18°C , Intermittent clouds | Kigali-Rwanda

Abanyarwanda bagira uruhe rugare mu ishyirwa mu bikorwa rya NST1?

Yanditswe na Kayitare Jean Paul

Ku ya 16-06-2019 saa 10:08:33
Muyombano Aimé (Phd), Umuyobozi ushinzwe abanyarwanda batuye mu mahanga muri MINAFET, avuga ko bagira uruhare muri NST1

Umuyobozi ukurikirana ibikorwa by’Abanyarwanda batuye mu mahanga muri Minisiteri y’Ububanyi n’Amahanga, Muyombano Aimé (Phd), agaragaza ko Abanyarwanda batuye mu mahanga bitezweho kuzamura iterambere ry’u Rwanda.

Muyombano avuga ko amahirwe Abanyarwanda batuye mu mahanga bagira, ari uko gahunda ya Guverinoma y’imyaka 7 igamije kwihutisha iterambere (NST1) igira gahunda eshatu zirimo ubukungu, imibereho myiza n’imiyoborere myiza. Ati “Uko tugenda dukorana cyangwa tubana n’Abanyarwanda batuye mu mahanga izo nkingi uko ari eshatu tugenda tuziganiraho.” Ibi ngo bituma bazigiramo uruhare.

Ahereye ku bukungu, avuga ko uko Abanyarwanda batuye mu mahanga bakoraga ishoramari mu Rwanda byahindutse kuko bashishikarijwe gukora ishoramari ry’umwuga, ryimbitse, riteza imbere igihugu kandi rigatanga imirimo.

Ati “Uko hari abajya baza bakubakira Abanyarwanda hirya no hino mu gihugu, nabyo hari uko byahindutse kuko iyo ugiye ugahereza Umunyarwanda Mituweri azamarana umwaka, uramufashije ariko wenda ari mu kiciro runaka, undi mwaka bizagusaba kongera kumufasha, iyo utamufashije mu wundi mwaka, ni ukuvuga ngo uba umwishe.”

Avuga ko icyo u Rwanda rushaka ari uko abatuye mu mahanga baza bagafasha wa munyarwanda ku buryo azabasha kwigurira Mituweri, umwaka utaha akongera akayiyishyurira.

Muyombano avuga ko kubera uko Abanyarwanda batuye mu mahanga bagiye bafasha abatishoboye byatumye biteza imbere baba aborozi, abacuruzi n’abahinzi b’umwuga. Ashimangira ko uburyo bafashaga abatishoboye bwahindutse kandi ko bizakomeza kugenda bikunda.

Abanyarwanda batuye mu mahanga, Muyombano avuga ko bagiraga uruhare muri gahunda ya Girinka ariko ngo hakanarebwa n’igikorwa kizatuma wa munyarwanda agera ahantu yigurira icyo ashatse ndetse agasagura akaba yagurira abandi inka. Ati “Ibyo bizatuma wa murongo Guverinoma ifite wa NST1 (gahunda ya Guverinoma y’imyaka 7) hari urwego umunyarwanda ageraho.”

Muyombano avuga ko uruhare rw’abatuye mu mahanga ruhari kandi ruragaragara, akemeza ko ikintu kiza Abanyarwanda batuye mu mahanga bakoze, ari ukugarura ubumwe n’ubwiyunge, akongeraho ko icyo kitakunda abayobozi batandukanye n’abaturage batabigizemo uruhare.

Avuga ko Umunyarwanda utuye mu mahanga ufite ubushobozi yaza mu Rwanda agashora imari mu gihugu cyamubyaye. Ati “Iyo uwo munyarwanda aje gukorera mu Rwanda, azamura wa munyarwanda wari ufite ikibazo cyo kubura imirimo, bityo ugasanga abenshi muri rya shoramari baribonyemo imirimo.”

Asobanura ko hari Abanyarwanda batuye mu mahanga bafite ubumenyi bwihariye nk’abize ubuganga, abize gutwara indege, ko na bo baza bagatanga inkunga zabo mu kubaka igihugu cyabo kugira ngo bafatanye n’abandi kubaka igihugu.

Ati “Nabo iyo baje batahana inyungu kuko ishoramari rizunguka, ari natwe dutuye ino biradufasha muri wa murongo mugari wo kuzamura igihugu muri 2020.”

Muyombano Aimé (Phd), Umuyobozi ushinzwe abanyarwanda batuye mu mahanga muri MINAFET, avuga ko bagira uruhare muri NST1

Tanga Igitekerezo

Email yanyu ntigaragazwa ku rubuga. Amazina na Email ni ngombwa.