17°C , Partly cloudy with thunderstorms | Kigali-Rwanda
Perezida w'Inama y'ubugenzuzi muri koperative Umwalimu Sacco Siborurema Tito atangaza ibyavuye mu myanzuro y'inteko rusange

Abanyamuryango b’Umwalimu Sacco hari ibyo basaba muri 2018

Yanditswe na admin

Ku ya 03-01-2018 saa 08:31:53

Abanyamuryango ba koperative Umwalimu Sacco barasaba ubuyobozi bwayo gushyira mu bikorwa ibyumvikanyweho mu myanzuro y’inteko rusange yo ku itariki 26 Werurwe n’iyo ku ya 30 Nzeri 2017 harimo no kugaragaza ibyagezweho ndetse n’ibitaragerwaho bikongerwamo ingufu mu 2018. Ibyo ni ibyagarutsweho mu nama nyunguranabitekerezo y’inteko rusange ya  koperative Umwalimu Sacco yabaye ku wa 27 Ukuboza 2017.

Perezida w’inama y’ubugenzuzi muri koperative Umwalimu Sacco Siborurema Tito, nk’uhagarariye abanyamuryango akomoza ku myanzuro, atangaza ko benshi bifuje ko umugenzuzi yajya agaragaza ibyiza ariko n’ibitagenda neza akabigaragaza kugira ngo bibonerwe ibisubizo bihamye.

Atangaza ko bifuje ko Umwalimu Sacco yajya ifungura imiryango mu mashami yose ikoreramo ku munsi wa gatandatu kimwe nk’iyindi yose hanyuma ikaruhuka ku munsi wo ku cyumweru kandi ngo ibyo byamaze kubahirizwa nk’uko byari byifujwe.

Siborurema mu myanzuro, hanifujwemo kunoza ikoranabuhanga kugira ngo serivisi zirusheho kwihutishwa ndetse hanarebwa ku bijyanye no gukwirakwiza ibikoresho mu mashami y’Umwalimu Sacco kuko abanyamuryango bagaragaje ko mu mashami amwe n’amwe y’iyo koperative usanga hari ibikoresho adafite.

Gusa Siborurema atangaza ko kuri uwo mwanzuro hari ibikoresho byabonetse hakaba n’ibindi bitaraboneka kandi bisabwa kwihutishwa birimo utumashini tubara amafaranga kuko abakorera kuri za gishe (guichet) babara bifashishije intoki.

Nk’uko yakomeje abitangaza, undi mwanzuro wasabaga kongera umugabane shingiro ukava ku 10 000 ukagera 40 000 uhereye muri Mutarama 2018 bikazarangirana na 2020, ndetse asobanura ko byamenyeshejwe abanyamuryango bose kandi byakiriwe neza.

Abanyamuryango bishingira abandi ngo bahabwe inguzanyo nyuma bakambura, avuga ko hasabwe kujya batanga amakuru y’uwaranzwe n’ubunyangamugayo buke kugira ngo koperative ibe yafatira ingwate ubundi yishyure.

Bifuza kandi amahugurwa y’abanyamuryango kugira ngo babashe guhanga imishinga, ibyo kandi byiyongeraho kuba hari amashami ya Umwalimu SACCO akorera ahantu hadatunganye ahakwiye rimwe ugasanga ari no mu ishuri.

Umuyobozi mukuru wa koperative yo kubitsa no kuguriza “Umwalimu Sacco” Uwambaje Laurence, yizeza abanyamuryango ikoranabuhanga mu mikorere ya serivisi itanga kugira ngo zibashe kwihuta kandi zinoge.

Asaba abanyamuryango kwishimira ko hakozwe ibishoboka byose mu 2017 kugira ngo umutungo ugende wiyongera kubera inguzanyo basaba bagatanga inyungu.

Uwambaje avuga ko 2018 koperative izibanda mu bindi bijyanye no guhugura abanyamuryango bayo bakongererwa ubumenyi kugira ngo bamenye uburyo bategura imishinga, uburyo bawushyira mu bikorwa n’uko bakurikirana uko ugenda ubinjiriza buhoro buhoro ari nayo mpamvu hateganyijwe amahugurwa mu bijyanye no gukora imishinga no kuyikurikirana.

Uwambaje avuga ko ubugenzuzi koperative Umwalimu Sacco yakoze mu bwagaragaje ko hari igihinduka mu banyamuryango bamaze guhabwa ayo mahugurwa.

Avuga ko umwaka wa 2018 uzagira impinduka kuri koperative Umwalimu Sacco ku bijyanye no gutanga serivisi nziza ku banyamuryango ku byo koperative ikora byose haba no mu kubaha inguzanyo.

Agira ati “Ahantu tuzashyira imbaraga cyane muri uyu mwaka wa 2018, ni ukureba ibibangamira serivisi dutanga byose bikagenda bikanakosorwa bikanagaragazwa cyane cyane nk’ihuzanzira (Netwark) ivugwaho gutinda, icyo gihe tuzakorana n’abandi bayishinzwe kuko atari twe tuyitanga kugira ngo abantu babone ibyo bakeneye ku gihe”.

Usibye ibyo ibyagaragajwe nk’ibyifuzo by’abanyamuryango, banatangarijwe ko hari intambwe yatewe mu bijyanye n’ikoranabuhanga iyo koperative yatangiye n’ibindi biteganywa muri uyu mwaka wa 2018 ndetse n’ibitaranoga neza bigenda bifatirwa ingamba zo kubivugurura.

SEZIBERA ANSELME

TANGA IGITEKEREZO

Leave a Reply

Be the First to Comment!

avatar