22°C , Partly cloudy | Kigali-Rwanda

Abamaze gutahurwaho COVID-19 mu Rwanda barenze 2,000

Yanditswe na Imvaho Nshya

Ku ya 31-07-2020 saa 21:20:49

Kuri uyu wa Gatanu tariki ya 31 Nyakanga 2020, Minisiteri y’Ubuzima yatangaje ko habonetse abarwayi bashya 28 b’icyorezo cya Koronavirusi (COVID-19), mu bipimo 3,374  byafashwe mu masaha 24 ashize, hataha abantu 21 bakize neza.

Umubare w’abamaze abamaze gutahurwaho icyo cyorezo mu Rwanda wageze ku 2,022, barimo abamaze gukira bagera ku 1,106 na 911 bakirimo kwitabwaho n’abaganga. Iki cyorezo kikaba kimaze gutwara ubuzima bw’abarwayi batanu mu Rwanda.

Abo bose batahuwe mu bipimo 263,399 bimaze gufatwa kuva umurwayi wa mbere yatahurwa mu Rwanda.

Abarwayi bashya batahuwe mu bapimwe mu midugudu iri mu kato yo muri Nyamasheke: 8, abapimwe mu bibasiwe kurusha abandi bo muri Rusizi: 8 na  Kigali: 7, abo muri Ngoma: 4, na Rulindo: 1. Bose bahise bashyirwa mu kato aho bakomeje kwitabwaho n’Abanyarwanda.

Igikorwa cyo gupima abantu mu buryo bwa rusange mu Gihugu kirakomeje, ndetse imidugudu y’Akarere ka Nyamasheke n’iy’aka Nyamagabe ikomeje gahunda ya Guma Mu Rugo kimwe n’imwe mu mirenge y’Akarere ka Rusizi n’imidugudu yo muri Kigali.

Umudugudu wa Kamabuye na Zuba yo mu Kagari ka Nyarurama, n’uwa Nyenyeri wo mu Kagari ka Bwerankoli mu Karere ka Kicukiro, yakuwe muri Gahunda ya Guma Mu Rugo , mu gihe Imidugudu itatu yo mu Kagari ka Tetero ikomeje kuguma kuba mu kato kimwe n’amasibo atatu yo mu Mudugudu wa Kabutare, mu Kagari ka Bwerankoli Umurenge wa Kigarama muri Kicukiro.

Mu tundi turere, ingendo zihuza Intara  n’Umujyi wa Kigali n’ibikorwa bitandukanye by’ubuzima busanzwe birakomeje.

Kuri ubu ubishatse wese arimo gupimwa COVID-19, akamenya uko ahagaze ndetse yasangwa ari muzima agahabwa ikemezo kemeza ko ari muzima.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 barenga ibihumbi  910 barimo abarenga ibihumbi 558 bakize n’abandi barenga ibihumbi 19 bahitanywe na cyo. Abamaze kwandura ku Isi bararenga miriyoni 17.7, barimo abakize barenga miriyoni 11 n’abapfuye barenga ibihumbi 681.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.