Abanyamuryango ba RALGA bishimiye ibyagezweho mu mwaka wa 2018-2019

Yanditswe na Kayira Etienne

Ku ya 13-08-2019 saa 18:52:58
Prof Shyaka Anastase Minisitiri w'Ubutegetsi bw'Igihugu (iburyo) ashyikiriza igikombe Meya wa Burera Uwambajemariya Florence (Foto RALGA)

Mu Nama y’Inteko rusange ya RALGA (Ishyirahamwe ry’Uturere n’Umujyi wa Kigali) yateranye i Kigali, abayobozi bayo bagaragarije abanyamuryango bayo ibyagezweho mu mwaka wa 2018-2019, banabagezaho ibikorwa by’ingenzi biteganyijwe mu 2019-2020.

Nyuma yo gukurikirana ibiganiro byose byari biteganyijwe muri iyo Nteko rusange no gusangira ibitekerezo, abanyamuryango bari bitabiriye inama bavuze ko bishimiye ibyagezweho bari biyemeje.

Ubwo yatangizaga ku mugaragaro Inama y’Inteko, Uwimana Innocent, Umuyobozi wa RALGA, yahaye ikaze abanyamuryango bitabiriye inama bavuye mu turere twose tugize Igihugu cy’u Rwanda, abashimira uruhare bagize mu ishyirwa mu bikorwa ry’ibyo bari biyemeje mu mwaka ushize wa 2018-2019.

Ati “Ibikorwa hafi ya byose twari twiyemeje gukora mu mwaka dusoje twabigezeho, kandi tubikesha inkunga ya buri karere n’inama ziva mu bo dufatanyije mwese abanyamuryango b’ishyirahamwe. Mwarakoze cyane nubwo mwikoreraga.”

Umunyamabanga Mukuru wa RALGA Ngendahimana Ladislas, ageza ku banyamuryango ibyagezweho ahereye ku myanzuro yafatiwe mu Nteko rusange yateranye mu mwaka wa 2018, yagize ati “Inteko rusange ya RALGA yabaye muri Gicurasi 2018 yafashe imyanzuro 7. Iyo myanzuro hafi ya yose yashyizwe mu bikorwa, uretse imyanzuro 2 yonyine ikirimo kuganirwaho n’inzego zihuriye ku byari byasabwe muri iyo myanzuro.”

Mu bisobanuro ubuyobozi bw’Ishyirahamwe ry’Uturere n’Umujyi wa Kigali bwahaye abanyamuryango baryo, usanga icyo bwasabwaga gukora kiri mu bushobozi bwabo baragikoze ahubwo igisigaye kikaba gitegerejwe kuri Minisiteri y’Abakozi ba Leta n’Umurimo na Minisiteri y’Ubutegetsi bw’Igihugu.

Umwanzuro umwe ari na wo wari uwa 2 wafatiwe mu Nteko yo muri Gicurasi 2018 wagiraga uti “Inteko Rusange yemeje ko RALGA ikomeje gutanga serivisi yo gufasha abanyamuryango kubona abakozi bashoboye (staff recruitment) inashyigikira ikifuzo cya RALGA cyo gutoranya abemererwa kuzakora ibizamini by’akazi (short listing). Inteko Rusange yasabye ko Inzego za RALGA bireba ziganira na MIFOTRA kugira ngo ababishinzwe muri RALGA bahabwe uburenganzira bwo kubona amakuru y’abasabye akazi ku mirimo itandukanye binyuze kuri “e-recruitment” portal”.

Umunyamabanga Mukuru wa RALGA Ladislas yabwiye abari bagize Inteko rusange ko ku itariki ya 6 Gashyantare 2019, ngo habaye inama yahuje Abayobozi ba RALGA, MIFOTRA na MINALOC kugira ngo isuzume ubusabe bwa RALGA bwo kugira uruhare mu gikorwa cyo gutoranya abemererwa kuzakora ibizamini by’akazi no kubika amakuru y’ababonye amanota hejuru ya 70% mu bizamini by’Akazi mu Nzego z’Ibanze mu gihe cy’amezi atandatu nkuko biteganywa n’Itegeko.

Inama ngo yagaragaje ko kubera impamvu z’itegeko n’umutekano wa “e-recruitment portal”, ubwo burenganzira bwahawe abantu bake cyane mu karere, bemeza ko nta bandi bantu bagomba kubugira. Iyo ‘database’ ngo icungirwa muri MIFOTRA ku myanya itari iy’ubuyobozi (non-managerial positions).

Aha, RALGA isanga yakomeza ibiganiro n’inzego bireba kugira ngo bishobotse izi nzitizi zagaragajwe zibe zabonerwa igisubizo.

Umwanzuro wa mbere wo wavugaga ko Inteko Rusange yasabye Uturere n’Umujyi wa Kigali batarasaba kuba abanyamuryango ba ASSETIP kwihutira kugeza ubusabe bwabo bwanditse ku buyobozi bitarenze ukwa Gatandatu 2018 kugira ngo bazemezwe n’Inteko Rusange yayo itaha nk’abanyamuryango kandi bagatangira gukorana nayo bidatinze.

Ngendahimana Ladislas yagize ati “Uturere twose twamaze kuba abanyamuryango ba ASSETIP. Uturere twari dusigaye twemejwe n’inama rusange ya ASSETIP yabaye ku wa 26 Kamena 2018.”

Mu bikorwa bindi “Ralga” yagaragaje ko yagezeho mu 2018-2019 hamwe no gushyira mu bikorwa imyanzuro yafashwe n’Inteko Rusange yabaye umwaka ushize, ngo harimo ibikorwa bijyanye no kwegereza abaturage ubuyobozi n’ubushobozi.

Kimwe muri byo ngo ni Umwiherero w’abagize Komite Nyobozi, DES na DMs bose, umwiherero wabereye i Gabiro 26-30/9/2019 ku bufatanye na MINALOC. RALGA kandi yateguye umwiherero wa ba Perezida b’Inama Njyanama z’Uturere n’Umujyi wa Kigali wabereye i Nyamata, hagati yo ku itariki 1-2 Gashyantare 2019.

Umunyamabanga Mukuru wa RALGA Ngendahimana ati “Habayeho nanone umwiherero wa ba Meya bose kuri Muhazi kuri 16-17 Gashyantare 2019, n’umwiherero wa ba Perezida ba Komisiyo z’Ubukungu n’Iterambere. Hakurikiyeho umwiherero wa ba Visi Meya bashinzwe Imibereho Myiza, umwiherero wabaye ku wa 21-22 Gashyantare 2019 i Nyamata.”

Ishyirahamwe RALGA ryahuguye Abajyanama b’Utugari na Komite Nyobozi z’Imidugudu 236 ku bijyanye n’inshingano zabo. Ngo bari bavuye mu turere twa Gasabo, Ngoma, Nyamagabe, Nyamasheke na Burera. RALGA ngo yakoze igikorwa cyo kwandika agatabo gakubiyemo inshingano z’Umujyanama ku rwego rw’Akagari n’iza Komite Nyobozi y’Umudugudu.

Ku ngingo ijyanye no kwegereza abaturage ubuyobozi n’ubushobozi, Ngendahimana yatangarije abanyamuryango ko begeranyije amategeko, amabwiriza n’inyandiko z’ingamba za politiki bikenerwa cyane n’Inzego z’ibanze mu kazi ka buri munsi.

Ati “Si ibyo gusa, abakozi ba RALGA bakoze igikorwa cyo kwandika no gutangaza inyandiko eshanu mu binyamakuru n’ibitabo by’ubushakashatsi mpuzamahanga byemewe, ku bijyanye n’Imiyoborere mu nzego z’ibanze no kwegereza abaturage ubuyobozi n’ubushobozi mu Rwanda.”

Ku birebana n’Imari y’Uturere n’Umujyi wa Kigali, “RALGA” ngo yahuje inshuro 2 abarebwa n’abashinzwe imicungire y’imari mu nzego z’ibanze (DES, DMs, DoF, Revenue Accountants) basuzumira hamwe n’Ikigo k’Imisoro n’Amahoro imyinjirize y’imisoro n’amahoro mu mezi 6 ya mbere ya 2018-2019, hanakosorwa ahagaragaye amakosa.

Ngendahimana ati “Kuri 22-24 Gicurasi 2019, RALGA yahuje Inzego z’ibanze haganirwa ku buryo bwo gukemura ibibazo bibuza Uturere kubona ‘clean audit opinion’ hagamijwe kuganira no gukora ubuvugizi, muri iyo nama hatumijwemo inzego nkuru za Leta zirimo: MINECOFIN, MINALOC, Umugenzuzi Mukuru w’Imari ya Leta, MINEDUC, MINISANTE, MIFOTRA, NIC, REB, RSSB na REG”. Muri iyo nama ngo humvikanwe ku ntego (revenue target) ya buri karere mu mwaka wa 2019-2020.

Gusa byagaragaye ko RALGA ifite imbogamizi yo kugira amafaranga make ugereranyije n’ibyo isabwa n’abanyamuryango bayo n’abafatanyabikorwa. Kugaragaza ibyagezweho mu mwaka wa 2018-2019, byasojwe n’igikorwa cyo gutanga ibyemezo by’ishimwe ku turere twatanze umusanzu neza kurusha utundi. Burera ni yo yahize utundi bituma ihabwa igikombe k’ishimwe. Uwo muhango wayobowe na Minisitiri w’Ubutegetsi bw’Igihugu Prof. Shyaka Anastase.

Prof Shyaka Anastase Minisitiri w’Ubutegetsi bw’Igihugu (iburyo) ashyikiriza igikombe Meya wa Burera Uwambajemariya Florence (Foto RALGA)

 

Umwanditsi:

Kayira Etienne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.