18°C , Partly cloudy | Kigali-Rwanda
Umunyamabanga Nshingwabikorwa w’ Urwego Rushinzwe Intwari z’Igihugu, Imidari n’Impeta by’Ishimwe, CHENO, Nkunsi Deo ( Foto James R.) copy

Abanyarwanda basabwa kuzirikana kuba intwari muri 2018

Yanditswe na admin

Ku ya 29-12-2017 saa 08:04:20

Umunyamabanga Nshingwabikorwa w’Urwego Rushinzwe Intwari z’Igihugu, Imidari n’Impeta by’Ishimwe  (CHENO), Nkusi Deo,  aravuga ko ubutwari ari imwe mu ndangagaciro zaranze Abanyarwanda mu bihe bitandukanye, bityo, muri uyu mwaka mushya wa 2018 asaba Abanyarwanda kuzirikana kuba intwari.

Mu kiganiro yagiranye n’abayobozi b’ibitangazamakuru batandukanye hagamijwe kurebera hamwe imyiteguro y’umunsi mukuru w’intwari uba buri tariki ya 1 Gashyantare buri mwaka, Nkusi yavuze ko ari umunsi Abanyarwanda bibuka kandi bakazirikana Intwari z’igihugu n’ibikorwa byaziranze.

Yagize ati “Mu 2018 tuzizihiza umunsi w’Intwari z’igihugu ku nshuro ya 24.  Icyo dusaba Abanyarwanda ni uko bawugira uwabo, bakamenya za ndangagaciro ziranga ubutwari, dusanga mu muco w’Abanyarwanda,  zubaka Umunyarwanda, zubaka umuryango mugari w’Abanyarwanda, zubaka igihugu noneho zikanabafasha mu mibereho yabo ya buri munsi dukora umurimo unoze, tuwushyiramo ubwenge bwacu, umutima wacu, tuwushyiramo ingufu zacu zose, kugira ngo twihute mu iterambere, twihute mu mibereho myiza, twihute mu mibanire myiza, mu buyobozi bwiza.”

Nkusi akomeza yungamo ati “Nkumva rero y’uko Abanyarwanda muri uyu mwaka dutangiye wa 2018 abantu bazirikana y’uko bagomba kuba intwari, bagomba kugira ubutwari mu byo bakora byose. Tugomba kwihuta mu iterambere kugira ngo tugere ku byiza bishoboka, bijyanye n’ubukungu n’imibereho myiza, n’ubuyobozi bwiza n’imibanire myiza y’Abanyarwanda  kuko Abanyarwanda tuzi icyo twifuza, tukaba tuzi indangagaciro z’umuco wacu, indangagaciro z’umuco w’ubutwari byadufasha kugera ku byo twifuza byose.”

Nkusi avuga ko iyo bagiye kwizihiza  umunsi w’Intwari z’igihugu bitegura, bagafatanya n’inzego zitandukanye cyane cyane itangazamakuru kugira ngo kibe igikorwa  kigera ku banyarwanda bose ari abari mu gihugu ari n’abari hanze y’igihugu  kugira ngo umuco w’ubutwari, indangagaciro z’ubutwari zigere kuri benshi bashoboka noneho iterambere ryihute.

Avuga ko abantu bimakaje indangagaciro bakazigira izabo mu buzima bwa buri munsi, mu kazi bakora ka buri munsi, byatuma umusaruro wiyongera n’iterambere ryifuzwa rikihuta kandi rikagera kure.

Icyumweru cy’ubutwari kizatangira ku itariki ya 24 Mutarama 2018 gisozwe tariki ya 31 Mutarama  2017 kuko umunsi nyirizina ni ku itariki ya 1 Gashyantare 2017.

 MUKAGAHIZI ROSE

TANGA IGITEKEREZO

Leave a Reply

Be the First to Comment!

avatar