Abanyarwanda bageze Uganda bakwa ibibaranga bakitwa abacengezi

Yanditswe na Rutayisire Emile

Ku ya 05-08-2019 saa 17:44:07
Abanyarwanda batanu bafungiwe muri Uganda bagakoreshwa imirimo y'agahato bakubitwa mu gihe cy'umwaka n'amezi ane ( Foto G. Gentil )

Abanyarwanda batanu baravuga ko bafatiwe muri Uganda bamburwa ibyangombwa byabo, bajyanwa mu rukiko bashijwa kwinjira mu gihugu nta byangombwa, barafungwa, bakoreshwa imirimo y’ingufu ariko banakubitwa ku buryo hari uwahasize ubuzima.

Nizeyimana Jean D’Amour, umwe mu Banyarwanda bafunzwe bakaza gufungurwa, avuka mu Karere ka Rutsiro, mu Murenge wa Mushonyi, Akagali ka Kaguriro, mu Mudugudu wa Kivumu, yatangarije Imvaho Nshya ko yagiye Uganda tariki 13 Werurwe 2018 anyura ku mupaka wa Cyanika, afite indangamuntu, bamuha agapapuro baha umuntu ufite indangamuntu gatuma yambuka cyangwa akagaruka ku mupaka bita ‘Jeto’.

Nizeyimana agira ati “Nari ngiye ku kiyaga cya Victoria mu kazi k’uburobyi bw’amafi. Natangiye kujyayo mu 2012 nkajyayo ngakora nk’ukwezi ngataha nkazongera ngasubirayo. Tariki 13 Werurwe ngezeyo nasanze hari umwuka mubi ku bivugwa ku Banyarwanda marayo ibyumweru bibiri. Ku itariki ya 22 Werurwe 2018 naratashye ngeze mu Karere ka Gisoro aho bita Nyakabande nsanga imodoka mu muhanda iriho Polisi n’Abasirikare ba Uganda baka abagenzi ibyangombwa.”

Akomeza avuga ko yabahaye indangamuntu na Jeto bahita bamwambika amapingu bamujyana mu nzu yari ifungiyemo abandi Banyarwanda bagera ku 100 ariko bigaragara ko ari ahantu babahishe nyuma hahita haza imodoka ya Polisi ibajyana kuri Polisi kugira ngo bakorerwe dosiye.

Jeto yabahaye nta bwo yagaragaye mu kubakorera dosiye, barara aho kuri Polisi bukeye bababwira ko bagiye kubasubiza iwabo. Bahita babajyana mu rukiko. Mu rukiko bagezeyo ari 40 kandi nta muntu n’umwe wigeze yisobanura ahubwo babahagurukirije rimwe, umucamanza ahita abakatira igihano cyo gufungwa imyaka 2 ariko babagabanyiriza igihano bakatirwa umwaka n’amezi ane cyangwa bagatanga miriyoni ebyiri bakarekurwa, nk’uko abyemeza.

Abo bose bashinjwaga kwinjira mu gihugu badafite ibyangombwa kandi ngo bari babifite kuko banyuze ku mupaka bafite ibyangombwa byo kwambuka umupaka ndetse bahabwa Jeto ariko Jeto ntibamenye irengero zazo.

Bavuye mu rukiko babajyanye muri Gereza iri i Gisoro bahamara icyumweru ari naho umugore we yamusanze amuzaniye ibihumbi 400 by’amafaranga y’u Rwanda ngo bamurekure barayanga bavuga ko atuzuye. Umugore ngo yasanze hari imodoka igiye kubakura aho ikabajyana muri Gereza ya Kabale i Ndorwa, ntiyongera kubona terefoni ngo age abasha kumenyekanisha aho ari. I Kabale bahamaze ibyumweru 3 bimurirwa muri gereza basojerejemo igifungo babakatiye iri mu Ibanda yitwa “Kiburara Prison Farm” mu ruhande rwerekeza Repubulika Iharanira Demokarasi ya Kongo hafi ya Kamwenge.

Imfungwa zikoreshwa imirimo y’ingufu kandi zigakubitwa

Nizeyimana avuga ko bageze muri gereza basanga ari ahantu habi ubuzima bwaho bukomeye. Birirwaga bahinga, usigaye inyuma ananiwe agakubitwa ibiboko, ubundi bagasarura ibigori byeze kandi umuntu akaba agomba kwikorera ibiro ijana uwo binaniye agakubitwa.

Ikindi bakoraga ni ugutema amashyamba arimo amahwa. Uwicwaga n’amahwa nta mwanya wo kuyahandura wabagaho ahubwo babahaga umunsi umwe mu cyumweru wo kuyahandura, uwo ryinjiraga ku wa mbere ryamugumagamo.

Uwarwaraga bamuhaga ibinini 3 gusa kandi indyo ikaba ibigori bihondaguye n’igikoma cyabyo. Nizeyimana avuga ko babaye mu buzima bwo gukubitwa kugeza igihano bahawe kirangiye babaha itike baratega barataha tariki ya 3 Kanama 2019. Nizeyimana avuga ko amafaranga babahaye ari ayo bakoreye kuko mu mirimo bakoraga bahembwaga amafaranga y’amashiringi 100 angana na 22 y’amanyarwanda ku munsi. Avuga ko muri Gereza bavuyemo bahasize Abanyarwanda bagera nko kuri 200.

Nizeyimana yababajwe cyane n’urupfu rw’Umunyarwanda bari kumwe muri gereza witabye Imana azize uburwayi. Arasaba Abanyarwanda kwirinda gukomeza kujya Uganda kuko bashobora guhura n’ibibazo bahuye na byo. Akagira ati “Twari dufite ibituranga n’ibitwemerera kwinjira mu gihugu byemewe n’amategeko ariko barabyirengagiza ndetse barabitwaka badushinja ibyaha tudafite. Uzajya muri Uganda azabe azi ko ashobora guhura n’ingorane zishobora no kumuvutsa ubuzima.”

Abanyarwanda batanu bafungiwe muri Uganda bagakoreshwa imirimo y’agahato bakubitwa mu gihe cy’umwaka n’amezi ane ( Foto G. Gentil )

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.