17°C , Mostly cloudy | Kigali-Rwanda
Mugabo Jackson aha yasobanuraga uburyo abantu basobanukiwe ikoreshwa ry'inzitiramubu (Foto Nyiraneza J.)

Abantu bamaze gusobanukirwa akamaro ko kurara mu nzitiramubu

Yanditswe na Nyiraneza Judith

Ku ya 11-06-2019 saa 15:33:07

Ubwo hakorwaga imurikabikorwa mu karere ka Muhanga bamwe mu baturage bari baryitabiriye batangarije Imvaho Nshya ko bamaze gusobanukirwa neza akamaro ko kurara mu nzitiramubu iteye umuti, hagamijwe kwirinda marariya, ibyo bigatuma babona uko bakora babungabunga ubuzima bwabo.

Babitangaje ubwo bari ahamurikwaga inzitiramubu zikoranye umuti, bagasobanurirwa uko zikoreshwa aho ziboneka n’uburyo bazibona mu rwego rwo kwirinda marariya mu mpera z’ukwezi gushize.

Mugeni Marie umwe mu bari baje kugura inzitiramubu yavuze ko mbere abantu batarasobanukirwa neza ko kurara mu nzitiramubu byatumaga abantu barwara marariya, ibyo bikaba intandaro yo guhora kwa muganga ntibagire umwanya wo gukora ngo biteze imbere.

Yagize ati: “Kuri ubu tumaze gusobanukirwa neza akamaro ko kurara mu nzitiramubu ikoranye umuti, kuko twaciye ukubiri na marariya, bituma tubona uko dukora imirimo itandukanye aho kujya kwa muganga bituma dutera imbere. Tubona umwanya wo kwita ku miryango yacu, duharanira kunoza umurimo ngo twiteze imbere.”

Nk’uko byatangajwe n’uwari uhagarariye Umuryango nyarwanda w’ubuzima (SFHI: Society Family Health) muri iryo murikabikorwa ry’Akarere ka Muhanga Mugabo Jackson yatangarije Imvaho Nshya ko gahunda yitwa Turwanye imibu, ingobyi Activity, ahamurikwaga inzitiramubu, amavuta yo kwisiga mu masaha ya nimugoroba nka saa kumi n’ebyiri umuntu akaba yamara amasaha ane nta mubu wamwegera ngo umurume, bikaba byaragaragaye ko imyumvire y’abaturage yahindutse cyane ku bijyanye n’imikoreshereze y’inzitiramubu kubera ubukangurambaga bwagiye bukorwa hirya no hino.

Yagize ati: “Ubwitabire ni bwinshi ku bijyanye n’inzitiramubu, ari ibisobanuro kimwe no kubaza aho zaboneka n’ibiciro. Inzitiramubu ziboneka mu bigo nderabuzima byose kimwe no muri za farumasi. Ibiciro byo biterwa n’ingano y’inzitiramubu, hari inini zigura amafaranga ibihumbi birindwi na magana ane naho into zikagura ibihumbi bitanu na magana kenda.”

Mugabo Jackson aha yasobanuraga uburyo abantu basobanukiwe ikoreshwa ry’inzitiramubu (Foto Nyiraneza J.)

Yongeyeho ko by’umwihariko abatuye ahantu hakurura amarariya bashishikarizwa cyane gukoresha inzitiramubu. Ati: “Abaturiye ibishanga, aho babumbira amatafari, ahahingwa umuceri abo ni abantu baba bafite ibyago byinshi byo kwibasirwa na marariya, ni yo mpamvu ari ngombwa ko abo barara mu nzitiramubu.”

Umwe mu baturiye igishanga ahabumbwa amatafari, Habimana Innocent yatangarije Imvaho Nshya ko ari ngombwa ko barara mu nzitiramubu mu rwego rwo kwirinda marariya. Ati “Cyane cyane ku mugoroba imibu iba iduhira, by’umwihariko abantu duturiye ibishanga ni ngombwa ko tugira inzitiramubu zikoranye umuti ngo twirinde marariya.”

Umuyobozi w’Akarere ka Muhanga wungirije ushinzwe imibereho myiza, Mukagatana Fortuné yashimye uruhare rw’abafatanyabikorwa mu kwesa imihigo Akarere kaba kihaye, kuko haba harimo ibirebana n’ubuzima bityo abafatanyabikorwa mu rwego rw’ubuzima bagira uruhare mu kuyesa.

TANGA IGITEKEREZO

Leave a Reply

Your email address will not be published. Required fields are marked *