18°C , Mostly cloudy with thunderstorms | Kigali-Rwanda

Abanyarwandakazi bashyigikiwe na Leta, babibyaze umusaruro-Nyirasafari

Yanditswe na NIYONSENGA SCHADRACK

Ku ya 09-03-2018 saa 09:11:49

Minisitiri w’Uburinganire n’Iterambere ry’Umuryango Nyirasafari Esperance, yishimiye urwego rw’iterambere abagore b’abanyarwandakazi bamaze kugeraho, abasaba gukomeza gukorana umurava, babyaza umusaruro amahirwe yo kugira Leta ibashyigikiye.

Minisitiri Nyirasafari Esperance (hagati wambaye umukenyero)iburyo ni Minisitiri Rwamukwaya Olivier, ubanza ibumoso ni Guverineri Mureshyankwano M. Rose berekwa ibikorwa by’iterambere by’abagore (Foto N. Schadrack)

Ni ubutumwa yatanze ejo hashize ku wa 08 Werurwe 2018, mu muhango wo kwizihiza umunsi mpuzamahanga w’umugore, wizihirijwe mu murenge wa Shyogwe mu karere ka Muhanga, ku nsanganyamatsiko igira iti “Munyarwandakazi, komeza umurava mu iterambere twubake u Rwanda twifuza.”

Minisitiri Nyirasafari, yavuze ko umugore w’umunyarwandakazi ageze ahashimishije, ariko hagikenewe gukorana umurava kuko urugendo rukiri rurerure. Yagize ati “Umugore w’umunyarwandakazi afite aho amaze kuva n’aho ageze, turamusaba gukomeza umurava kuko amaze kugera kuri byinshi. Leta y’u Rwanda yakoze byinshi ishyiraho ingamba n’amategeko anyuranye bimufasha kugira ngo atere imbere.

Turamusaba gukomeza umurava, tugafatana urunana, tukishyira hamwe, tukungurana ubwenge kuko ubwenge burarahurwa, ayo mashuri ari hirya no hino y’imyuga tukayajyamo, tukitabira amakoperative, abatazi gusoma no kwandika tukabafasha.”

Yakomeje agira ati “Izo gahunda kimwe n’izindi zigamije kubazamura zose zirahari, icyo tubasaba nimukomeze mukore, muteze imbere igihugu cyanyu kandi murabizi Leta y’u Rwanda irabashyigikiye.”

Agaruka ku bijyanye n’iterambere ry’uburezi ku bagore n’abakobwa, Umunyamabanga wa Leta muri Minisiteri y’Uburezi ushinzwe amashuri y’imyuga n’ubumenyingiro, Rwamukwaya Olivier, yavuze ko kugeza ubu abakobwa bitabira amasomo y’ubumenyingiro mu Rwanda ari 45%, aboneraho gusaba abagore n’abakobwa kurushaho kwitabira bene ubwo burezi.

Muri rusange abagore bo mu Rwanda bashimiwe intambwe bamaze kugeraho, ariko banasabwa kurushaho gufasha Guverinoma y’u Rwanda mu guhangana n’ibibazo by’amakimbirane mu miryango, isuku n’uburere buboneye mu bana b’u Rwanda, ndetse no kurwanya ikibazo k’imirire mibi.

Bamwe mu bagore bo mu karere ka Muhanga bitabiriye uyu munsi, bavuga ko bishimira kuba Leta y’u Rwanda yarabasubije agaciro ku buryo ubu batagihezwa mu iterambere.

Umubyeyi witwa Nyiraneza Evelyne wavutse mu 1962, yagize ati “Ku munsi nk’uyu numva ko mba ngomba nange kwishimira agaciro twahawe na Perezida wacu ndetse nkanatekereza ku iterambere ry’umuryango wange. Kera twari tuzi ko umugore ari uwo kurera abana gusa ariko ubu twishimira ko natwe duhabwa uburenganzira mu gihugu.”

U Rwanda ni kimwe mu bihugu ku Isi bishimirwa kuba indashyikirwa mu guteza imbere abagore ndetse no kubaha uburenganzira busesuye n’uruhare mu gufata ibyemezo, aha hatangwa urugero ku kuba abagore bagera kuri 64% bari mu bagize Inteko Ishinga Amategeko, kandi n’Itegeko Nshinga rya Repubulika y’u Rwanda riteganya ko abagore bagomba kuba nibura bihariye 30% mu nzego zose za Leta.

Raporo yiswe ‘Global Gender Gap 2017’ yasohotse muri Gashyantare 2017 yakozwe na ‘World Economic Forum’ yashyize u Rwanda ku mwanya wa kane ku Isi mu kwita ku burenganzira bw’abagore, no ku mwanya wa mbere muri Afurika.

TANGA IGITEKEREZO

Leave a Reply

Be the First to Comment!

avatar