Abanyakigali basabwe kudahumwa amaso n’ibyiza bimaze kugerwaho

Yanditswe na Sezibera Anselme

Ku ya 22-11-2019 saa 14:16:16
Umuyobozi w'umujyi wa Kigali wungirije ushinzwe imibereho myiza n'iterambere ry'ubukungu Umutoni Gatsinzi Nadine akangurira inzego z'ibanze kubungabunga umutekano n'isuku(Foto Sezibera)

Ubuyobozi bw’Umujyi wa Kigali burakangurira Abanyarwanda kudahumwa amaso n’ibyiza igihugu cyabashije kugeraho nyuma y’imyaka 25 ishize Jenoside yakorewe Abatutsi irangiye.

Amahugurwa y’abayobozi b’imidugudu n’ab’utugari mu turere tugize Umujyi wa Kigali bakanguriwe kunoza imyubakire, isuku, umutekano n’imitangire ya serivisi kugira ngo bigendane n’umujyi wifuzwa ushingiye ku gishushanyo mbonera kivuguruye.

Byagarutsweho mu mahugurwa yagenewe abayobozi b’imidugudu n’ab’utugari twose bigize Umujyi wa Kigali yabaye yateguwe n’umujyi wa Kigali ufatanyije n’inzego z’umutekano, Polisi y’Igihugu na Minisiteri y’Ubutegetsi bw’Igihugu (MINALOC).

Umuyobozi w’Umujyi wa Kigali wungirije ushinzwe imibereho myiza n’iterambere ry’ubukungu Umutoni Gatsinzi Nadine, ati “Ibyagezweho byiza ntibikwiye kuduhuma amaso ngo twumve ko twageze iyo tujya, urugendo ruracyari rurerure, akaba ari yo mpamvu dusaba amahugurwa kugira ngo dukomeze twihugure kandi twongere tunarebe aho dufite intege nke tuhongere ingufu. Ni muri urwo rwego nk’abayobozi tugomba kureba aho tutari gukora neza tukahakosora kugira ngo tubashe kuhakosora kugira ngo bidufashe kugira umujyi utubereye kandi twifuza nk’Abanyarwanda.”

Umutoni avuga hari byinshi Umujyi wa Kigali wagezeho ukanabishimirwa ku Isi hose kubera ko igihugu muri rusange kizwi nk’ikiteje imbere nyuma y’imyaka 25 Jenoside yakorewe Abatutsi irangiye kandi kikabera ibindi bihugu ikitegererezo.

Umutoni yavuze ko ayo mahugurwa yateguwe hagamijwe gukangurira abayobozi inshingano zabo, no kubahwitura kubongerera ubushobozi kugira ngo barusheho gukora neza imirimo bashinzwe byose biganisha kubaka Umujyi wa Kigali wifuzwa.

Yabagaragarije ko hari inama mpuzamahanga igihugu kitegura mu minsi iri imbere kandi zizitabirwa n’abashyitsi benshi, abasaba gukomeza kubungabunga isuku isanzwe imenyerewe mu Rwanda, kubakirana urugwiro.

Ati: “Isuku dufite aho tuyigejeje ariko hari ibibazo bigenda biboneka birimo ibihuru hirya no hino, amacupa yajugunywe mu mihanda, turifuza ko mwongera kureba kuri ibyo bibazo kuko ari mwe mwegereye abaturage bacu. Turabasaba kugira ijisho rirenze iry’umuturage muyobora n’iry’undi wese udafite izo nshingano.”

Umutoni yabasabye no kugenzura isuku mu makaritsiye y’abagenda bubaka mu kajagari bakajya babikurikirana. Ati: “Ntabwo Perezida wa Repubulika akwiye kujya aza gusura abaturage akabona ibintu bitameze neza twebwe tutarabibona tuhegereye.” Ku mutekano nabwo yasabye ko ukwiye kubungabungwa baha agaciro ikayi y’umudugudu ndetse no gushyira imbaraga mu guhashya abagishikuza amasakoshi abantu, abasaba ko byakwirindwa cyane ku buryo bitazagera no kuzishikuza abanyamahanga baza mu Rwanda.

Umutoni yabasabye gufungura ijisho ku bantu bashya baza mu makaritsiye kandi bakajya batanga amakuru ku nzego kugira ngo zikurikirane.

Umuyobozi wa Polisi mu Mujyi wa Kigali ACP Rutagerura Felly, yakanguriye abayobozi kwita ku mutekano bakoresha neza ikayi y’abinjira n’abasohoka mu mudugudu, agaruka ku mirenge imwe n’imwe igaragaramo isuku n’umutekano mukeya ko yahindura igakora neza irwanya inzoga  z’inkorano, gucuruza no kunywa inzoga mu masaha y’akazi hamwe no kwirinda urusaku kubera ko bitemewe bityo asaba ko aho biri byacika.

Uretse isuku, umutekano na serivisi byavuzwe, abo bayobozi bakaba banaganirijwe ku gishushanyo kivuguruye cy’Umujyi wa Kigali kugira ngo batangire bategure abaturage banabaganiriza uko kizaba kimeze.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.