22°C , Partly cloudy | Kigali-Rwanda
Abanyenganda basabwa gukora byinshi kandi byiza ngo bashobore gupiganwa

Abanyenganda bagaragarijwe amahirwe bafite mu kagana isoko ry’Afurika

Yanditswe na MUGISHA BENIGNE

Ku ya 10-07-2018 saa 06:34:13

Minisitiri w’Ubucuruzi n’Inganda Munyeshyaka Vincent yagaragarije abafite inganda amahirwe bafite yo kugana isoko ry’Afurika mu gihe bakora ibicuruzwa byiza kandi byinshi.

Abanyenganda basabwa gukora byinshi kandi byiza ngo bashobore gupiganwa

Ibi Munyeshyaka yabivugiye mu nama nyunguranabitekerezo yahuje Minisiteri y’Ubucuruzi n’Inganda n’abohereza ibicuruzwa mu mahanga, aho anashishikariza abanyenganda gukora ibintu byiza bishobora gupiganwa n’iby’ahandi ku isoko ry’Afurika.

Minisitiri w’Ubucuruzi asobanurira abohereza ibicuruzwa mu mahanga uburyo isoko ry’Afurika ari rigari, ariko anakomoza no ku masoko mato  y’ibihugu  bihuriye ku miryango y’ubukungu.

Ati “Isoko ry’Afurika naryo rizafasha mu kohereza ibicuruzwa by’u Rwanda mu mahanga, ahubwo ndasaba Abanyenganda gukora ibicuruzwa byiza bizabasha gupiganirwa n’ibindi ku masoko”.

Munyeshyaka kandi yagize icyo avuga ku isoko rya COMESA ryateye imbere kuko ubucuruzi bwaryo  bwazamutseho kugera kuri 78%. Avuga ko ayo yose ari amahirwe abacuruzi bo mu Rwanda bafite mu gihe baba bakeneye kohereza ibicuruzwa mu mahanga.

Ati “N’ubwo u Rwanda rudakora ku nyanja, haramutse habayeho ubwinyagamburiro bungana butyo ku bihugu by’Afrika rwatera imbere”. Yanavuze ku bucuruzi hagati y’ibihugu bigize umuryango w’Afurika y’Iburasirazuba, bugeze kuri 86% hagati y’ibihugu biwugize.

Munyeshyaka kandi yagaragaje  ko amasezerano y’isoko ry’Afurika natangira gushyirwa mu bikorwa azazamura igipimo cy’ubucuruzi ibihugu by’Afurika bikora hagati yabyo kuko kikiri hasi.

Asanga Abanyafurika badacuruza hagati yabo mu buryo buhagije, kuko  13 % ari  byo byonyine  ibihugu by’Afurika  bicuruzanya hagati yabyo, ni mu gihe ibicururizwa hanze yayo ari 18%.

Yavuze ko amasezerano y’isoko ry’Afurika natangira gushyirwa mu bikorwa ubucuruzi hagati y’Afurika buzava kuri 13% bukagera kuri 25%. Aha, Munyeshyaka yagize ati “Imbogamizi ziramutse zivuyeho ibicuruzwa by’Abanyafurika  ku isoko ry’Afurika byazava kuri 13%  bikagera kuri  25% ndetse bikazanagera kuri 50%”.

Robert Opirah, Umuyobozi Mukuru muri Minisiteri y’Ubucuruzi n’Inganda, avuga ko ubucuruzi bwambukiranya imipaka buzatezwa imbere binyuze mu buryo bwo kubaka ibyambu bito bihuza u Rwanda n’ibihugu bituranye, bikazubakwa ku nkengero z’ikiyaga cya Kivu, Karongi, Rusizi, Rubavu na Nyamasheke. Akaba ari mu rwego rwo gukomeza guteza imbere ubucuruzi bw’ibikorerwa mu gihugu hakorwa ubucuruzi bwambukiranya imipaka.

Yongeraho ko hari na gahunda yo gukomeza kubaka imihanda inyuzwamo umusaruro ucuruzwa hagati y’uturere mu gihugu imbere, kubaka imihanda ihuza u Rwanda n’ibindi bihugu harimo na gari ya Moshi.

TANGA IGITEKEREZO

Leave a Reply

Be the First to Comment!

avatar