17°C , Partly cloudy | Kigali-Rwanda

Abanyarwanda n’inshuti zabo mu Burusiya basabwe guha icyubahiro Inkotanyi

Yanditswe na Kayitare Jean Paul

Ku ya 08-07-2019 saa 17:50:00
Amb Dr Mujawamariya Jeanne d'Arc (ubanza ibumoso), Umuyobozi mukuru ushinzwe umubano w’u Burusiya na Afurika, Amb. Andrey Kemarsky (Foto Ambasade)

Abanyarwanda baba mu Burusiya hamwe n’inshuti z’u Rwanda, bakoraniye kuri Ambasade y’u Rwanda muri icyo gihugu, mu birori byo kwizihiza isabukuru y’imyaka 25 u Rwanda rumaze rwibohoye.

Ibirori byabereye muri Ambassade y’u Rwanda i Moscow, byitabirwa n’Abanyarwanda batandukanye, abadipolomate bahagarariye ibihugu byabo mu Burusiya, biganjemo ab’ibihugu bya Afurika.

Ambasaderi w’u Rwanda mu Burusiya Dr. Mujawamariya Jeanne d’Arc, yagize ati: “Ndasaba buri wese guha icyubahiro Inkotanyi zahagaritse Jenoside yakorewe abatutsi, zikabohora igihugu cyari hafi kuzima mu mateka y’Isi ndetse bamwe bagatanga ikiguzi cy’ubuzima bwabo, none u Rwanda rukaba rugeze aho buri wese yishimira umuvuduko warwo ruriho”.

Yibukije iterambere u Rwanda rumaze kugeraho kubera amaboko, ubwitange no guhitamo neza kw’abana barwo nko gutera imbere mu bukungu, imiyoborere myiza, imibereho y’abaturage, mu butabera no mu kurinda igihugu icyagihungabanya aho cyaturuka hose.

Ati: “Twebwe Abanyarwanda duha agaciro gakomeye Kwibohora kw’igihugu cyacu, kuko gufite umusingi ukomeye w’amaraso n’ubuzima bw’abana b’u Rwanda bitanze batizigama, bakarubohora imiyoborere mibi, buri wese akaba afite aho yita iwabo”.

Akomeza avuga ko hashize imyaka 25 ikaba isize igihugu kigeze aho nta watekerezaga ko u Rwanda rwaba ruhageze nyuma ya Jenoside yakorewe abatutsi mu 1994. Akaba ari ho Amb. Dr. Mujawamariya ahera asaba Abanyarwanda n’inshuti zabo mu Burusiya guha icyubahiro Inkotanyi.

Ati: “Ni yo mpamvu mbasaba ko twese duha icyubahiro abo banyarwandakazi n’Abanyarwanda babohoye igihugu, ubu imiyoborere myiza yacyo ikaba yarabaye ubukombe haba mu gihugu, mu karere, muri Afurika yose ndetse no ku Isi yose”.

Yakomeje abwira abari aho ko u Rwanda rutazasubira inyuma, kandi ko iterambere rumaze kugeraho rurikesha kwishakamo ibisubizo no gushyira hamwe kw’abana barwo.

Yibukije urubyiruko rw’Abanyarwanda rwari aho, ijambo Perezida Kagame yavuze mu kiganiro n’abanyamakuru ku munsi wabanjirije ibirori bwo Kwibohora; ko bagomba kwirinda kumva barageze iyo bajya kubera ibyagezweho kandi byiza muri iyi myaka, ahubwo ko bagomba gukora ibiri mu bushobozi bwabo bwose batikoresheje, batagombye kubwirizwa icyo bakora kandi bagashora imbaraga n’ubwenge bwabo mu bikorwa birambye.

Umuyobozi mukuru ushinzwe umubano w’u Burusiya na Afurika, Amb. Andrey Kemarsky, yifurije ubuyobozi bw’u Rwanda, Abanyarwanda n’inshuti zabo isabukuru nziza yo kwibohora. Yagarutse ku bihe bibabaje u Rwanda rwanyuzemo, ariko ubu akaba ari igihugu ntangarugero mu miyoborere myiza n’ububanyi n’amahanga.

Yagize ati: “Umubano w’u Rwanda n’u Burusiya umaze gutera imbere ku buryo bushimishije haba mu rwego rw’uburezi, ubuvuzi, ishoramari, guhahirana n’ibindi byinshi byiza. Ibyo bigaragariza u Burusiya ko u Rwanda ari inshuti nyanshuti yo kwizerwa mu mikoranire”.

Amb. Andrey yijeje abari aho ko ibi bihugu bizakomeza gushyira hamwe mu nyungu z’abaturage b’ibihugu byombi.

Amb Dr Mujawamariya Jeanne d’Arc (ubanza ibumoso), Umuyobozi mukuru ushinzwe umubano w’u Burusiya na Afurika, Amb. Andrey Kemarsky (Foto Ambasade)

 

TANGA IGITEKEREZO

Leave a Reply

Your email address will not be published. Required fields are marked *