishahuro ikintu bampaye ni amabati n’amarangi gusa ariko naranyuzwe, narishimye. Uyu ni umunani baduhaye, twagahawe n’ababyeyi batakiriho.

Nyiramutarutwa Peruth: Inzu yari ishaje kandi yari yubatse nabi, RSSB bageze aho baraza barayivugurura. Ubu hari itandukaniro kuko inzu yari igitaka, idafite sima itubatse neza ubu bashyizemo sima. Ubu twarishimye kuko badukoreye neza. Icyo nasaba ni uko baza bakanyubakira igikoni kuko ntikigaragara neza iyo ubona giteganye n’iyi nzu.

Ndundu Alvera: Baradusaniye, inzu twabagamo yari iteye ubwoba, nta nzugi zabagamo. Mbere umuhungu wange yabaga yaguze akenda keza akajya gushaka ahantu hari inzu nziza  akabitsa, umushyitsi yaza ngatinya kumwinjiza mu nzu kandi atari ngombwa. Abana bagiraga bagenzi babo b’abasore n’inkumi bifuza kubasura, ugasanga birabagora kuba babazana iwabo. Nayibagamo ari ukubura uko ngira, ubu twarashimye cyane kuko ubuzima bwarahindutse cyane.

Ndundu Alvera

Kagiraneza Xaver: Abo bagiraneza baradukoreye, mbere twaranyagirwaga kuko amabati y’inzu twabagamo yari amaze gusaza. Twari tubayeho nabi none ubu turashima ubuzima bwarahindutse, icyo dusigaje kubona ni amashanyarazi aduca hejuru kuko nta bushobozi dufite bwo kuyikururira, n’ibikoni biracyari nk’inzu twubakiwe mbere bikeneye kuvugururwa bigasa n’izindi.