19°C , Partly cloudy | Kigali-Rwanda

Abakozi ba Kaminuza ya UNIK bamaze amezi 8 badahembwa

Yanditswe na Nshimyumukiza Janvier Popote

Ku ya 25-05-2019 saa 13:27:26
Aha bagiye gutera ibiti, uwambaye umweru ni Prof Egide Karuranga, Umuyobozi (Vice-Chancellor) wa Kaminuza ya UNIK

Ubuyobozi bwa Kaminuza ya Kibungo (UNIK) ifite icyicaro mu Karere ka Ngoma, burahamya ko mu kwezi gutaha kwa Gatandatu buzahemba abakozi bamaze amezi 8 badahembwa.

Umuyobozi (Vice-Chancellor) wa UNIK, Prof Karuranga Gahima Egide, avuga ko kunanirwa guhemba abakozi byatewe n’ibibazo by’amikoro kaminuza imazemo imyaka myinshi.

Ntiyasobanuye aho amikoro yo guhemba abakozi muri uku kwezi kwa Gatandatu azava, ariko avuga ko ikibazo cy’abakozi badahembwa ubuyobozi bwa kaminuza bugihoza ku mutima.

Ku rundi ruhande ariko, Prof Karuranga avuga ko abakozi bazahembwa 75% by’imishahara yabo, aho basabwa kuguriza kaminuza 25% ya buri mushahara mu gihe cy’umwaka umwe.

Ibirarane by’amezi ashize badahembwa byo, Prof Karuranga avuga ko bizaba bishyizwe ku ruhande, abakozi bakazabyishyurirwa rimwe n’iyo nguzanyo ya 25% ibibazo bihari nibishira.

Ati, “Bakwiye kutuguriza tukazabishyura ibi bibazo turimo nibimara gushira, gusa guhera muri uku kwezi kwa Gatandatu baratangira guhembwa ku gihe nk’ibisanzwe.”

Prof Karuranga asaba abakozi kuguriza kaminuza kugira ngo ibone amafaranga yo gukemuza ibibazo byihutirwa biyikomereye, akizera ko umukozi ukunda kaminuza atazanga kuyiguriza.

Yabwiye Imvaho Nshya ko abakozi bafite guhitamo kuguriza kaminuza niba koko bayikunda, utazabyemera agasezererwa kuko ngo bizaba bigaragaza ko atayikunda.

Abakozi baganiriye n’Imvaho Nshya batishimiye uyu mwanzuro, bavuga ko kubategeka kuguriza kaminuza bisa no kubaryoza ibihombo kaminuza ifite nk’aho ari bo babiteje.

Bavuga ko kuwa 1 Gicurasi 2019 ari bwo Umuyobozi wa Kaminuza Prof Karuranga yakoresheje inama, asaba abakozi kuguriza kaminuza, bamwe barabyemera, abandi n’ubu ntibarasinya.

Abaherutse gusezererwa bajyanye kaminuza mu nkiko

Mu rwego rwo kugabanya amafaranga kaminuza isohora hagamijwe guhangana n’ibibazo by’imyenda iyiremereye, muri Werurwe 2019 ngo hasezerewe abakozi 32.

Aba bakozi basezerewe batishyuwe ibirarane by’imishahara kuko baherukaga umushahara wa Nzeli 2019, bavuga ko birukanwe hatisunzwe amategeko, bajya kurega kaminuza mu Rukiko Rwisumbuye rwa Ngoma. Urubanza rwabo ntiruratangira kuburanishwa.

Bamwe muri bo twavuganye, basobanura ko mbere yo gusezererwa bagombaga nibura kubanza guhembwa ibirarane by’imishahara bafitiwe ndetse bagahabwa imperekeza.

Bavuga ko kumara amezi menshi badahembwa byabagizeho ingaruka zikomeye kuko bamwe bari bafite inguzanyo za banki, bituma banki zibatereza cyamunara kubera kubura ubwishyu.

Imiterere y’ibibazo byugarije UNIK

Raporo y’ubugenzuzi bw’imikoreshereze y’umutungo (External Audit) y’umwaka ushize wa 2018, yakozwe n’ikigo cyitwa Baker Tilly Meralis CPA Limited yagaragaje ikinyuranyo kinini hagati y’amafaranga kaminuza yinjiza (income) n’ayo isohora (expenditure).

Amafaranga yinjiye muri uwo mwaka avuye mu bikorwa biyinjiriza birimo amafaranga y’ishuri (school fees), ubujyanama, ubushakashatsi n’imishinga (consultancy, research and project fees), ishoramari n’ibindi byinjiriza kaminuza, igiteranyo cyayo ni 920.309.607Rwf, mu gihe umwaka wabanje wa 2017 hari hinjiye 1.298.803.383Rwf. Bisobanuye ko habayeho igabanuka rya 378.493.776Rwf.

Amafaranga iyi kaminuza yinjije muri icyo gihe ni make cyane ugereranyije n’ayo yasohoye angana na 2.046.744.717Rwf mu mwaka wa 2018, mu gihe mu mwaka wa 2017 hari hasohotse 1.555.442.552Rwf. Bisobanuye ko ayo yasohoye (expenditure) yiyongereyeho 491.302.165Rwf.

Mu yandi magambo, kaminuza yasohoye amafaranga menshi ugereranyije n’ayo yinjije (deficit), aho mu mwaka wa 2018 habayeho icyuho cy’amafaranga asaga miliyari imwe na miliyoni ijana (1.126.455.110Rwf), mu gihe mu mwaka wabanje harimo icyuho cya 256.639.169Rwf. Bisobanuye ko icyo cyuho (deficit) cyiyongereyeho hafi miliyari (896.515.491Rwf) mu gihe cy’umwaka umwe.

Iryo zamuka ry’ikinyuranyo hagati y’ayinjiye n’ayasohotse, gifatwa nk’ikibazo gikomeye ku bakozi ba kaminuza bavuga ko byatewe n’imyenda kaminuza yafashe mu mabanki atandukanye (BPR na Equity Bank) igashorwa mu bikorwa by’ubuhinzi kaminuza ikora bitunguka.

Ku rundi ruhande ariko ubuyobozi bwa kaminuza bwo buvuga ko iyo myenda yashowe mu bikorwa bifitiye umumaro munini kaminuza ndetse n’igihugu muri rusange mu bijyanye n’iterambere ry’ubuhinzi, bukavuga ko n’ikimenyimenyi ubwo buhinzi kaminuza ikora bushyigikiwe n’ibigo by’igihugu bishinzwe iterambere ry’ubuhinzi RAB na NAEB.

Umwe mu bakozi basaba Leta kwinjira muri iki kibazo, uri mu nzego z’ubuyobozi bwa kaminuza (twamuhimbye izina rya Kamanzi kuko yasabye ko amazina ye nyakuri atatangazwa), yasobanuriye Imvaho Nshya aho abona ipfundo ry’ibibazo bituma abakozi badahembwa.

Ati, “Byagiye bituruka ku micungire mibi y’amafaranga yabaga ahari, ni ukuvuga ngo ikigo cyagiye mu yindi mishinga itunguka, hari amafaranga menshi yashowe mu mishinga y’ubuhinzi arahomba. Ubundi navuga ko amafaranga kaminuza yinjiza hafi ya yose aturuka mu banyeshuri, rero iyo bishyuye ntuhite wishyura abakozi ahubwo ugakora ishoramari mu bindi, byagerayo na byo bigashya, ubwo nyine mwese murihanagura, ugasanga ni yo mpamvu y’ibirarane by’imishahara badufitiye.”

Kamanzi avuga ko hatagize igikorwa ikibazo gihari cyakomeza kwiyongera ndetse bikagera aho kaminuza inanirwa gukomeza gukora, kuko imaze gufata amadeni menshi itabasha kwishyura.

Ati, “Ibi bintu by’ubuhinzi, amapepiniyeri, byakozwe na miliyoni nyinshi kuko ni ibintu bihoraho, kandi twarahombye, byarapfuye, dufata inguzanyo mu mabanki hirya no hino, ayo mabanki kuri ubu yamaze kudushyira muri negative (twananiwe kwishyura), suppliers (abatugemurira ibintu bitandukanye) tubafitiye amamiliyoni menshi na bo barimo kurega kuko twananiwe kubishyura.”

Ubuyobozi bwa Kaminuza bubivugaho iki?

Iyo uganiriye n’umuyobozi w’iyi kaminuza, Prof Karuranga Gahima Egide, akubwira ko kaminuza ayiganisha aheza mu gihe cy’umwaka umwe n’igice amaze ayiyobora.

Umushinga wo kubangurira ibigori n’ubuhinzi bw’imbuto zitandukanye kaminuza ikora, awitezeho byinshi byiza nubwo hari abawufata nk’ipfundo ry’ibibazo byo kudahembwa kw’abakozi.

Mu kiganiro yahaye Imvaho Nshya, yatangiye asobanura ko ibibazo bihari atari we wabizanye ndetse ko yaje abisanga, ubu akaba arajwe ishinga no kubishakira umuti kandi urambye.

Ati, “Iki kigo kimaze iminsi gihomba kuva 2014, noneho kigera ubwo gihomba amafaranga kitakibasha kugaruza, 2014 cyarahombye, 2015 cyarahombye, 2016 cyarahombye, 2017 cyarahombye, 2018 cyarahombye.”

Avuga ko abayoboye iyi kaminuza mbere ye, bananiwe kuyishyira ku murongo, agashimangira ariko ko ibibazo ifite atari umwihariko wa UNIK, ahubwo ari icyita rusange kuri kaminuza n’amashuri makuru hafi ya yose.

Ati, “Mu mashuri yose mu Rwanda hari ikibazo cyo kutabasha guhuza umubare w’abanyeshuri, amafaranga binjiza n’umusaruro w’abakozi, kaminuza zabishoboye ni nke, nka UTAB y’i Byumba, ULK na Kabgayi.”

Mu bibazo bikomereye amashuri makuru na kaminuza, agaruka ku kugabanuka kw’umubare w’abanyeshuri, ati, “Umuyobozi wese yakagombye kureba akavuga ati amafaranga ninjiza n’akazi abantu bankorera birakwiye? Icya kabiri ireme ry’uburezi ko ryapfuye ni iki twakora ngo umwarimu atange umusaruro?”

Abajijwe impamvu abarimu be badatanga umusaruro uko bikwiye ndetse ireme ry’uburezi batanga rikaba rikemangwa kubera kudahembwa, yavuze ko ikibazo cyo gihari, ariko ko gusezerera abakozi badatanga umusaruro ari imwe mu nzira yo kugikemura.

Ati, “Ibibazo twebwe ntabwo tubihunga, turavuga ngo niba ULK yarabikoze bigakunda, Byumba barabikoze bigakunda, kuki Kibungo (UNIK) batabikora? Kuki Kibungo bakererewe? Ubu rero uretse gukererwa twarabikoze, ariko iyo ubikoze amategeko agenga umurimo mu Rwanda arubahirizwa, kugabanya abakozi kubera ubukungu amategeko arabyemera rwose, icyo wirinda ni ukugira umuntu urenganya.”

Mu kugabanya abakozi muri Werurwe 2019, Prof Karuranga avuga ko harebwe ku bintu by’ingenzi birimo umusaruro umukozi atanga (performance), qualification (impamyabumenyi ), uburambe mu kazi n’ibindi.

Ku kijyanye n’umusaruro umukozi atanga, Prof Karuranga avuga ko hasezerewe abakozi byagaragaraga ko badashoboye, ati, “Hari abo warebaga ugasanga umuntu amaze amezi ane ataza ku kazi, uwo nguwo na we ajya mu itangazamakuru akivugira, ugasanga umuntu arigisha 20% by’amasaha yakabaye yigisha kandi agahembwa umushahara 100%. Niba umwarimu akwiye kwigisha modules 12 ku mwaka ugasanga arigisha 3 kandi agahembwa 100%, ibyo ngibyo biri muri ‘system y’uburezi mu Rwanda hose.”

Uyu mugabo avuga ko mbere yo kuza kuyobora UNIK yabaye umwarimu wa kaminuza mu gihe cy’imyaka 18 muri Leta zunze Ubumwe z’Amerika, bityo akaba ashaka gushyira UNIK ku rwego mpuzamahanga.

Ati, “Ku Isi yose haba muri Amerika, haba mu Rwanda barakubwira ngo umwarimu hari ibintu 3 bamushakaho: kwigisha, ubushakashatsi na community involvement (kugira uruhare mu bikorwa biteza imbere abaturage). Community involvement ifite amasaha yayo, barakubwira bati 30% cyangwa 40% agomba kuyakora muri ibyo bintu, ugasanga abarimu bacu bari muri community involvement, barahari koko, hari abari muri njyanama z’uturere twabo, muri nyobozi runaka, hari abantu rwose bajya hanze bagahagarara mu bintu bifitiye akamaro abaturage, ibyo ngibyo tubiha amanota, ugasanga umuntu hano afite zeru.

Bakakubwira bati dufite amasaha 500 ya research (ubushakashatsi) tubahembera, tugasubira inyuma nk’imyaka itanu ugasanga mwarimu muzima nta bushakashatsi na bumwe yakoze!”

Prof Karuranga avuga ko hari ibintu byinshi bikwiye gushyirwa ku murongo, bimwe bigasabwa ko abakozi batabihagazemo neza birukanwa, birimo gusanga nka mwarimu yigisha amasaha 200 cyangwa 300 mu mwaka mu gihe yakabaye yigisha 580, ati, “Bene abo baraza bakihisha mu kigo imyaka 10 igashira, bahembwa imishahara yose kandi badakora.”

Ibyo bibazo, Prof Karuranga avuga ko ari byo byateje igihombo muri Kaminuza ya UNIK, ariko ubu ngo arimo kubishakira igisubizo kirambye afatanyije na Komite Nyobozi (Board of Directors) ya Kaminuza iyobowe na Nkusi Juvenal wahoze akuriye Komisiyo y’Inteko Ishinga Amategeko ishinzwe gukurikirana imikoreshereze y’umutungo wa Leta (PAC).

Ati, “Twagize inama tubona board nziza, ubu turavuga ururimi rumwe, twakoze audit (igenzura) dusanga tugomba gutandukana n’abakozi badakora, turabibasobanurira turatandukana, birumvikana iyo umuntu yirukanwe agenda yigira nk’umumarayika.”

“Abandi twirukanye ni abaforoderi”

Prof Karuranga avuga ko mu bakozi 32 Kaminuza ya UNIK iherutse kwirukana harimo abakozi batatu yita abaforoderi bari bafite impamyabumenyi bavuga ko bakuye hanze, ariko wakurikirana kaminuza bavuga ko bazikuyemo ugasanga zitabaho.

Ati, “Hari abari bafite fake degrees (impamyabumenyi mpimbano). Umuntu akaza ngo njye mfite PhD (Impamyabumenyi y’Ikirenga) nakuye muri Kaminuza ya Rockville yo muri Amerika! Njye nabaye muri Amerika imyaka 18 nigisha muri kaminuza zitandukanye, iyo kaminuza nta yibaho. Akakubwira kaminuza runaka y’i New York, ukajya no ku rutonde rwa kaminuza rwa UNESCO ukayibura, wajya no kuri interineti washyiramo iryo zina ugasanga ni abantu b’aba escrocs (abatekamutwe) bashakisha.”

“Abatureze mu nkiko nta mpungenge baduteye”

Prof Karuranga avuga ko ikibazo kaminuza ishyize imbere ari ukuzamura umusaruro w’abakozi, naho abagiye mu nkiko bo yizera ko bazatsindwa kuko ngo birukanwe mu buryo bwubahirije amategeko.

Ati, “Ikibazo twari dufite ni icy’umusaruro w’abakozi, ni icy’ireme ry’uburezi, ni icy’abaforoderi, abashaka kurega bo ni uburenganzira bwabo. Iby’imperekeza byo, dukurikije ibihombo badusizemo, dushobora kutabyishyura uyu munsi nimugoroba ariko tuzabyishyura nta kibazo, ntabwo twebwe duhunga izo nshingano.”

Kuki abakozi bategekwa kuguriza kaminuza?

Umuyobozi wa Kaminuza ya UNIK asobanura ko gufasha kaminuza kuva mu bibazo bikwiye kutaba inshingano y’ubuyobozi gusa, ahubwo n’abakozi bakwiye kwitanga niba koko bayikunda.

Avuga ko bamwe mu bakozi bamaze kwemera kuguriza kaminuza 25% by’imishahara yabo, ndetse bemeranya ko ibirarane by’imishahara bafitiwe bazabyishyurwa nyuma kaminuza imaze kuva mu bihombo irimo. Asaba abakozi batarasinya ayo masezerano gutera ikirenge mu cya bagenzi babo basinye.

Ati, “Abasigaye twakoze inama twumvikana ko kugira ngo turokore ikigo cyacu, kaminuza dukunda, twakoze amasezerano avuga ko amezi tutahembwe tuyabitse ku ruhande, tugiye gutangira guhembwa muri kuno kwezi kugiye gutangira (kwa Gatandatu), ariko tukaniyemeza kuguriza ikigo 25%, ntabwo ari ukuyabakata ni ukuyatuguriza tukayabika, ikigo kikabasha kuyakoresha indi mirimo yihutirwa, ariko kikazayadusubiza kimwe n’ibyo birarane ibibazo nibimara gushira, ni ukuvuva ngo udashaka gusinya ayo masezerano ntashaka kugumana natwe, akwiye kugenda, ariko twe nta muntu watubuza kurokora iyi kaminuza kuko twe turayikunda.”

Abajijwe impamvu udashaka kuguriza kaminuza ateganyirizwa gusezererwa ku kazi, yasubije atya, “Gusinya aya masezerano no kutayasinya ni uburenganzira bw’umuntu, gusa umuti wa mbere ni ukureba umusaruro, umuti wa kabiri ni ugufasha ikigo kuva mu bibazo kirimo, umukoresha we icyo agomba kureba ni ugukorera mu mucyo, ariko akareba icyo ashaka, niba umukozi ashaka kugumana natwe tuzagumana, utabishaka turakubarira wigendere.”

“Ibibazo bihari bizaba byakemutse mu mezi 12”

Prof Karuranga yizeza abakozi ba UNIK ko ibirarane kaminuza ibafitiye ndetse n’ariya 25% bazayishyurwa mu mezi 12 ataha, ashingiye ku buhinzi kaminuza ishoramo imari yizera ko buzaba bwatangiye gutanga umusaruro.

Muri Mutarama 2019 twabagejejeho inkuru ijyanye n’ishoramari iyi kaminuza ikora mu buhinzi, aho ubuyobozi bwa kaminuza bwahamyaga ko binyujijwe mu ishami ryigisha ubuhinzi riri muri iyo kaminuza bahawe n’Akarere ka Ngoma ubutaka bungana na hegitare 40 na kaminuza yiyongereraho izindi 40 kugira ngo zibashe gutuburirwaho imbuto z’ibigori.

Icyo gihe Umuyobozi ushinzwe Igenamigambi muri iyi kaminuza, Mukarugwiza Joyce, yabwiye Imvaho Nshya ati, “Dufite hegitare zisaga 80 kaminuza yacu ituburiraho imbuto z’ibigori duhabwa na RAB, nyuma umusaruro ubonetse kuri izo hegitare utwarwa n’icyo kigo kikazifashisha mu kuzaziha abaturage hirya no hino mu gihugu mu rwego rwo gutanga imbuto”.

Aha bagiye gutera ibiti, uwambaye umweru ni Prof Egide Karuranga, Umuyobozi (Vice-Chancellor) wa Kaminuza ya UNIK

Prof Karuranga avuga ko gushora amafaranga mu buhinzi bw’ibigori n’ubutubuzi bw’imbuto atari ugupfusha amafaranga ubusa nk’uko bamwe babibona, kuko imbuto zikenewe cyane mu gihugu ndetse hakaba hari n’ikibazo kigomba guhagarara cyo gukura imbuto muri Kenya no muri Zambia.

Ati, “Niba ukurikira imyiherero y’abayobozi bakuru, ikibazo cy’imbuto gihora kigaruka, ni twe kaminuza ya mbere hamwe na INES Ruhengeli, yo ishora imari mu birayi, twe tugashora imari mu bigori, kuba tumaze imyaka 55 tubonye kaminuza ya mbere mu Rwanda ariko tukaba tutaragira abahanga bashobora gukora hybrid seeds (imbuto zibanguriye) tukaba tugomba kuzigura Zambia, Kenya n’ahandi, kaminuza ya mbere igiye kubigerageza nibayihe amahoro, twarabigerageje, byareze, twashoye muri irrigation (kuhira imyaka) kandi irrigation nzayikoresha mu myaka 50, dushaka ko imbuto tuba tuzifite mu Rwanda nk’uko H.E (Perezida Kagame) ahora abidusaba.”

Akomeza agira ati, “Twafashe amazi ya Mugesera tuyageza imusozi, twereka abantu ko ibigori dushobora kubihinga mu mpeshyi, ibya mbere birera, turubaka imiyoboro y’amazi izaramba, ejo bundi twahaye NAEB ibiti ibihumbi 72, abatunenga ko dushora amafaranga y’abanyeshuri mu buhinzi ntitumeze nka bo, dufitanye amasezerano na RAB na NAEB, ayo masezerano tuyajyana mu mabanki abyumva akaduha amafaranga, ntabwo dukora kuri minerivari z’abana.”

Amafaranga abanyeshuri bishyura ajya he?

Nubwo Prof Karuranga avuga ko amafaranga abanyeshuri bishyura adashyirwa mu ishoramari ry’ubuhinzi kaminuza ikora, Raporo y’Ubugenzuzi bw’Imikoreshereze y’Imari (External Audit) ya UNIK y’umwaka wa 2018 yerekana ko iyi kaminuza yafashe inguzanyo muri Banki y’Abaturage y’u Rwanda (BPR), kaminuza yemeranya na banki ko amafaranga abanyeshuri bishyura (school fees) azajya ashyirwa kuri konti iri muri BPR kugira ngo banki ibashe kwiyishyura.

Mu mwaka wa 2018 UNIK yafashe inguzanyo yishyurwa mu gihe kirekire (loan) ingana na 251.896.530Rwf ndetse n’inguzanyo yishyurwa mu gihe gito (overdraft) ya miliyoni 123.017.104Rwf, izo nguzanyo uziteranyije zingana na 374.913.634Rwf; zaje ziyongera ku yindi nguzanyo ya 104.984.484Rwf yafashwe mu mwaka wabanje wa 2017.

Abajijwe aho amafaranga abanyeshuri bishyura ajya niba adakoreshwa mu kwishyura inguzanyo z’ubuhinzi kaminuza yafashe muri banki, n’impamvu guhemba abakozi bidashyirwa mu byihutirwa mbere yo gushora mu buhinzi, yagize ati, “Tujye mu mibare ni bwo ubyumva: niba ufite abakozi bahembwa miliyoni 900, ukagira abanyeshuri bishyura miliyoni 400, urumva igihombo cya miliyoni 500 kitaje? Ibyo se urumva wabihungira hehe? Ubundi ishuri rigomba kugira nibura 40% y’amafaranga adaturutse muri minerivali z’abanyeshuri kuko amafaranga abana bishyura n’ireme ry’uburezi twifuza ntabwo bihuye. Icyo gihe ugomba kujya gushaka andi mafaranga aturutse mu bindi bikorwa.”

Prof Karuranga yemera ko buri mwaka kaminuza ayoboye ihomba, ariko kuri we ikibazo si uguhomba, ikibazo ni ukunanirwa kwikura mu bihombo.

Ati, “Audit (igenzura ry’umutungo) iba muri mwaka, imwe ikagaragaza igihombo cya miliyoni 400, indi ikagaragaza icya miliyoni 500, ikibazo ariko si ibihombo, ikibazo ni ukutabasha kubivamo, kutagira icyerekezo, cyangwa kubyitirira Lwakabamba, ntabwo ari we, Lwakambamba yasanze ibihombo, byatangiye kera, ariko ikibazo ni, ese hari icyerekezo cyo gukosora amakosa yabaye?”

Ishoramari rikorwa mu buhinzi, igitekerezo cyaryo cyatangijwe ku gihe cya Prof Silas Lwakabamba wayoboye iyi kaminuza kugeza ubwo yasezeraga muri Nzeli 2017, asimburwa na Prof Karuranga wahise atangira gushyira mu bikorwa icyo gitekerezo.

Aha ni mu gikorwa cyo gutera imbuto y’ibigori mu murima uhingwa na Kaminuza ya UNIK mu Karere ka Ngoma

Intara yizeye ko ibibazo bihari bizakemurwa

Mu gukurikirana iyi nkuru, twavuganye na Guverineri Fred Mufulukye uyobora Intara y’Iburasirazuba iyi kaminuza ikoreramo, atubwira ko yakoranye inama n’ubuyobozi bwayo bukamugaragariza ko buri mu nzira zo gukemura ibyo bibazo.

Mufulukye ahuza n’izindi mpande zivuga ko ibibazo kaminuza irimo bishingiye ku nguzanyo zifatwa hakabura ubwishyu, ndetse no kugira abakozi benshi kaminuza itabasha kwitaho.

Yabwiye Imvaho Nshya ati, “Ibibazo by’iyo kaminuza ntabwo bitangiye uyu munsi, ni ibibazo bya kera, ngira ngo unakurikiye umuyobozi wayiyoboraga igihe yasezeraga (Prof Lwakabamba) ibyo bibazo byari bihari, bafite ibibazo by’amadeni, akenshi wasangaga depenses (amafaranga basohora) zabo ni nyinshi cyane kuruta amafaranga binjiza. Ibyo rero bafite board (Inama y’Ubutegetsi), twarahuye tubiganiraho na bo batwereka ko ikibazo bakibona, batubwira uburyo bumva bwo kugikemura, ko bikwiriye kujyana no kugabanya abakozi.”

Yunzemo ati, “Ntabwo bakwiriye kugira abakozi benshi cyane barenza umusaruro, wasangaga batarashyize mu gaciro ubushobozi bwa kaminuza bwo kwishyura bariya bakozi, babonaga ari benshi cyane, habayeho rero ayo makosa, sinzi ukuntu babikoze, bagira abakozi benshi cyane badafite ubushobozi bwo kubahemba, kuba bafata ingamba zo kubagabanya bagasigarana abakozi ba ngombwa, bashobora kwigisha abarimu bagahembwa, birumvikana.”

Guverineri Mufulukye yizera ko umuyobozi wa kaminuza nakorana neza n’Inama y’Ubutegetsi nshya iriho, ibibazo bizakemurwa ndetse hakirindwa kongera gukora amakosa nk’ayakozwe mbere.

Ibyo kuba bamwe mu bakozi binubira basabwa kuguriza kaminuza 25% by’umushahara wabo, utabyemera agasezererwa, Guverineri Mufulukye avuga ko nta kibazo abibonamo mu gihe bikozwe hagamijwe gukura kaminuza mu bibazo irimo.

Ati, “Ibyo kubagabanyiriza amafaranga na byo ntacyo bitwaye, ariko icyo dushaka ni uko umukozi ahitamo, niba yumva yagabanyirizwa amafaranga akahaguma ibyo byaba biri ku guhitamo kwe, yaba yumva atari ngombwa ubwo yahitamo kujya ahandi kuko ni kaminuza yigenga ariko igomba no gukora, twese turifuza ko ikora, igakora neza kandi igakora idafite ayo madeni.”

Nk’umuntu wakurikiranye imiterere y’ibibazo biri muri kaminuza ndetse ikaba ari kaminuza yigenga y’abaturage ikorera mu ntara ayoboye, Mufulukye yabajijwe niba abona ishoramari kaminuza ikora mu buhinzi riri mu nyungu za kaminuza cyangwa niba rifite uruhare mu bibazo bihari, avuga ko ari ikibazo gikeneye ubucukumbuzi.

Ati, “Ibyo ngibyo birimo biracukumburwa, ni na yo mpamvu nakubwiye ko hariho ubushobozi bushya, ba Nkusi Juvenal, barimo n’abandi bayobozi, abo ngabo ni bashya, barimo barabicukumbura, barabishakira ibisubizo, ndumva bakwihangana ibyo bibazo bigacukumburwa neza.”

Ireme ry’uburezi

Ireme ry’uburezi muri UNIK ryabangamiwe no kudahembwa kw’abakozi, aho bavuga ko mwarimu yigisha iyo yaramutse neza kuko nta wamushyiraho igitsure atamuhembye.

Umwarimu uri kuri gahunda yo kwigisha ngo ahabwa amafaranga ibihumbi 10 yo kwifashisha agomba kumara icyumweru, ariko abakozi bakavuga ko atavamo na lisansi y’imodoka.

Ayo mafaranga bayahabwa nka avanse ku mishahara yabo, bisobanuye ko umukozi ahabwa ibihumbi 40 ku kwezi afatwa na bamwe nk’igitonyanga mu nyanja bagendeye ku makene bafite.

Umwe muri bo yagize ati, “Abana babaye disappointed (batakaje icyizere) kuko umwarimu nta kuntu yajya kwigisha neza amaze ayo mezi yose adahembwa, ni yo mpamvu usanga abanyeshuri bagenda, hasigaye bakeya. Gusa bake basigaye barishyura, sinzi impamvu ayo bishyura batabanza kuduhemba ahubwo ugasanga ngo barashora imari mu bindi bitunguka.”

Mu mwaka wa 2014 iyi kaminuza yari ifite abanyeshuri babarirwa muri 4.400, ariko uyu mwaka hasigaye abanyeshuri 1.200 nk’uko umuyobozi wayo yabibwiye Imvaho Nshya.

Iyo uganiriye n’abarimu, bakubwira ko kuba bacyigisha biterwa ahanini no kuba badafite ahandi bajya, abandi bakakubwira ko babiterwa n’urukundo rw’akazi no kwanga gutererana abanyeshuri.

Hari uwagize ati, “Nk’umuntu w’umurezi wabyigiye, w’umunyamwuga, ureba gufata umunyeshuri ukamujugunya ukavuga uti reka nkorere Imana, ukavuga uti ntabwo nkorera Isi gusa, Isi ntabwo ari iyacu.”

Yunzemo ati, “Cyakoze abasigaye ni inyangamugayo, ni abarimo gutanga umusanzu ngo Imana izabiduhembere kuko nta wuduhagaze hejuru. Umuntu yaguhagarara hejuru se ataguhemba? Rwose abantu barimo ni abantu bari mu gukorera Imana, uwemeye kwigisha arigisha byo nta kibazo, ariko ushobora kugenda ugasanga faculty yose, department irimo umwarimu umwe cyangwa babiri, abandi banyeshuri babuze abarimu kuko bamwe barabirukanye.”

HEC igiye kwinjira muri iki kibazo

Inama y’Igihugu y’Amashuri Makuru na za Kaminuza (HEC) iravuga ko iki kibazo itari ikizi, ariko ko aho ikimenyeye igiye kugicukumbura mu rwego rwo kukivugutira umuti urambye.

Twashatse Umuyobozi Nshingwabikorwa wa HEC, Dr Muvunyi Emmanuel ntitwamubona, ariko tubona umujyanama we, Dr Hakizimana Venant, atubwira ko iki kibazo kitari kizwi.

Dr Hakizimana yabwiye Imvaho Nshya “Ntitwari tubizi, ariko icyumvikana ni uko bifite ingaruka ku ireme ry’uburezi. Icyo kibazo tugiye kugikurikirana rwose.”

Dr Hakizimana avuga ko nta mpamvu ikwiye gutuma umunyeshuri atigishwa cyangwa ngo yigishwe nabi kandi yarishyuye amafaranga y’ishuri, avuga ko ibyo bidashobora kwihanganirwa.

Avuga ku rundi ruhande ariko ko n’izina kaminuza yitwa ritemewe mu mategeko, kimwe n’andi mashuri makuru agenda yiyita kaminuza kandi amategeko atarabemerera guhindura amazina.

Ati, “Mu mategeko hemewe INATEK, izina rya UNIK sinzi aho mwarikuye. Nimwandika n’inkuru mwandike INATEK. Twe ni ryo zina tuzi, ibyo bya UNIK ni kumwe ushaka guhindura izina ariko utarabyemererwa n’amategeko. Ugiye ku rubuga rwa HEC mu mazina ya kaminuza zihari ntabwo uzahasanga INATEK, ntuzahasanga Kaminuza ya Gitwe twe tuzi ISPG, ntuzahasanga UTB kuko icyo tuzi ni RTUC, ntuzahasanga UTAB kuko tuzi IPB.”

Kaminuza ya UNIK yashinzwe muri Werurwe 2013 yitwa INATEK, ishingwa n’abaturage bifuzaga ko icyahoze ari Perefegitura ya Kibungo kigira ishuri rikuru, bibumbiye mu cyitwa Association for the Promotion of Higher Education in Kibungo (APESK) cyaje guhindura izina cyitwa INATEK Association muri 2009.

Iyi mashini izwi nka automatic planter, ikoreshwa mu gutera ibigori mu mirima ya UNIK

Umwanditsi:

Nshimyumukiza Janvier Popote

9 Comments on “Abakozi ba Kaminuza ya UNIK bamaze amezi 8 badahembwa”

  1. Hum! nizere ko abafite impamyabumenyi z’impimbano byashyizwe mu mabaruwa abirukana kdi ko bashyikirijwe inzego zishinzwe gukurikirana icyaha cy’impapuro mpimbano!?
    Abo bakoze audit nabo nizere ko bagaragaje inzira ibitwara amafaranga bicamo n’amategeko akurikizwa. Ndetse n’isano iri hagati y’amafaranga yari ateganyijwe gukoreshwa mu ntangiriro z’umwaka niba koko yarakoze ibyo yagombaga gukora kuko ntabwo ikigo cyatangira umwaka kidafite intego y’ibyo kizakora n’aho amafaranga azava kugeza aho wavuga ngo wakoresheje abakozi utazi ayo uzabahemba azava.
    Rimwe muti kudahemba ni abanyeshuri n’ibigo bindi barimo imyenda undi munsi …

  2. Muraho,ariko iyi nkuru ushobora kuba wowe wayanditse uyo Joyce uvuga akiri kumwe na Prof Karuranga ,ibyo bihombo byose ese ninde wabiteye ????ko uwo Joyce uvuga ko basubiranyemo akavuga impamvu yibyo bihombo hhhhh,muzasubireyo muri uko kwezi yababwiye ko ibibazo bizaba byakemutse ahubwo muzasanga RRA yadadiye

  3. Ariko mbega Sha ubuyobozi bwa unik Ni hatari ,aravuga igihombo ,ubundi yavugaga abakoraga muri finance barakopaga abanyeshuri,ubundi farg niyo itarishyura niyo mpamvu abakozi badahembwa mu nkuru ibanziriza iyo Niko we ubwe yabivugiye ku ma radio ya hano iwacu ,ubundi ngo tuzayashyira ku meza miliyoni 600 tuyasangire ,icyakora azi kuvuga pe ,ubundi abagome injiji ubugoryi ,ko abo Bose bagiye hakaba hasigaye intiti kuki haba igihombo ???????????? ubundi altari ya unik igomba kubamo abagore kiretse iyo kwa Musenyiri niyo itagomba kujyamo abagore hahahahahaha,mbega

  4. Mbona umuyobozi wa Kaminuza ariwe muforoderi. Kuba abantu bakoresha impamyabushobozi zitagira aho zatangiwe bimaze iminsi ariko ntibakwiye kuzizana mu burezi. Ukoresha ibyo bipapuro bitinde bitebuke turaje! Uyu nawe ubivuga Kaminuza zamushimiye ni nyinshi. Kubera iki? imvugo itajyanye n’umusaruro. Karururanga we, kuba “Bon Speaker” ukubika umutwe ugashushanya abantu nibyo byahumye abantu amaso bakubonamo igitangaza turakuzi rwose. Reka gusebya abantu uvuga ngo nta musaruro, uwakubaza icyo umaze muri iyo Kaminuza wagisobanura ute? Buriya njye kukinyomano gushushanya abantu nagushyize kwenye “Mulolongo wa kwanza”. uzi umuntu wumva ngo Ministre araza, akajya gutira tracteurs zo kwerekana ko yakataje? uzi gutira intebe zo kwicazaho ‘abashyitsi, bamara gutaha ugatirura. Nibyinshi, ariko ndakugaya, mumuco nyarwanda ibyo ntibibaho, umushyitsi agusangana icyo ufite akaba aricyo musangira, maze ukamwicaza kuntebe yaba imvunwa cyangwa umusambi.
    Ubuforoderi bwo nibwinshi, ibitabo by’ibaruramutungo birakugaragaza, amasoko ujyamo ya kaminuza uciye mugikari ufatanyije n’abambari bawe. Iyi ni charactere imwe muzikuranga, nibidukundira tuzayiva imuzi, ariko sindagura bitinde bitebuke uzagaragara uwo uriwe, ubure Ijambo sha!

  5. Njye ndumva ibyo uyu muyobozi avuga ari ukuyobya abantu! Uwakurikiye neza imvugo ze avuga uko yagiye yisobanura impamvu Abarimu badahembwa: FARG gutinda, bwacya NAEB miliyoni 250 gutinda,miliyoni 600 mu bigori mbese abivuga ugirango ni “hypnotized”. Ese uba wanyoye ikihe kiyobyabwenge kuburyo utamenya gukora controle y’ibyarenze umunwa wawe? Mbona ukeneye abagaga, kandi aho hari impuguke zagufasha gukira, ariko nakugira inama yogutoranya muri zo iyo y’umugabo, iyo y’umugore itazakubera “Anna O” ukarya iryumutwe.

  6. Yeweeee. Ndumiwe….cyora Egide niruhwahwanya koko . Izina niryo muntu. Ese umuntu wiha kana mushikiwe bonse rimwe banasigaranye kwisi bonyine wumva yazagira umutima wakimuntu….ngo a kunda kaminuza se a rush abo yayisanzemo. Umuntu uvuye muri gereza kubera the guteka umutwe muri Canada bakamukatira 2yrs urumva yagera UNIK natwigirizeho nkana….gusa one day uzasubira muri gereza. ….video conference wariye nari ya mafumbire wasangiye na Derick. ..ibyanyu mwahinze bikera ibya UNIK bigapfa IImana cg Satani mukorera izabibaze. HE niwe uzakemurA ikibazo cya UNIK kuko we ntawamurimanganya.

  7. Izi comments zose zirimo umujinya n’amatiku bigaragara ko zanditswe n’abantu bamwe, mujye mukora isesengura ryubaka.
    Icyo natangaho igitekerezo nuko ubuyobozi bwa Kaminuza bwa cyemura ibibazo kandi bukaringaniza abakozi binyuze mu gukoresha frw ahari neza, birinda gusesagura kuko ikigo cyahombye ntigihora muri missions zidasobanutse, …mushyire hamwe mugabanye amatiku n’inzangano

Tanga Igitekerezo

Email yanyu ntigaragazwa ku rubuga. Amazina na Email ni ngombwa.