Abanyarwanda birukanwa Uganda bahohotewe banakoreshejwe uburetwa

Yanditswe na Sezibera Anselme

Ku ya 27-07-2019 saa 13:51:20
Nzabonimpa Jospeh, umunyarwanda w’imyaka 25 wirukanywe Uganda (Foto Sezibera)

Nzabonimpa Joseph w’imyaka 25 na Irakiza Fiston w’imyaka 20 ni bamwe mu banyarwanda bageze mu Rwanda bavuye Uganda bakomeje gushinja icyo gihugu n’inzego z’umutekano zacyo guhohotera Abanyarwanda, kubambura no kubakoresha imirimo y’uburetwa bakagira inama bagenzi kuterekeza muri icyo gihugu kugira ngo birinde ingaruka mbi zabageraho.

Nzabonimpa ukomoka mu Murenge wa Kanama mu Karere ka Rubavu, avuga ko yambutse umupaka w’u Rwanda yerekeza Uganda ku itariki ya 3 Mutarama 2019 aho yari asanzwe akora akazi ko gukora amasambusa ajyanwa ahakorera Polisi ya Kisolo yamburwa icyangombwa yari afite baragica.

Avuga ko yafungiwe kuri iyo sitasiyo ku itariki 4, hanyuma ku ya 6 ajyanwa mu nkiko kuburana ariko umwunganizi we mu mategeko akajya abura kuburana bigahagarara nyuma aho abonekeye nabwo urubanza ruzamo impaka zishingiye ku byangombwa bye polisi yaciye.

Gusa avuga ko yaje gusabwa gutaha mu Rwanda ariko nyuma yo gutanga amafaranga yo kugura urupapuro rw’inzira hanyuma tariki ya 23 Nyakanga 2019 akaba ari bwo bamufunguye nyuma y’amezi 5 afunzwe.

Nk’uko abisobanura avuga ko muri iyo gereza yasanzemo Abanyarwanda 25 batabayeho neza bakubitwa buri munsi bituma we yigira umusazi baramureka banamukuriraho gukubitwa.

Ati: “Hariya utigize umusazi uhora ku nkoni n’imirimo y’uburetwa irimo guhingishwa ni byo birimo kuba ku banyarwanda nahasanze muri gereza kuko banababuza kuganira. Usanga Abanyarwanda batanakubitwa n’abapolisi gusa ahubwo n’Abagande bafunganywe bashinzwemo imirimo nka Mudugudu, Gatikiro n’abandi bose babatoza gukubita Abanyarwanda.”

Nzabonimpa avuga ko kubera kuburana agatsinda byamuhesheje amahirwe yo koherezwa mu Rwanda, akaba asaba abajya muri Uganda kugenza make kuko ubuzima bwaho bugerwa ku mashyi by’umwihariko ku banyarwanda.

Irakiza Fiston ukomoka mu karere ka Nyabihu, we avuga ko yambutse Uganda ku wa 28 Ukwakira 2018 amazeyo iminsi 3 umukoresha we yacururizaga inzoga Kisolo amutumye ahura n’umukwabu.

Ati: “Bansabye ibyangombwa mbaha irangamuntu n’akajeto hanyuma banyerekeza kuri sitasiyo ya Polisi ya Kisolo. Nyuma y’iminsi mike mfashwe nitabye urukiko banzura ko ntemerewe kuba muri Uganda. Kuri polisi namazeyo iminsi 9 ariko nyuma nza kuburana kuko ibyangombwa byange bari babinyatse byose bituma bankatira igifungo gisaga amezi 8 mfungurwa ku ya 23 Nyakanga 2019.”

Mu buzima bwa gereza avuga ko yavanywe Kisolo ajyanwa Kasese ari naho yamaze igihe kinini ahingishwa ibigori hamwe n’Abanyarwanda 14 ahantu hanini cyane, bakarima, bagatera ibigori, bakabitonora, ibyo byose bakabikora bakubitwa ngo bihute.

Ati: “Umunyantege nke n’umuntu utarigeze ahinga na rimwe barahakubitikira cyane kuko imirimo yo guhinga inkoni iba ituri ku mubiri ngo tugire vuba vuba. Twatangiraga mu gitondo kare sa kumi n’imwe tukarangiza iz’umugoroba batubara tugahita twinjira muri gereza.”

Irakiza watahutse anarwaye wagaragazaga intege nke, avuga ko nyuma yo gufungurwa yabeshywe ko nta mavuta y’imodoka yo kubacyura ahari arazwa muri gereza indi minsi 3 ategereje, ariko na we asaba Abanyarwanda kuba bazinutswe iby’ingendo zerekeza muri icyo gihugu.

Nzabonimpa Jospeh, umunyarwanda w’imyaka 25 wirukanywe Uganda (Foto Sezibera)

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.