28°C , Sunny | Kigali-Rwanda

Abanyarwanda basabwe kudasubira muri Uganda kubera umutekano muke

Yanditswe na Imvaho Nshya

Ku ya 01-03-2019 saa 17:22:35
Minisitiri w'Ububanyi n'Amahanga n'Ubutwererane w'u Rwanda, Dr Richard Sezibera

Minisitiri w’Ububanyi n’Amahanga akaba n’Umuvugizi wa Leta y’u Rwanda, Dr Sezibera Richard, yasabye Abanyarwanda kutongera gukorera ingendo muri Uganda.

Mu butumwa yanyujije kuri Twitter kuri uyu wa 1 Werurwe 2019, Ambasaderi Sezibera yavuze ko Abanyarwanda badakwiye gusubira muri Uganda kubera umutekano wabo utizewe.

Yagize ati, “Nk’uko byasobanuriwe abanyamakuru benshi, imipaka yose irafunguye. Ibikamyo n’izindi modoka ziremereye birasabwa gukoresha umupaka wa Kagitumba kubera ibikorwa by’ubwubatsi birimo kubera ku wa Gatuna.”

Yakomeje agira ati, “Abanyarwanda baragirwa inama yo kutajya muri Uganda kubera ibikorwa byo kubata muri yombi, kubahohotera no kubica urubozo bikomeje” muri icyo gihugu.

Ambasaderi Sezibera yakomeje avuga ko Uganda ikomeje gufunga Abanyarwanda ndetse ntiyemerere Ambasade y’u Rwanda muri Uganda kubageraho, avuga ko ibyo bijyanye n’umutekano w’icyo gihugu ariko ko abanya-Uganda baza mu Rwanda bo bakwiye kumenya ko inzira ari nyabagendwa.

Minisitiri w’Ububanyi n’Amahanga n’Ubutwererane w’u Rwanda, Dr Richard Sezibera

Ubu butumwa bwa Sezibera buje nyuma y’aho Umuvugizi wa Leta ya Uganda, Ofwondo Opondo abwiye abanyamakuru ko nta munyarwanda ufungiye muri Uganda, ndetse ngo nta munyarwanda uhohoterwa muri icyo gihugu.

Nyuma yo kuvuga ayo magambo ndetse agatangazwa kuri Twitter, Umunyamabanga wa Leta muri Minisiteri y’Ububanyi n’Amahanga ku ruhande rw’u Rwanda, Ambasaderi Olivier Nduhungirehe, yahise amunyomoza.

Ambasaderi Nduhungirehe yagize ati, “Hari Abanyarwanda basaga 40 babayeho nabi mu maboko y’Urwego rushinzwe ubutasi bwa gisirikari (CMI), n’abandi Banyarwanda basaga 800 birukanwe muri Uganda bangirwa gusubirayo kuva muri Mutarama 2018.

Opondo uvugira Leta ya Uganda, yasabye Ambasaderi Nduhungirehe kumuha imyirondoro y’Abanyarwanda bafungiwe muri Uganda, Nduhungirehe amuha urutonde rurerure rugaragaza abo ari bo, aho bafungiye n’inzego zibafite, avuga ariko ko atari bwo bwa mbere u Rwanda rubimenyesheje Uganda.

Ni nyuma y’aho Umunyarwanda Donne Kayibanda arekuwe, akaba yari umaze iminsi 48 afunzwe, atemerewe gusurwa n’umuryango we cyangwa ambasade y’u Rwanda i Kampala, nk’uko Ambasaderi Nduhungirehe abyemeza.

Ikigo cy’Imisoro n’Amahoro cy’u Rwanda cyasohoye itangazo rivuga ko hari ibikorwa by’ubwubatsi birimo gukorerwa ku mupaka wa Gatuna, gisaba ko hakoreshwa indi mipaka ihuza u Rwanda na Uganda.

Ni nyuma y’aho hari hamaze gukwirakwira amakuru avuga ko abacuruzi bo muri Uganda bangiwe kwinjira mu Rwanda, bigakurura amagambo menshi ku mbiga nkoranyambaga.

Abanyarwanda batandukanye bagiye bafatirwa muri Uganda mu bihe bitandukanye bagafungwa, u Rwanda rugasaba ko barekurwa ariko kugeza magingo aya hari benshi bagifunze.

TANGA IGITEKEREZO

Leave a Reply

Your email address will not be published. Required fields are marked *