22°C , Partly cloudy | Kigali-Rwanda
Mighty Popo

Abanyempano mu muziki bongeye guhabwa amahirwe

Yanditswe na Ndamyirokoye François

Ku ya 08-01-2019 saa 05:39:17

Ishuri rya muzika ryahoze ku Nyundo ubu rikaba ryarimuriwe i Muhanga ryongeye gutegura amarushanwa y’abanyempano mu muziki abazatsinda bakazajya kwigayo.

Soma: Abize umuziki mu ishuri rifashwa na WDA baravuga icyo ryabamariye

Umuyobozi w’iri shuri uzwi nka Mighty Popo ubusanzwe witwa Murigande Jacques, yatangaje ko uyu mwaka bazafata 50 cyangwa abarenga.

Avuga ko kandi impamvu ari wo mubare bazafata ujyanye n’uko ari bo ubu bashobora kwitaho ngo kandi bishimira ko uko imyaka isimburana umubare w’abanyeshuri bafata ugenda uzamuka.

Aya marushanwa azabera mu bice bitandukanye by’igihugu ku matariki anyuranye.

Mu Ntara y’Uburengerazuba mu Mujyi wa Gisenyi iri rushanwa rizaba ku ya 8 Mutarama 2019 ribere muri Centre Culturel ya Gisenyi, mu Majyaruguru ribere i Musanze muri Musanze Polytechnique ribe ku ya 9 Mutarama 2019 naho mu Majyepfo rizaba ku ya 10 Mutarama 2019 ribere muri IPRC y’Amajyepfo.

Mu mujyi wa Kigali irushanwa rizaba iminsi ibiri ku ya 11 no ku ya 12 Mutarama 2019 ribere kuri IPRC Kicukiro naho mu Ntara y’Uburasirazuba irushanwa rizaba ku ya 13 Mutarama 2019 ribere muri IPRC yo muri iyo ntara.

Popo avuga ko buri hantu bazajya bakorera irushanwa bazajya bahava bazi abatsinze hatazagomba ko abo mu ntara bose n’ab’i Kigali bazaba batsinze bazahuzwa kugira ngo bongere guhatana.

Abemerewe kurushanwa hatangajwe ko ari uguhera ku barangije ikiciro rusange cy’amashuri yisumbuye (9 Years Basic Education)’. Kwiyandikisha bikaba bikorerwa kuri IPRC ziri mu Ntara, cyangwa se uhatana akiyandikishiriza ahazabera amarushanwa.

Ku rundi ruhande Mighty Popo avuga ko yishimira ko ubu mu Rwanda umuntu ashobora kwiga umuziki ukabasha kumutunga akaba yanatera imbere imbere.

Ati “Nishimira ko ubu umuntu ashobora kwiga umuziki ukamutunga akanatera imbere”.

Bamwe mu bahanzi bazwi muri muzika nyarwanda bize muri iri shuri harimo Yverry, Igor Mabano n’itsinda rizwi cyane nka Sebeya Band.

Mighty Popo

 

TANGA IGITEKEREZO

Leave a Reply

Your email address will not be published. Required fields are marked *