Abanyanamibiya baje gushora imari mu Rwanda mu bintu birimo no kumisha inyama

Yanditswe na Mutungirehe Samuel

Ku ya 07-11-2019 saa 06:23:33
Parastus Nepolo, Umuyobozi Mukuru w’Ikigo Habesha Africa ibumoso na Kanamugire Callixte muri PSF bamaze gushyira umukono ku masezerano y'ubufatanye hagati y'impande zombi nk'abafasha abikorera (Foto PSF)

Abashoramari bo muri Namibia baje gushora imari mu Rwanda mu nzego zitandukanye zirimo no gushora imari mu kumisha inyama zikabikwa igihe kirekire.

Byatangajwe na Parastus Nepolo, Umuyobozi mukuru w’Ikigo ‘Habesha Africa’ ari kumwe n’Umunyarwanda ushinze imizi muri Namibia igihe kirekire, Gahutu Jean François, akaba anakuriye ikigo kizanye abo bashoramari “Namibia Rwanda Group PTY Ltd” mu kiganiro bahaye intangazamakuru i Kigali kuri uyu wa 6 Ugushyingo 2019 bashyira umukono ku masezerano hagati y’iryo huriro n’Urugaga rw’Abikorera PSF.

Namibia ni igihugu kiri mu Burengerazuba bw’Amajyepfo y’Umugabane w’Afurika, kikaba gifite ibintu byinshi bikurura ba mukerarugendo birimo n’Ubutayu bwa Kalahari, ikaba inakora ku nyanja ya Atlantic.

Parastus yavuze ko amasezerano bashyizeho umukono ashimangira ubucuti buri hagati y’ibihugu byombi mu by’ubukungu.

Ati “Tugerageza guteza imbere ubucuruzi hagati y’u Rwanda na Namibia. Habesha Africa ni ikigo kinini kizwi muri Namibia ku koroshya ubucuruzi ku mugabane w’Afurika. Uyu munsi twishimiye kuba turi hano mu Rwanda gushyira umukono ku masezerano y’ubu bufatanye azatuma urugaga PSF na Habesha Africa bazoroshya ubucuruzi hagati y’ibihugu byombi.

Abanyarwanda b’abashoramari n’abacuruzi kimwe na bagenzi babo bo muri Namibia bazungukira muri aya masezerano ashyizweho umukono kuko bazaba bari mu mwanya mwiza wo gukorana ubucuruzi kandi bizagira uruhare mu izamuka ry’ubukungu mu musaruro mbumbe.”

Parastus yakomeje avuga ko abashoramari benshi bo muri Namibia ubu bagiye kwisanga ku isoko ryo mu Rwanda, n’abo mu Rwanda bisange muri Namibia.

At “Habesha Africa yazanye abashoramari 11 bafite gahunda ifatika, aho nge ubwange na mugenzi wange Gahutu twaberetse byinshi kandi bishimiye inyungu bazagira, nabonye barindwi (7) muri bo bazagaruka bahite bashinga ubucuruzi hano.”

Zimwe mu nzego abo bashoramari bahisemo kuzashoramo imari zirimo ubuhinzi n’ubworozi, aho mu mwaka utaha bazubaka uruganda rutunganya inyama z’inka zikumishwa, aborozi bakaba babonye irindi soko ry’umusaruro wabo.

Parastus akomeza agira ati “Harimo nk’ubuhinzi cyane cyane mu gutunganya inyama, inyama zumye kuko ntizimenyerewe mu karere k’Afurika y’Iburasirazuba, ariko ni rusange muri Afurika y’Amajyepfo mu banyamuryango ba SADC. Twongerera agaciro inyama kuko ubusanzwe inyama zibagiweho si nziza nk’uko inyama zumishijwe ari zo zizewe ku buzima kandi dufite ikoranabuhanga ryo kuzumisha muri Namibia n’Afurika y’Epfo.

Kugeza ubu twamaze no kubona ahantu twashinga uruganda kandi ni hafi y’imipaka itatu ari yo uhuza u Rwanda ka Kongo RDC, aho usanga harimo kirometero 140, Tanzania hakaba harimo km 60 no kuri Uganda hakaba harimo km 70. Urwo ruganda ruzaba ruri ku birometero 60 uvuye Kigali, mu byumweru bibiri tugiye kuba turi hano turashimira urugaga PSF ku kazi gakomeye bari kudufashamo.”

Mu bindi bari kwiga ku Rwanda, birimo kuzareba uburyo ikijyanye no guhugura abakozi mu nganda byagezwa muri Namibia, hashyirwaho uburyo ibihugu byombi byafatanya mu guhugura abakora mu nganda kuko n’iwabo bafite abakozi bahuguwe kandi basanze hari ubumenyi butandukanye bakura mu Rwanda.

Ku ruhande rwa PSF bashimye ko ikigo Habesha u Rwanda rucyungutse nyuma y’Inama iherutse guhuza abashoramari baturutse imihanda yose, Golden Business Forum, aho Parastus yari yazanye n’Abanyafurika y’Epfo batangira kubaka umubano na Habesha.

Ni umusaruro kandi uherutse kuva mu biganiro Perezida Paul Kagame yagiranye na mugenzi we Hage Gottfried Geingob, mu ruzinduko aherutse kugirirayo rw’iminsi itatu mu kwezi kwa munani uyu mwaka.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.