20°C , Mostly clear | Kigali-Rwanda
Abakozi ba SGF ubwo bunamiraga abazize Jenoside bashyinguye mu Rwibutso rwa Jenoside rwa Nyabihu

Abakozi ba SGF bunamiye abashyinguye mu rwibutso rwa Jenoside rwa Nyabihu

Yanditswe na Sezibera Anselme

Ku ya 11-06-2019 saa 15:40:06

Abakozi b’Ikigega kihariye k’Ingoboka (SGF) basuye Urwibutso rwa Jenoside rwa Nyabihu bunamira abazize Jenoside bashyinguye muri uru Rwibutso ndetse batanga n’inkunga yo gukomeza kwita kuri urwo rwibutso, banaremera abarokotse Jenoside batishoboye bo muri ako karere.

Urwibutso rwa Nyabihu rushyinguyemo imibiri 2.190, abenshi muri bo bakaba barishwe mu gihe k’ibyitso, kuko guhera mu 1990, Abatutsi batangiye gutotezwa no kwicwa.

Ibyo bikaba byaratizwaga umurindi n’ibigo 2 bya gisirikare byabaga muri ako gace, hakaba hanavuka benshi mu bayobozi bateguye bakanashyira mu bikorwa Jenoside yakorewe Abatutsi harimo nk’uwari Perezida Habyarimana Yuvenali, Bagosora, Mpiranya, Kajerijeri n’abandi.

Umuyobozi Mukuru wa SGF Dr Nzabonikuza Joseph yashimye uburyo urwo rwibutso rwitaweho n’isuku ihagaragara, asobanura ko SGF yasuye urwo rwibutso mu rwego rwa gahunda icyo kigo kihaye yo kujya basura Inzibutso za Jenoside.

Ati: “Uretse gusura inzibutso, hakaba hanagenwa inkunga yo gushyigikira Abacitse ku icumu rya Jenoside yakorewe Abatutsi, mu rwego rwo kubagaragariza urukundo”.

Asaba ko inkunga y’amafaranga angana na miriyoni ebyiri (2,000,0000) agenewe koroza Abacitse ku icumu rya Jenosize batishoboye, inka zizagurwamo zikwiye gufatwa neza, kugira ngo zizororoke zigere no ku bandi.

Uhagarariye Umuryango Ibuka mu karere ka Nyabihu Juru Anastase ashima igikorwa cy’urukundo no kuzirikana no kwibuka no guha icyubahiro abazize Jenoside yakorewe Abatutsi cyakozwe n’abakorera ikigo SGF.

Gahire Innocent Umunyamabanga Nshingwabikorwa w’Akagari ka Rugeshi mu murenge wa Mukamira ahamya ko igikorwa cyakozwe na SGF ari icy’urukundo n’ubwitange bagaragarije Abacitse ku icumu rya Jenoside b’i Nyabihu.

Asobanura ko ari igikorwa kibagarurira ikizere n’imbaraga kuko bituma bumva ko hari abantu babitayeho kandi babashyigikiye.

Aba bayobozi bombi bijeje SGF ko inka baremeye abaturage bayoboye zizafatwa neza, kuko zije gushyigikira gahunda ya Girinka. Juru ati: “Zizakurikiranwa ndetse mu gihe zizabyara baziturire bagenzi babo batarabasha kugerwaho n’iyo gahunda ibafasha kwikura mu bukene”.

Mu karere ka Nyabihu hakaba habarurwa abagera ku 7 645 bazize Jenoside yakorewe Abatutsi. Uretse 2190 bashyinguye kuri uru rwibutso rwasuwe na SGF, indi mibiri ishyinguye mu zindi nzibutso, n’ubwo hari benshi batabashije kuboneka ngo bashyingurwe mu cyubahiro harimo bamwe bajugunywe mu buvumo burebure buri muri ako karere byananiranye kubavanamo nk’uko byemezwa n’uhagarariye Ibuka, unasaba ubufatanye n’izindi nzego kugira ngo iyo mibiri izabashe gushyingurwa mu cyubahiro.

TANGA IGITEKEREZO

Leave a Reply

Your email address will not be published. Required fields are marked *