20°C , Mostly cloudy | Kigali-Rwanda

Abamaze gutahurwaho COVID-19 mu Rwanda barenze 22,100

Yanditswe na Imvaho Nshya

Ku ya 02-04-2021 saa 21:55:41

Kuri uyu wa Gatanu tariki ya 2 Mata 2021, habonetse abarwayi bashya 249 b’icyorezo cya COVID-19 bituma abamaze gutahurwa guhera muri Werurwe 2020 bagera ku 22,167. Ni mu gihe abakize uyu munsi ari 90 batumye abamaze gukira bose bagera ku 20,398 bangana na 92%.

Uyu munsi abagabo babiri barimo uw’imyaka 83 wo mu Karere ka Nyanza n’uwa 40 w’i Huye ni bo bishwe n’icyorezo cya COVID-19 mu Rwanda,  bituma abamaze guhitanwa na cyo baba 310 bangana na 1.4% by’abamaze gutahurwaho iyo ndwara. Abarwayi bakirwaye ni 1,459 barimo batandatu barembye.

Abarwayi bashya barimo abo mu Karere ka Huye 60, Ruhango 27, Gicumbi 27, Nyaruguru 24, Nyanza 23, Gisagara 18, Bugesera 17, Umujyi wa Kigali 15, Muhanga 12, Karongi 6, Rwamagana 5, Nyamagabe 4, Rubavu 4,  Kayonza 3, Ngoma 3, na Burera 1.

Umuyobozi Mukuru w’Ikigo cy’Igihugu cy’Ubuzima (RBC) Dr. Nsanzimana Sabin, yavuze ko nubwo imibare ya COVID-19 ikomeje kwiyongera mu Ntara y’Amajyepfo abarwayi bashya baraturuka cyane mu bipimo byinshi bifatwa, aho nibura RBC ipima abantu 50 muri buri kagari mu turere 6 tugize iyo Ntara.

Abaturarwanda barasabwa kutirara kuko icyorezo kigihari ndetse hakomeje gufatwa ingamba nshya  zigamije gukumira ikwirakwizwa ryacyo, harimo no kwirinda ingendo zitari ngombwa no kwirinda kujya ahantu hahurira abantu benshi kandi hafunganye.

Guhera kuri uyu wa Gatanu tariki ya 2 Mata 2021 hatangiye igikorwa cyo gutanga doze ya kabiri y’urukingo rwa COVID-19 ikazageza ku ya 21 Mata.  Minisiteri y’Ubuzima ivuga ko gukingira abari mu byiciro byibasiwe kurusha ibindi bizakomeza mu Gihugu hose uko u Rwanda ruzagenda rwakira ibindi byiciro by’inkingo.

Gukingirwa byatangiye nyuma y’iminsi ibiri gusa u Rwanda rwakiriye icyiciro cya mbere cy’inkingo rwemerewe muri gahunda ya COVAX mu ntangiriro za Werurwe 2021.

Kuri ubu haracyubahirizwa amabwiriza yashyiriweho kwirinda. Ingendo hagati y’Umujyi wa Kigali n’Intara, ndetse no hagati y’Uturere dutandukanye tw’igihugu zirakomorewe. Ingendo zo kujya no kuva mu Turere twa Bugesera, Nyanza na Gisagara zarasubukuwe ndetse n’ibikorwa byose byemerewe gukomeza bizajya bifunga saa mbili z’ijoro (8:00).

Ingendo zirabujijwe guhera saa tatu z’ijoro (9:00 PM) kugeza saa kumi za mu gitondo (4:00 am) mu gihugu uretse   mu Turere tw’Intara y’Amajyepfo twa Ruhango, Nyanza, Huye, Gisagara, Nyaruguru na Nyamagabe zibujijwe guhera saa moya z’ijoro (7:00) kugeza saa kumi za mugitondo (4:00).

Mu gihe u Rwanda rutaragera ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n’isabune cyangwa alukolo yabugenewe.

Imibare itangazwa kuri Afurika igaragaza ko abamaze gutahurwaho icyorezo cya COVID-19 ku mugabane basaga miliyoni 4.2 barimo miliyoni 3,7 z’abamaze gukira, n’abarenga ibihumbi 113 bamaze kwamburwa ubuzima na cyo.

Ku Isi, abamaze kwandura muri rusange bararenga miliyoni 130 barimo miliyoni 105 z’abakize ndetse na miliyoni 2.8 z’abantu bamaze kubura ubuzima kubera icyo cyorezo.

 

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.