21°C , Partly sunny | Kigali-Rwanda
Gashugi Andre, Umuyobozi Mukuru w'Ikigo RNIT gifite mu nshingano ikigega Iterambere Fund, asobanurira abakozi ba RCA inyungu zo kwizigamira bigamije ishoramari (Foto Samuel M)

Abakora mu kigo cy’amakoperative basobanuriwe ibyiza byo kwizigamira

Yanditswe na MUTUNGIREHE SAMUEL

Ku ya 19-02-2018 saa 07:46:43

Bamwe mu bakozi bo mu biro n’abo mu buyobozi bw’Ikigo k’Igihugu gishinzwe guteza imbere amakoperative (RCA) basobanuriwe ibyiza by’umuco wo kwizigamira no gushora imari binyuze mu kigega RNIT Iterambere Fund, bamwe muri bo batangariza Imvaho Nshya ko iyo gahunda nziza ikwiye kugera kuri buri wese, nk’uko umuntu wese ashaka gukorana n’ibigo by’imari akanibuka kuzigama by’igihe kirekire nka bumwe mu buryo bwo gutegura ejo heza hazaza n’umuryango we.

Gashugi Andre, Umuyobozi Mukuru w’Ikigo RNIT gifite mu nshingano ikigega Iterambere Fund, asobanurira abakozi ba RCA inyungu zo kwizigamira bigamije ishoramari (Foto Samuel M)

Mu kiganiro Umuyobozi mukuru w’Ikigo k’ibigega by’ishoramari RNIT, Gashugi André yahaye abo bayobozi n’abakozi ba RCA, yasobanuye ko icyo kigega Leta yashyizeho muri Nyakanga 2016 gicunzwe neza kandi abashyizemo imigabane yabo bagira uruhare ku mafaranga yabo igihe cyose, ikirushijeho bakabona inyungu yayo uko agaciro k’umugabane kazamuka umunsi ku wundi n’uko amaramo igihe kugira ngo n’abandi banyarwanda bakomeze kumva akamaro k’umuco wo kuzigama.

Ati:“Kwizigamira ni byo bifasha abantu kugira ngo bakore ishoramari no kubaka ubukungu bwabo. Dukora mu buryo abantu bikusanyiriza hamwe noneho abantu b’inzobere bagacunga iyo migabane yabo mu buryo ibyara inyungu buri gihe.”

Bamwe mu bakozi ba RCA baganiriye n’Imvaho Nshya, bavuze ko kwizigama ari bumwe mu buryo bwo kureba kure igihe umuntu akeneye kubaho neza mu gihe kizaza.

Mbonigena Casmir yagize ati:“Iyo urebye mu murenge usanga Abanyarwanda hafi ya bose bari mu bigo by’imari, atari mu mirenge SACCO gusa ndetse no muri banki zisanzwe ndetse bikaba bifasha Abanyarwanda kwiteza imbere bigaca n’umuco wo kubika amafaranga mu ihembe kandi ubona buri wese ashaka kwiteza imbere bitewe n’uko yabitse amafaranga make make.

Nange ubwange hari icyo bimfasha, kuko iyo mbitse amafaranga make make nko mu gihe cy’umwaka hari icyo bimfasha ngatera imbere. Iyi ni politiki nziza izafasha Abanyarwanda gutera imbere kandi nihabaho gukomeza kuyicunga neza nk’uko ibindi bigo bicunzwe neza bizagira akamaro.”

Mu byifuzo bye, Mbonigena avuga ko ubukangurambaga bwakomeza kwibanda no ku rubyiruko rukunze kugaragaza ko rudafite imirimo amikoro n’abandi bumva ko kuzigama mu gihe kirekire bitinda.

Ati:“Urugero natanga nk’abantu bagiye muri gahunda ya “Igiceri Program”, batangiye batanga igiceri k’ijana cya buri munsi, iyo ukwezi gushize ayo mafaranga aba ari menshi noneho bikarushaho mu ighe cy’umwaka kandi mu by’ukuri ku munsi ayo mafaranga nta cyo ubona yakumarira nyamara mu gihe cy’umwaka usanga agize ikintu gikomeye yakumarira kigaragara, bongere imbaraga mu rubyiruko rwaba ururangije kwiga n’urutarize.”

Kayigamba Emmanuel na we ati “Kugira ngo abantu babyumve neza ni uko nk’abantu bahura n’abantu benshi, cyane nk’abayobozi mu nzego za Leta, nabo ubwabo ni uko babanza bagafata iya mbere kugira ngo iki gikorwa bakigire icyabo; niba nahembwe mbere yo kugira icyo nkora nkabanza nkavanaho ayo kuzigama bityo n’abo bajya guhugura bikabafasha kuko batanga ingero z’aho byabagejeje.”

Tariki ya 16 Gashyantare 2018 umugabane umwe wari ugeze ku mafaranga y’u Rwanda 113.60 uvuye ku 100 kuva ikigega cyatangizwa.

 

 

TANGA IGITEKEREZO

Leave a Reply

Be the First to Comment!

avatar