22°C , Partly cloudy | Kigali-Rwanda

Abanyamuryango ba COPORWA barasaba gushyirirwaho poritiki yihariye ibateza imbere

Yanditswe na Mugisha Benigne

Ku ya 30-12-2019 saa 07:07:51
Abasigajwe inyuma n'amateka barasaba gushyirirwaho poritiki yihariye ibateza imbere

Abagize Umuryango w’ababumbyi bo mu Rwanda (COPORWA) barasaba gushyirirwaho poritiki  yihariye mu rwego rwo kubateza imbere.

Ibi ni ibitangazwa n’Umuyobozi w’uyu muryango, Madamu Musabyimana Yvonne, uvuga ko abagore n’urubyiruko ndetse n’abafite ubumuga bashyizwe mu  byiciro byihariye hagamijwe  kubazamura mu iterambere, ngo kuri ubu bageze kure, agasanga rero n’abanyamuryango ba COPORWA bashyiriweho poritiki yihariye ibateza imbere bava ku rwego rubi bariho bakajya ku rwego rwiza rw’imibereho.

Ati “Murabona abagore, urubyiruko n’abafite ubumuga bashyiriweho poritiki yihariye igamije kubazamura mu iterambere kandi murabona ko bagenda bazamuka neza, natwe rero byari bikwiye ko dushyirirwaho poritiki yihariye nk’abasigajwe inyuma n’amateka tukareba ko abantu bagira imibereho myiza.”

Musabyimana avuga ko abasigajwe inyuma n’amateka ngo bakomeza gusubira inyuma aho gutera imbere nk’abandi baturage, akaba asanga bakwiye gushyirirwaho gahunda yihariye yo kubateza imbere.

Iryamukuru Jean Damascène ni umwe mu basigajwe inyuma n’amateka, avuga ko barya rimwe ku munsi kuko batabona ibyo bafungura kabiri cyangwa gatatu ku munsi.

Ati “Iyo ubonye akajumba uyu munsi uba uzongera tukabona ejo hazaza, nta bwo dushobora kurya saa sita na nimugoroba ngo tubibone, ntibibaho ntitwabishobora.”

Mukeshimana Stephanie wo mu karere ka Nyaruguru avuga ko mbere  babaga mu mashyamba baza kuyakurwamo mu rwego rwo kurengera ibidukikije no guhanga za pariki, ari na bwo bubakiwe inzu batuzwa mu midugudu ariko ngo ikibazo bafite ni uko nta masambu yo guhingamo bafite.

Kuri iki kibazo cyo gutuzwa, Musabyimana avuga ko n’ubwo bakuwe mu mashyamba bakubakirwa mu midugudu ngo ariko ntibinjijwe mu muryango nyarwanda mu buryo bwuzuye, kandi ngo na bo kwiyinjizamo birabagora, ari nayo mpamvu imibanire y’abo n’abandi banyarwanda ikiri hasi.

Coporwa ni umuryango w’ababumbyi mu Rwanda, ufite inshingano zo gukorera ubuvugizi abasigajwe inyuma n’amateka no guharanira ko binjizwa byuzuye mu iterambere ry’igihugu.

Abasigajwe inyuma n’amateka barasaba kuzamurirwa imibereho yabo

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.