20°C , Mostly clear | Kigali-Rwanda
Sitade ya mbere mu Rwanda yubatswe n'abaturage ba Kiziguro, bayise 'Liberation Stadium' (Foto Kayitare J.P)

Abanyakiziguro bishimiye ikibuga cya miriyoni zirenga 52 biyubakiye

Yanditswe na Kayitare Jean Paul

Ku ya 14-06-2019 saa 17:19:01

Abaturage batuye mu Murenge wa Kiziguro mu Karere ka Gatsibo barishimira igikorwa k’indashyikirwa bakoze cyo kwiyubakira ikibuga cy’umupira cyuzuye gitwaye miriyoni zirenga 52 z’amafaranga y’u Rwanda.

Iki kibuga cy’umupira giherereye mu kagari ka Rubona, Umunyamabanga Nshingwabikorwa w’agateganyo w’Umurenge wa Kiziguro, Mupenzi Léon Pierre, avuga ko kirenze kuba ikibuga.

Yagize ati: “Iki kibuga kirenze kuba ikibuga kuko Abanyarubona bakise ‘Liberation Stadium”. Yongeraho kandi ko iki ari igikorwa k’indashyikirwa kiri mu mihigo umurenge wihaye wa 2018-2019”.

Kwitonda Emmanuel mu izina ry’abaturage bagize uruhare mu kwiyubakira ikibuga cy’umupira agaragaza ko abaturage bahisemo igikorwa k’indashyikirwa nyuma yo kwiyuzuriza ‘Ivuriro ry’ingoboka’ kuko ngo babonaga siporo ari ingenzi.

Akomeza avuga ko kubaka ikibuga cy’umupira byabatwaye imbaraga. Ati: “Twatangiye kubaka mu kwezi kwa Nyakanga mu gihe k’izuba n’imvura turakomeza turagikora. Twakoresheje imbaraga nyinshi. Iki gikorwa twagifashijwemo n’Umunyamabanga Nshingwabikorwa w’agateganyo w’umurenge wacu wa Kiziguro”.

Umuyobozi w’Akarere ka Gatsibo, Gasana Richard, yashimye igikorwa k’indashyikirwa cy’abaturage biyubakiye ikibuga cy’umupira. Avuga ko nta kiza cyo kubona abaturage batuye umurenge umwe biyubakira ikibuga cy’umupira kandi ngo gihenze.

Yagize ati: “Muri abo gushimwa kuba mwiyubakiye ikibuga cy’umupira n’inzu yo kugamamo izuba. Nibwira ko mu Rwanda iyi sitade ishobora kuba ari iya mbere yubatswe n’abaturage bishyize hamwe bo mu murenge umwe. Kubera izina ry’iki kibuga, umunsi wo kwibohora ndashaka ko uzabera kuri iki kibuga mwiyubakiye”.

Mukamisha Eugenie avuga ko ikibuga nk’igikorwa k’indashyikirwa bakishimiye kandi biteguye kubungabunga igikorwa remezo bashyizeho amaboko. Akomeza avuga ko abana babo bajyaga bajya gukinira ku kibuga cya Gakenke mu murenge wa Kiramuruzi.

Yagize ati “Twishimiye ikibuga twiyubakiye kandi kizatuma abana bacu bagorwaga no kujya gukinira i Kiramuruzi batongera gukora urwo rugendo. Icyo nakongeraho ni uko iki gikorwa k’ndashyikirwa cyacu tuzakibungabunga kuko cyaratuvunnye”.

Mahatane Ismael utuye mu kagari ka Rubona mu murenge wa Kiziguro avuga ko ikibuga cy’umupira biyujurije ari igikorwa k’indashyikirwa bishimiye kandi biteguye kugikoresha neza no kukibungabunga.

Gapira Aloys na we utuye mu murenge wa Kiziguro avuga ko uko bise izina ikibuga biyubakiye, avuga ko bakwiye kwibohora ubukene.

Ati: “Kwibohora ingoyi y’ibibazo by’ubukene. Baturage nimwishimire igikorwa mwakoze kandi mukubaka inzu yo ku kibuga. Nta hantu wabona ikibuga cyujuje ibisabwa kiyubakiwe n’abaturage, ndabasaba ko buri muntu yajya akorera siporo muri iki kibuga”.

Sitade ya mbere mu Rwanda yubatswe n’abaturage ba Kiziguro, bayise ‘Liberation Stadium’ (Foto Kayitare J.P)

TANGA IGITEKEREZO

One Comment on “Abanyakiziguro bishimiye ikibuga cya miriyoni zirenga 52 biyubakiye”

Leave a Reply

Your email address will not be published. Required fields are marked *