21°C , Partly cloudy | Kigali-Rwanda
Abasenateri baratanga ibitekerezo binyuranye ku gukumira no kurwanya ingenfabitekerezo

Abantu 65 bahamijwe ingengabitekerezo ya Jenoside mu 2017

Yanditswe na Mugisha Benigne

Ku ya 06-11-2018 saa 12:21:45

Komisiyo y’Igihugu y’Ubumwe n’Ubwiyunge (NURC) itangaza ko abantu 65 bahamijwe icyaha k’ingengabitekerezo ya Jenoside bahabwa ibihano.

Ibi ni bimwe mu bikubiye muri Raporo y’ibikorwa bya NURC mu mwaka wa 2017-2018 yashyikirijwe Sena kuri uyu wa Mbere tariki ya 5 Ugushyingo 2018.

Rucyahana John, Perezida wa NURC, yagize ati, “Amadosiye 193 y’ingengabitekerezo ni yo yashyikirijwe ubushinjacyaha bw’u Rwanda mu mwaka wa 2017.”

Yagaragaje uko izi dosiye zakurikiranywe n’uko abakoze iki cyaha bagihaniwe.

Yavuze ko abantu 65 bahawe ibihano, dosiye 45 zashyinguwe by’agateganyo, dosiye 33 ntacyo ubushinjacyaha burazivugaho, 18 ntizirafatirwa imyanzuro, 17 bagizwe abere, 13 zashyinguwe burundu, dosiye 1 yahinduriwe inyito y’icyaha naho dosiye imwe y’abana batannye baza gusubizwa mu murongo.

Bishop Rucyahana yavuze ko igipimo k’ingengabitekerezo ya Jenoside kigenda kigabanuka, kuko byavuye kuri dosiye 193 muri 2017 zigera kuri dosiye 141 mu mwaka wa 2018.

Yagize ati “N’ubwo imibare yagaragaye nk’iri hejuru, ingengabitekerezo iragenda igabanuka, yavuye ku 193 kugera kuri 141, biratanga ikizere ko mu gihe gitaha bizaba biri hasi cyane.”

Rucyahana yagaragaje ishusho y’ubumwe n’ubwiyunge mu banyarwanda, avuga ko igeze ku gipimo cya 93.9% naho imibanire myiza y’Abanyarwanda ishingiye ku Bunyarwanda igeze ku gipimo cya 95.6%.

Yagarutse ku bushakashatsi bwakozwe n’Urwego rw’Igihugu rw’Imiyoborere (RGB) yagaragaje ikizere abaturage bafitiye inzego za Leta, aho yakigaragarije mu nzego eshatu z’igihugu.

Yagize ati “Abaturage bafitiye ikizere Perezida wa Repubulika ni 99.1%, bagifitiye Inteko ishinga Amategeko ku kigero cya 91.7%, ndetse inzego z’ubutabera zifitiwe kizere n’abaturage ku kigero cya 85.8%.”

Rucyahana Kakdi yagarutse ku mbogamizi zigihari mu rugendo rw’ubumwe n’ubwiyunge bw’Abanyarwanda, avuga ko ingengabitekerezo ari kimwe mu nzitizi.

Izindi nzitizi ku bumwe n’ubwiyunge ngo ni ukuba hari abacyireba mu ndorerwamo z’amoko, ingaruka z’ibikomere bituruka ku mateka mabi ya Jenoside yakorewe Abatutsi, ikibazo k’imibiri y’abazize Jenoside itarashyingurwa mu cyubahiro, ikibazo k’imitungo yasahuwe mu gihe cya Jenoside itarishyurwa, ihungabana rigihari ryanageze ku banyarwanda bavutse nyuma ya Jenoside, abanze kwemera icyaha bigashegesha abo biciye bikanatera ipfunwe imiryango yabo bikanatera ubwishishanye, gusubiza mu buzima busanzwe abakoze icyaha cya Jenoside, abahunze barakoze Jenoside bakomeje gukwirakwiza amacakubiri no guhakana Jenoside.

Yanagaragaje uturere 6 tw’igihugu twagaragaye mu bikorwa bibangamira ubumwe n’ubwiyunge, nk’Akarere ka Gasabo, Musanze, Nyagatare, Nyanza, Ruhango na Rubavu.

Abasenateri babajije Komisiyo y’Igihugu y’Ubumwe n’Ubwiyunge impamvu abagifite ingengabitekerezo ya Jenoside n’amacakubiri batabihanirwa ngo bicike.

Aha Rucyahana yavuze ko Komisiyo abereye umuyobozi igaragaza amakosa yakozwe maze inzego bireba zikabikurikirana.

TANGA IGITEKEREZO

Leave a Reply

Your email address will not be published. Required fields are marked *