28°C , Sunny | Kigali-Rwanda

Abanyarwanda batuye mu mahanga bakwiye kuba intangarugero – Bishop Rucyahana

Yanditswe na Kayitare Jean Paul

Ku ya 02-09-2019 saa 19:02:07
Bishop Rucyahana John, Perezida wa Komisiyo y'Ubumwe n'Ubwiyunge, agaragaza ko abanyarwanda batuye mu mahanga bakwiye kuba intangarugero (Foto Ububiko)

Perezida wa Komisiyo y’Ubumwe n’Ubwiyunge (NURC), Bishop John Rucyahana, atangaza ko Abanyarwanda batuye mu mahanga bakwiye kuba intangarugero, bakarangwa n’umutima wo gukunda igihugu, bimakaza gahunda z’ubumwe n’ubwiyunge no kuzirikana ku isoko y’aho bavuka.

Bishop Rucyahana avuga ko niba abantu ari abakirisitu beza, bagomba kubana neza nk’abantu bafite intumbero (ikerekezo), bakaba intangarugero kuko na Kristu yaravuze ngo ‘bazamenya ko muri abange nimukundana’.

Yagize ati “Tugomba kubaho neza […] Abanyarwanda batuye muri Amerika bagomba kuba intangarugero mu mirimo bakora, niba ari abaganga, niba ari abarimu, niba ari abacuruzi icyo bakora cyose bagomba kugikora mu buryo bw’agaciro, bagomba kwiga kugira ngo niba ari Abanyarwanda bazima b’abakirisitu bizera Imana, banagire umutima wo gukunda igihugu cyabo.”

Akomeza avuga ati “Bagomba kumenya isoko yabo, aho bava, ni Abanyarwanda, u Rwanda icyo ari cyo, bazi ubunyarwanda icyo ari cyo, bazi inshingano zo kuba Umunyarwanda icyo ari cyo, nabwo kandi bakamenya agaciro k’icyo bari cyo.”

Ashimangira ko n’Abanyarwanda batuye mu mahanga bakwiye guhora batekereza uko bateza imbere iwabo, kugira ngo urwo ruhererekane no gusangira ubuzima nk’Abanyarwanda nabyo babihe agaciro.

Bishop Rucyahana avuga ko ubumwe n’ubwiyunge ari inshingano za buri munyarwanda wese kandi ko ubumwe n’ubwiyunge butazarangira.

Ati “Ubumwe bwacu ni ikintu kizahoraho iteka ryose kuko ubumwe bwacu ni isoko y’aho tuvoma imbaraga zituma twiteza imbere, ni ho tuvoma imbaraga zituma twirinda, tukarinda ibyo tugezeho n’ibyo dukora, tukarinda n’agaciro kacu, tukavoma imbaraga zituma tunamenya n’ikerekezo tujyamo kandi tukakijyamo nka bene cyo.”

Asobanura ko aho ubumwe n’ubwiyunge bugeze ari n’aho u Rwanda rugeze mu iterambere. Ati “Aho ubumwe n’ubwiyunge bugeze bwo buratanga ubuhamya kuko aho bugeze ni ho u Rwanda rugeze, iterambere ry’u Rwanda, umubano w’Abanyarwanda nubwo tugifite ibikomere tuvurana, nubwo tugifite iterambere ryo gukora, nubwo tugifite ibyo gutunganya ariko turimo turatera imbere biragaragara.”

Ku rundi ruhande, hari abanyarwanda batuye mu mahanga bataratera intambwe mu bumwe n’ubwiyunge ariko nanone hari n’abamaze kuyitera. Bishop Rucyahana, Perezida wa komisiyo y’ubumwe n’ubwiyunge, avuga ko impamvu ari uko gukomereka kw’abantu gukira atari iby’ako kanya.

Yagize ati “Gukira nta bwo ari iby’ako kanya kuko nta bwo abantu ubavurisha ijambo gusa, ubaha n’igihe cyo gukira kuko n’abarwayi barwaye indwara imwe ntibakirira igihe kimwe, n’ibingibi by’ibikomere abantu bapfushije abantu babo, bononewe imitungo. Abantu banakoze amahano na bo barakomereka kuko iyo wakoze ibyaha na byo ubwabyo biragukomeretsa, bigutesha agaciro ka muntu.”

Akomeza avuga ko abo bantu bakirwana n’ibyo bintu kandi ntibarabikira, akaba ari ho ahera avuga ko atari ngombwa ngo bakirire umunsi umwe ariko ngo ni ngombwa ko bose bakira kandi bagashobora kwihanganirana kugira ngo rwa rugendo rwo gukira, umwe ye kubwira undi ngo nagutanze ahubwo ngo uwatanze undi amufashe.

Bishop Rucyahana ahamya ko muri diyasipora hari intambwe nini irimo guterwa kandi ngo baragenda bakura, bivuze ko ngo muri diyasipora bizagenda bikura ariko urugendo ngo ruracyari rurerure.

Ati “Urugendo rusigaye kuvura ibikomere byo mu mutima n’imitekerereze nta bwo babibara mu mibare ariko ibyiringiro birahari kuko iyo uhamagaye abantu cyangwa ubwabo bagahamagarana bakaza ni byiza, natwe twatangiye kubahamagara ariko ubu bashyizeho ubuyobozi bwabo kandi barakora neza ku buryo twizeye ko gahunda z’ubumwe n’ubwiyunge mu banyarwanda batuye mu mahanga zizashinga imizi kurusha uko bimeze ubu.”

Bishop Rucyahana John, Perezida wa Komisiyo y’Ubumwe n’Ubwiyunge, agaragaza ko abanyarwanda batuye mu mahanga bakwiye kuba intangarugero (Foto Ububiko)

TANGA IGITEKEREZO

Leave a Reply

Your email address will not be published. Required fields are marked *