17°C , Mostly cloudy | Kigali-Rwanda
Migambi Jean wagize igitekerezo cyo guhuriza hamwe abarimo abakoraga ubucuruzi bw'akajagari

Abarimo abakoraga ubucuruzi bw’akajagari bateguye igitaramo

Yanditswe na admin

Ku ya 22-11-2017 saa 10:01:01

Migambi Jean wafashe umwanzuro wo guhuza abacururizaga mu mihanda (Abazunguzayi), abakoraga akazi ko gukora isuku n’abandi babashije kwiga amashuri yisumbuye ndetse na kaminuza  ntibabone akazi bateguye igitaramo kizabera mu mujyi wa Kigali ku ya 25 Ugushyingo 2017.

Migambi Jean wagize igitekerezo cyo guhuriza hamwe abarimo abakoraga ubucuruzi bw’akajagari

Iki gitaramo Migambi yavuze ko kigamije guteza imbere ibikorerwa mu Rwanda ndetse na gahunda ya Nk’Uwikorera.

Yagize ati “Twishyize hamwe mu rwego rwo guhuza ingufu kugira ngo dukomeze guteza imbere igihugu cyacu”.

Muri ibyo birori, Migambi yavuze ko batumiyemo abayobozi banyuranye  b’inzego za Leta, abikorera ndetse n’abandi. Icyo gitaramo, Migambi yavuze ko kizagaragaramo imyenda ikorerwa mu Rwanda, ibinyobwa bikorerwa mu Rwanda   n’ibindi.

Igitekerezo yagize yavuze ko nk’umuntu wabashije kwiga agasoza kaminuza guteza imbere igihugu ari wo musanzu ukwiye yabonye akwiye guha igihugu.

Abo yahurije hamwe yavuze ko batangiye gukora imishinga inyuranye irimo korora inkoko, gukora amandazi ngo kandi bazakomeza gukora indi mishinga bongere n’umubare w’abanyamuryango kuko ubu ari 10.

Tuyisingize Pour Dieu wahoze akora ubucuruzi bw’akajagari uri muri iryo huriro yavuze ko igikorwa cyo kuba Migambi yarabahuje cyamufashije kuko yamweretse uburyo bwo kubonamo akazi none yarakabonye.

Avuga kandi ko abona n’imishinga batangiye irimo kubagirira akamaro gakomeye.

Abakoraga ubucuruzi bw’akajagari  bari muri iryo huriro Migambi yavuze ko ari   batatu, abakoraga akazi k’isuku ari  babiri, abarangije amashuri  yisumbuye na bo  ari  babiri naho  abarangije  kaminuza   ari  batatu.

Umuhanzi Hope Irakoze n’umunyarwenya  Arthur Nkusi bari mu bazataramira abantu muri icyo gitaramo.

NDAMYIROKOYE FRANÇOIS

TANGA IGITEKEREZO

Leave a Reply

Your email address will not be published. Required fields are marked *