21°C , Intermittent clouds | Kigali-Rwanda

Abanyuzwe n’ibyiza bya Mituweli bageze kure bishyura iya 2019/2020

Yanditswe na NTAWITONDA JEAN CLAUDE

Ku ya May 23, 2019 saa 7:07

Ubuyobozi bw’Ikigo cy’Ubwiteganyirize mu Rwanda (RSSB) buributsa abanyamuryango ba Mituweli gutangira kwishyura umusanzu w’ubwisungane mu kwivuza w’umwaka 2019/2020, bakaba banashimirwa ubwitabire bagaragaje muri uyu mwaka wa 2018/2019 uzarangirana n’ukwezi kwa Kamena 2019.

Ntigurirwa Deogratias Umuyobozi ushinzwe ubukangurambaga no kwandika abanyamuryango bashya mu ishami rya Mituweli muri RSSB, yakanguriye abanyamuryango basanzwe n’abashya gutangira kwishyura hakiri kare kugira ngo birinde ubukererwe.

Ntigurirwa Deogratias Umuyobozi ushinzwe ubukangurambaga no kwandika abanyamuryango bashya mu ishami rya Mituweli muri RSSB

Mu kiganiro yagiranye n’Imvaho Nshya ku wa Kabiri tariki 21 Gicurasi 2019, Ntigurirwa yatangaje ko ubu hari uburyo butandukanye bwo kwishyura Mituweli bworohereza buri wese, cyane cyane imiryango igizwe n’abantu benshi kwishyura neza kandi ku gihe.

Yagize ati: “Akenshi mu cyaro niba umuntu afite abana batanu cyangwa batandatu, kubona amafaranga 18,000 icyarimwe ari mu kiciro cya gatatu ntibyoroshye; twamugira inama yo gutangira kwishyura gahoro gahoro, iki ni cyo gihe kugira ngo atazagira ubukererwe.”

Kuri ubu, uburyo bwo kwishyura Mituweli mu mirenge SACCO bwongereweho ubwo kwishyura hakoreshejwe ikoranabuhanga rya terefoni, ku bakozi bahagarariye serivisi z’Irembo ku biro by’imirenge yose, n’abahagarariye MobiCash (agents) barenga 3,000 mu gihugu hose.

Ntigurirwa akomeza ahamya ko ubukangurambaga bukomeje gutanga umusaruro kuko muri uyu mwaka wa 2018/2019 abanyamuryango bavuye kuri miliyoni 8 n’ibihumbi 700 bishyuye ubwisungane mu kwivuza umwaka ushize, bakaba bamaze kurenga miliyoni 9.

Yakomeje agira ati: “Muri iyi minsi byagaragaye ko hari imibare y’abandi bantu bashya biyandikishije. Muri rusange ubukangurambaga bwakozwe bwatanze umusaruro ndetse kwishyura hifashishijwe ikoranabuhanga na byo byaradufashije.”

Hari abemeza ko bageze kure bishyura Mituweli mu byiciro

Bamwe mu banyamuryango ba Mituweli barishimira uburyo butandukanye bashyiriweho bwo kwishyura, kuko buborohereza bakishyura batarinze kujya gusinyisha ku kigo nderabuzima cyangwa kongeresha amakarita.

Uwurukundo Carine utuye mu Kagari ka Muhira, Umurenge wa Rugerero, mu Karere ka Rubavu, avuga ko amaze kwishyura igice kinini cy’umusanzu asabwa kwishyura mu mwaka wa 2019/2020.

Uwurukundo Carine avuga ko asigaje kwishyura mafaranga 1,000 mu mafaranga 9,000 basabwa mu muryango wabo

Yagize ati “Umwaka wa 2018/2019 uri hafi kurangira, amafaranga ya Mituweli y’umwaka utaha namaze kuyatanga haraburaho 1,000 ku yo tugomba kwishyura nge n’umugabo ndetse n’umwana umwe dufite. Ngiye gushaka ayo marafanga asigaye bitarenze uku kwezi,  aya mbere yo ntiyangoye kuko nayishyuye ku yo twateranyije mu kimina.”

Umurerwa Florence utuye mu Murenge wa Rugerero, Akarere ka Rubavu akaba afite umugabo n’abana batatu, na we yongeyeho ko kugira ubwisungane mu kwivuza bimufasha guhahira urugo atuje, bityo kwishyura kare yabigize intego.

Umurerwa Florence yemeza ko yiteguye kwishyura Mituweli y’umwaka utaha uku kwezi kutararangira

Yagize ati “Imyumvire kuri Mituweli aho ntuye yarahindutse, si nge gusa wiyemeje gutanga Mituweli hakiri kare kuko hari benshi bagiye barwara cyangwa bakabyarira kwa muganga bakabona ibyiza byo kwishyurira ku gihe. Ubu muri uku kwezi tugiye kuyashaka, kuzarangira tumaze kwishyura amafaranga yose.”

Uwaruvukiye Pascal utuye mu murenge wa Nyamirambo, Akarere ka Nyarugenge, na we ahamya ko kubera ibyiza bya Mituweli yiboneye yiteguye kwishyura hakiri kare. Ati “Ndi umubyeyi w’abana babiri, Mituweli yamfashije byinshi kuko byagabanyije ikiguzi twakoreshaga mu kwivuza. Kwishyura kare rero nabigize intego.”

Uwaruvukiye Pascal ukoresha ubwisungane mu kwivuza

Gumyusenge Chantal utuye mu murenge wa Gatenga, Akarere ka Kicukiro yongeyeho ati: “Gutinda kwishyura Mituweli bishobora kugira ingaruka zikomeye ku murwayi akaba yabura serivisi kuko yagize ubukererwe bukabije, akaba atahita yivuriza ku ikarita yahawe. Kutishyura burundu bwo ni ingorane zikomeye, kuko ubuvuzi bw’iki gihe burahenda.”

Gumyusenge Chantal abona uburyo bwo kwishyura Mituweli hakoreshejwe terefoni bwihutisha imikorere

Ikindi abaturage bishimira ni uko nta bagitonda umurongo ku bigo nderabuzima bategereje guteza kashi, cyangwa ngo kwivuza bibe bisaba gusa kuba ufite ikarita ya Mituweli.

Ikoranabuhanga ryafashije guhuza imyirondoro yo ku ndangamuntu n’imyirondoro y’abagenerwabikorwa ba Mituweli ku kigero cya 100%, ku buryo ugiye kwivuza asabwa nomero y’indangamuntu y’uhagarariye umuryango iryo koranabuhanga rigahita rigaragaza niba yarishyuye cyangwa atarishyura.

Ubuyobozi bwa RSSB kandi buramenyesha abanyamuryango ba Mituweli n’Abanyarwanda bose muri rusange, ko umunyamuryango wese utarageza igihe cyo gufata indangamuntu akaba atarahabwa ikarita ya Mituweli cyangwa se yarataye iyo yahawe, azajya ahabwa indi karita agaragaje ikemezo kiriho ifoto ye gitangwa n’Akagari atuyerno.

Nanone kandi umuryango wamaze kwishyura umusanzu wose wa Mituweli nyuma hakagira undi muntu mushya uwo muryango wunguka, nyuma yo kumwongeresha mu makuru y’ubudehe, uyu muryango urasabwa kubanza kugana agashami ka Mituweli kamwegereye kugira ngo uyu wongewemo yongerwe  mu bagomba kwishyurirwa Mituweli.

Abafite ikibazo ku byiciro by’ubudehe bahumurijwe

Ubuyobozi bwa RSSB burasaba abanyamuryango ba Mituweli ko nta cyahindutse mu kwishyura umusanzu hagendewe ku byiciro by’ubudehe, bumara impungenge abakeka ko byaba biri hafi yo guhindurwa bityo bikazabangamira umusanzu batanze.

Ntigurirwa Deogratias ashimangira ko nubwo Mituweli ari imwe muri serivisi za Leta zitangwa hakurikijwe ibyiciro by’ubudehe, igihe bizaba byahinduwe nk’uko biherutse gutangazwa na Minisiteri y’Ubutegetsi bw’Igihugu bitazabangamira umusanzu w’uwamaze kuwutanga.

Yagize ati “Umuturage wese uzaba yarishyuye akurikije ikiciro arimo nta kibazo azagira mu kwivuza umwaka utaha. Uzaba agomba kwishyura mu kiciro cy’ubudehe kandi akemera, ntabwo bizamubuza kwivuza. Abaturage ntibategereze ibyiciro bishya mu kwishyura Mituweli, igihe cyo kuvugurura kizagera ariko n’igihe cyo kwishyura kirageze.”

Yakomeje avuga ko itegeko rishya riteganya ko kuri ubu umunyamuryango uzishyura ubwisungane mbere yo gutangira umwaka, uwishyuye hagati y’ukwezi kwa Nyakanga n’ukwa  Nzeri bazaba bafite amahirwe yo kuba bakenera serivisi z’ubuvuzi bagahita bivuza.

Ati: “Uwishyuye hagati y’ukwa karindwi (Nyakanga) n’ukwa kenda (Nzeri) azajya ahita yivuza, ariko uzishyura mu kwa cumi (Ukwakira) azajya ategereza ukwezi mbere yo guhabwa serivisi z’ubuvuzi.”

Mu korohereza abanyamuryango bose, kwivuza bisaba kuba ufite indangamuntu yawe cyangwa ikarita ya Mituweli, ndetse na nomero y’umukuru w’umuryango.