Abanyafurika bagiye gushyirirwaho uburyo bwo kwishyurana badakoresheje amadevize

Yanditswe na Mutungirehe Samuel

Ku ya 15-02-2020 saa 18:49:56
Umuyobozi Mukuru muri Banki Nyafurika, Gainmore Zanamwe, agaragaza uko abacuruzi bagiye koroherezwa kwishyurana (Foto Samuel M)

Umuyobozi Mukuru muri Banki Nyafurika iteza imbere koherezanya ibicuruzwa no kubitumiza mu bihugu byo kuri uwo mugabane, “Afriximbank”, ushinzwe korohereza ubucuruzi n’ubucuruzi bw’imbere muri Afurika, Gainmore Zanamwe, yatangaje ko abacuruzi bo mu bihugu byo ku mugabane bagiye gushyirirwaho amahirwe akomeye, “Panafrican payment and settlement system”, y’uburyo bubafasha kwishyuraha bidasabye ko hakoreshwa amadevize.

Ni bimwe mu byaganiriweho mu nama imaze iminsi ibera i Kigali yateguwe na Banki Nyafurika iteza imbere ibyoherezwa n’ibitumizwa mu bihugu byo ku mugabane w’Afurika, Afriximbank, n’abikorera bo mu Rwanda batandukanye, basobanurirwa ibyo iyo banki yabafashamo guteza imbere ubucuruzi bw’imbere ku mugabane.

Zanamwe yavuze ko nta mpamvu yumvikana ituma umuntu ajya kwishyura undi akajya gushaka amafaranga yo hanze, bityo ubwo buryo nyafurika bwo kwishyurana nta wundi witambitsemo hagati y’abari gucuruzanya bukenewe.

Akomeza avuga ko kugeza ubu ikiriho muri Afurika ari uko hari amafaranga arenga 40 y’ibihugu akoreshwa mu bucuruzi.

Ati “Ku Rwanda kugira ngo ubashe gucuruza na Nigeria cyangwa Misiri ubanza gukenera mbere na mbere kuvunjisha, ukenera urutonde rw’amadorari cyangwa amayero kugira ngo ucuruze n’abandi. Kuki dukenera andi madorari y’undi muntu kugira ngo dukorane ibyo dukora ku mugabane, ibi ni ikibazo turi kugerageza gukemura.

Usanga bwinshi mu bucuruzi bwakagombye gukorerwa ku mugabane butari gukorwa kuko iyo ugerageje kuzana ibicuruzwa iwanyu hari ubwo ujya kumva ukumva Banki Nkuru yanyu irakubwiye ngo ntidufite ayo mafaranga ubucuruzi bwawe bugahagarara.”

Yakomeje avuga ko iyo umucuruzi agerageje kohereza ibicuruzwa hanze hari amabwiriza agomba kubanza kwitaho, bityo Banki ya Afriximbank yiyemeje koroshya ubucuruzi mu mafaranga ya buri gihugu.

Ati “Ufite amanyarwanda ugomba gukora ubucuruzi; urugero, nk’umucuruzi w’Umunyarwanda akagura ibicuruzwa byo mu Misiri wiyicariye hano Kigali hanyuma ukishyurwa mu manyarwanda. Numvise nk’icyayi cyanyu wacyorehereza Misiri ukishyurwa mu manyarwanda n’Umunyamisiri waguze cya cyayi akazabona amafaranga ye mu mapawundi yaho.”

Banki ya Afriximbank icyo ivuga izakora ni ugushyiraho ubucuruzi busanzwe butabarwa bukaba bubarwa kandi bigakorwa mu myaka itatu kugeza kuri ine, aho bizatwara miriyari 40 z’amadorari y’Amerika.

Ku ruhande rw’Abanyarwanda, umuyobozi Mukuru wungirije w’Urugaga rw’Abikorera PSF, Gishoma Eric, yavuze ko ayo ari amahirwe akomeye aziye abikorera.

Ati “Buriya buryo tuzajya dushobora kwishyura amafaranga y’u Rwanda kandi tukishyura tudaciye mu madorari, tukishyurana hagati yacu ibyo dukeneye mu kindi gihugu. Byaba bishimishije kuko amafaranga y’amanyamahanga arahenda, murabizi namwe, byaba byiza, rero urwo rubuga rushoboye gukora nta bwo twakongera kuzajya duca mu mafaranga y’amanyamahanga.”

Mu bindi abacuruzi babwiwe bigiye kuzoroshya ubucuruzi, ni ukugira amabwiriza amwe y’ubuziranenge bw’ibicuruzwa, gukoresha ibyo ku mugabane w’Afurika “made in Africa”, ubwishingizi ku bikorewe muri Afurika, aho Afurika izaba ikorana neza.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.