21°C , Mostly cloudy | Kigali-Rwanda
Prof Daniel de Wolf (ibumoso) asuzuma umwana indwara z'umutima, umwe mu bagize itsinda rya Chaine of Hope riturutse mu Bubiligi rije kubaga indwara z'abana z'umutima (Foto James R)

Abana 25 barwaye indwara z’umutima bagiye kubagirwa mu Rwanda

Yanditswe na MUTUNGIREHE SAMUEL

Ku ya 12-09-2018 saa 07:14:04

Mu gihe bimenyerewe ko abarwaye indwara z’umutima hitabazwa kujyanwa mu bitaro bikomeye byo mu Buhinde, mu minsi iri imbere abana 25 barwaye indwara z’umutima zitandukanye bazavurirwa mu bitaro byitiriwe Umwami Faisal mu Rwanda babazwe n’abaganga b’inzobere bo mu Bubiligi.

Prof Daniel de Wolf (ibumoso) asuzuma umwana indwara z’umutima, umwe mu bagize itsinda rya Chaine of Hope riturutse mu Bubiligi rije kubaga indwara z’abana z’umutima (Foto James R)

Itsinda ry’abaganga b’inzobere baturutse mu Bibiligi bibumbiye mu muryango “Chain of Hope/Belgium” bari mu bitaro by’Ikitegererezo bya Kaminuza bya Kigali (CHUK) mu bikorwa bibanziriza umunsi wo kubaga indwara z’umutima z’abana, basuzuma bwa nyuma abana bakurikiranwa n’ibyo bitaro.

Bamwe mu babyeyi baganiriye n’Imvaho Nshya, bafite abana barwaye indwara z’umutima, bavuze ko byabashimishije cyane, uwumvaga igiciro gisabwa kujyana umurwayi mu Buhinde yabyumvaga nk’inzozi none abana babo bakaba bagiye kuvurwa babagiwe mu Rwanda.

Umubyeyi utifuje gutangaza imyirondoro ye yagize ati “Twishimye cyane, umwana bamushyize kuri gahunda (Rendez-Vous) ko azabagwa. Ndumva nishimye kubona nta tike ntanze yo kujya hanze, nta kindi kintu bansabye. Ikibazo cy’umutima ubundi ni ikintu kitoroshye, gisaba ubushobozi bwinshi ariko aba baganga barakoze cyane.

Abaganga babimenye ko umwana afite ikibazo cy’umutima afite amezi atanu, ubu afite imyaka ine; ni ukuvuga ngo hari igihe bamukurikiranye tukazajya tumuha ibinini. Ikibazo afite ni uguhumeka nabi, nta bwo ashobora kwirukanka kandi igihe haje indwara z’ibicurane n’inkorora ibibazo birahaguruka tukajya mu bitaro.”

Shyirambere Anastase, utuye mu karere ka Kicukiro, yavuze ko umwana we yavuwe abagiwe mu Buhinde none akaba yaje kugira ngo abaganga bongere bamusuzume barebe neza niba yarakize kuko nyuma yo kubagwa umwana we asa n’uwakize.

Ati “Twatangiye kubona arwara afite imyaka umunani, agize imyaka 13,  tukavuza hose bikoroha ariko mu by’ukuri tutaramenya icyo arwaye. Twaje gushakisha ubushobozi, ageze mu Buhinde baramuvura nyuma muganga wari wamukurikiranye atubwira ko tuzajya tumuzana muri Rendez-Vous agasuzumwa. Kuva icyo gihe mu 2016 kugeza uyu munsi tubona bigenda neza, ariga, munahuye ntiwapfa kubimenya. Mbere agifatwa, yahoranaga umunananiro udashira, umuriro.”

Dr. Rusingiza Emmanuel, umuganga uvura indwara z’umutima z’abana mu bitaro bya CHUK, yavuze ko guhera mu mwaka wa 2007 iryo tsinda ry’abaganga bo muri Chain of Hop/Belgium baza mu Rwanda kuvura abana.

Ati “Baza gusuzuma abana buri mwaka mu kwezi kwa Nzeri hanyuma bakareba mu bo dufite abo bashobora kubaga noneho mu kwezi k’Ukwakira bakaza kubaga abo bana. Urebye tuba dufite nk’abana barenga 100 bakeneye kubagwa, ariko baraza bagatoranyamo nka 24 cyangwa 25 bitewe n’ubushobozi baba bafite mu cyumweru kimwe bakoramo.

Mu Rwanda ntidufite serivisi zo kubaga umutima, ducungira kuri abo baganga b’inzobere kugira ngo badufashe […] Ikiza, aba ng’aba iyo baje gutya bababagira aha ndetse natwe abaganga tukaboneraho kugira ngo  ubumenyi bwacu bukomeze gutera imbere mu kuvura indwara z’umutima z’abana.”

Umuhuzabikorwa w’Umuryango ‘Chaine of Hope/Belgium’, Catherine de Pieront, yavuze ko iyo baje bavura abana badafite ubushobozi bwo kujya hanze kwivuza.

Yakomeje avuga ko umubano w’u Rwanda n’iryo tsinda ry’abaganga b’inzobere utagarukira gusa mu kuvura abana ahubwo kuva mu 2006 banahuguraga abaganga b’Abanyarwanda bakabajyana mu bitaro byo mu Bubiligi bivura indwara nk’izo kureba uko bikorwa kandi batanga umusaruro aho bakorera mu bitaro mu Rwanda.

Ubusanzwe igiciro cyo kujyana umurwayi mu Buhinde kwivuza indwara z’umutima bisaba amadolari y’Amerika ibihumbi 10 ariko ubu igiciro cyo kuvura babazwe indwara z’umutima mu bana kizagabanuka cyane hafi inshuro enye kuko abaganga babikora ku buntu kandi imiti n’ibindi bikoresho byishyuwe kuri buri wese uzabagwa.

 

 

TANGA IGITEKEREZO

Leave a Reply

Be the First to Comment!

avatar