17°C , Partly cloudy with thunderstorms | Kigali-Rwanda
Abanyamadini biyemeje gufasha leta kugabanya imiti itumizwa hanze (Foto; Niyonsenga S)

Abanyamadini bazafasha Leta kugabanya ibitumizwa hanze

Yanditswe na NIYONSENGA SCHADRACK

Ku ya 10-01-2018 saa 07:34:13

Abanyamadini bo mu Rwanda bibumbiye hamwe mu muryango ugamije guteza imbere ibikorwa by’ubuvuzi mu mavuriro, batangaza ko bihaye gahunda yo gushyira imbaraga mu bikorwa by’ubushakashatsi n’ibyo gukora imiti n’ibindi bikoresho byo kwa muganga hagamijwe gufasha Leta kugabanya ibyo itumiza hanze mu rwego rw’ubuzima.

Abanyamadini biyemeje gufasha leta kugabanya imiti itumizwa hanze (Foto; Niyonsenga S)

Ubwo abo banyamadini bari mu nama yiga ku igenamigambi ry’ibizakorwa, Umushumba wa Diyoseze ya Ruhengeri akaba n’umuvugizi w’umuryango BUFMAR (Bureau de Formation Medicale Agree aux Rwanda), ari nawo aba banyamadini bahuriramo, Musenyeri Vincent Harorimana, yavuze ko bagiye gushyira imbaraga mu gufasha Leta kugabanya ibikorwa by’ubuzima bitumizwa hanze.

Yagize ati “Ibijyanye n’imiti ni ikintu dukurikiranira hafi cyane yaba mu mavuriro ashamikiye ku matorero yacu ndetse no mu mavuriro y’igihugu muri rusange. Dufite igenamigambi ry’imyaka 5 rizibanda cyane ku gukora imiti, dushaka kwinjiza ibikorwa byacu byose muri gahunda ya Leta yo kwishakamo ibisubizo ku buryo ibintu bimwe na bimwe dushobora kwikorera hano mu Rwanda twajya tubikora ndetse tukongerera n’ingufu gahunda z’ubushakashatsi, cyane ko dufite n’abahanga mu gihugu cyacu.”

Akomeza agira ati “Ubundi uyu muryango ugamije guhuza ibikorwa byose by’amavuriro ya Kiliziya Gatolika ndetse n’amwe mu matorero ya Giporotesitanti, intego nyamukuru yacu ni uko tugamije kubonera Abanyarwanda imiti n’ibikoresho byo kwa muganga byiza kandi bidahenze, rero ibyo tuzabigeraho binyuze mu kwita ku bufatanye na Leta.”

Umuryango wa BUFMAR ugizwe n’abanyamuryango 22 barimo abo mu Gatulika ndetse n’abo mu madini ya Giporotesitanti, bafite intego yo kwita ku buzima  binyuze mu mikoranire bafitanye na Minisiteri y’Ubuzima. Uyu muryango ufasha kugeza imiti n’ibikoresho bifasha abafite ubumuga butandukanye mu mavuriro cyane cyane ashingiye ku madini bakorana.

Guverinoma y’u Rwanda binyuze muri Minisiteri y’Ubuzima, ifite gahunda yo kugabanya imiti itumizwa hanze y’u Rwanda binyuza mu guteza imbere inganda zikora imiti nyuma y’uko byagaragaye ko iyo gahunda itwara u Rwanda amafaranga menshi.

Mu 2017, u Rwanda rwatanze amafaranga agera kuri miliyari hafi 80 z’amafaranga y’u Rwanda mu kugura imiti iturutse mu mahanga.

TANGA IGITEKEREZO

Leave a Reply

Be the First to Comment!

avatar