21°C , Intermittent clouds | Kigali-Rwanda

Abakora imirimo y’amashanyarazi badafite uruhushya rwa RURA hari amahirwe abacika

Yanditswe na Tumukunde Georgine

Ku ya 25-10-2019 saa 09:45:08
Abakora imirimo y'amashanyarazi barasabwa kugira uruhushya rutangwa na RURA

Abakora imirimo ijyanye n’amashanyarazi (Installation) barakangurirwa gusaba uruhushya rutangwa n’ Urwego Ngenzuramikorere  (RURA) rubemerera gukora iyo mirimo kuko ukora atarufite hari amahirwe menshi yivutsa.

Mutware Alexis, Umuyobozi ushinzwe  ingufu, amazi, isuku n’isukura muri RURA, yasobanuye inyungu abafite impushya babona agira ati: “Bamaze kugera kuri byinshi; binyuze mu bufatanye tugenda tugirana  n’inzego zitandukanye, birabafasha guteza imbere ubunyamwuga bwabo, barazwi, mu gihe hari amahugurwa ni bo tubwira, dukorana n’ Ikigo k’Igihugu gitsura Ubuziranenge  (RSB) kugira ngo babahugure ku bijyanye n’amabwiriza y’ubuziranenge, ayo mahirwe arimo kubacika”.

Arakangurira abatarazisaba   kwihutira kuzisaba kugira ngo bateze imbere umwuga wabo na bo biteze imbere.  Ati:  “Nabakangurira kwihutira kusizaba kugira ngo biteze imbere, kandi twese hamwe duteze imbere Igihugu dukumira inkongi n’ibindi bibazo bishobora guturuka ku mashanyarazi”.

Amabwiriza agenga ibikorwa byo gushyira amashanyarazi mu ngo no mu zindi nyubako akubiyemo ibijyanye n’impushya yashyizweho mu Kwakira 2012,  hagamijwe gukumira impanuka   zituruka ku mashanyarazi yashyizwe mu nyubako nabi,    kurinda  abantu ingaruka mbi z’amashanyarazi  mu gihe adakoreshejwe neza no kubungabunga ibikorwa remezo n’ibidukikije.

Impushya zatangiye gutangwa  mu mwaka wa 2015, kugeza ubu abamaze kuzihabwa bagera kuri  80. Mutware avuga ko ari umubare ukiri muto cyane ugereranyije n’abakora ibijyanye n’amashanyarazi, ariko hari ingamba zafashwe kugira ngo ubwitabire buzamuke.

Yagize ati: “Turimo gukorana n’abafatanyabikorwa cyane cyane Umujyi wa Kigali n’uturere kugira ngo dushyire mu bikorwa ariya mabwiriza. Mbere y’uko Umujyi wa Kigali utanga uruhushya rwo gukoresha inyubako (Occupational Permit) basaba ko umuntu ufite uruhushya rwo gukora imirimo y’amashanyarazi abanza akemeza ko Installation  zujuje ubuziranenge”.

Ikindi ni uko binyuze mu bufatanye n’ Ikigo k’Igihugu gishinzwe gutunganya Amasoko ya Leta  (RPPA),  uzajya apiganira  amasoko ya Leta ajyanye n’imirimo y’amashanyarazi azajya yerekana ruriya ruhushya, no kugira ngo  Ikigo gishinzwe Ingufu (REG) gihe umuntu amashanyarazi hazajya habanza kurebwa  niba uwakoze Installation afite uruhushya.

Ati: “Ibyo byose bizatuma abantu bitabira iyi gahunda”.

Mu  igenzura ryakozwe muri 2014 ubwo habaga inkongi  nyinshi; muri zo izigera kuri 60% zaturutse  ku mashanyarazi  yashyizwe  mu mazu mu buryo butujuje  ubuziranenge.

Uruhushya ruhabwa uwatsinze ikizamini

Mbere y’uko abakora imirimo y’amashanyarazi  bahabwa impushya habanza gusuzumwa niba bafite ubumenyi buhagije; RURA ibaha ikizamini ifatanyije n’Urugaga rw’Abenjenyeri mu Rwanda.

Mutware ati: “Ntibikuraho ko baba barabyize mu ishuri, twemerera umuntu wabyigiye,  akazi k’amashanyarazi ntabwo ari umuntu wese wagakora,  hanze aha hari abantu benshi bashobora kuba babikora, bakaba bazi ko ari ugufatanya insinga gusa kuko hari aho babibonye, icyo ni cyo kibazo gikunda kubaho  kigateza impanuka, ibyo ni byo dushaka guca hagasigaramo abantu babyigiye kandi bafite ubushobozi bwo kubikora”.

Ibyiciro by’impushya zitangwa

Mutware Alexis asobanura ko batanga impushya ziri mu byiciro (Categorie)  bitandukanye:

  • Ikiciro cya A kirebana n’inyubako zo guturamo zisanzwe,
  • Icya B ni ik’inyubako z’amagorofa ,
  • Icya C gihabwa abakora mu nyubako zikenera ingufu ziringaniye z’amashanyarazi (Moyenne tension),
  • Ikiciro cya Z kirebana n’ingufu nyinshi z’amashanyarazi  (Haute Tension),
  • Ikiciro cya D kirebana n’imirimo yihariye (special installations) nko gukoresha ingufu zituruka ku mirasire y’izuba (solar systems), gukora imirimo kuri moteri zitanga amashanyarazi (Generators).

Impushya ziri mu byiciro bitandukanye bitewe n’imirimo y’amashanyarazi

Buri kiciro gifite ikiguzi cyacyo; icya  A  ni amafaranga ibihumbi 30  ku muntu wikorera ku giti ke, Z ni amafaranga ibihumbi 800 kuko ari imirimo ikorwa na kompanyi zikomeye.

Yakomeje asobanura ko abize amashuri y’imyuga na bo bemerewe gukora imirimo y’amashanyarazi ariko  bagarukira ku kiciro cya  A. Uhabwa B bisaba ko aba yararangije kwiga iby’amashanyarazi mu mashuri yisumbuye  kuzamura.

Abakoze amashanyarazi basinyira umurimo bakoze

Urutonde rw’abafite impushya ruboneka  ku rubuga rwa “Internet”  rwa RURA (www.rura.rw) na nomero za terefoni bahamagarwaho, ni muri urwo rwego ukeneye umufasha  mu mirimo y’amashanyarazi agomba  gufata abo bizewe kuko iyo bamaze kumukorera basiga babisinyiye; bakemeza  ko ibyo bakoze byujuje ubuziranenge, haramuka habaye  ikibazo bakabibazwa.

Mutware yabisobanuye agira ati: “Mu bugenzuzi dukora iyo dusanze hari amakosa yakozwe hari ibihano biteganyijwe birimo no kwambura uruhushya uwayakoze”.

Abahawe impushya bamaze kubona agaciro ko kuzihabwa

Abahawe impushya bakora imirimo ijyanye n’amashanyarazi bamaze kubona agaciro kazo, barakangurira bagenzi babo kuzisaba kugira ngo batazasigara inyuma cyangwa se ngo babe  bava ku isoko ry’umurimo bakora.

Umwe muri bo witwa  Habyarimana Janvier  wo mu Mujyi wa Kigali, ufite uruhushya rwo mu kiciro cya C yabonye mu mwaka 2017, avuga ko mu gihe gishize arubonye hari impinduka nyinshi yabonye mu mwuga  akora.

Bitewe n’uko urufite aba yemerewe gukora amashanyarazi ndetse akanakora ubugenzuzi ahashyizwe ibikorwa remezo byayo, Habyarimana ahamya ko ari gahunda izakemura ibibazo byinshi birimo akajagari k’abakora badafite ubumenyi buhagije.

Ati: “ Abahawe impushya twemerewe ibintu bibiri; hari ugukora amashanyarazi no gukora ubugenzuzi (Inspection)  ahakozwe installation, iyo bibaye byiza umuntu akatwiyambaza agiye gutangira inyubako aho ho bihera ku bikoresho agiye kugura, tukamufasha kureba ko byujuje ibisabwa  dukurikije ibipimo duhabwa na RSB. Iyo ufite uruhushya n’umukiriya urweretse akugirira ikizere”.

Yongeyeho ati: “Mu bugenzuzi hari byinshi cyane nabonye mu bijyanye no gushyira amashanyarazi mu nyubako tutashoboraga kumenya; nasanze harimo akajagari kenshi, twagiye tunabigaragariza bagenzi bacu mu nama ko inkongi nyinshi zagiye ziba zaturutse ku mirimo yakozwe nabi”.

Arakangurira bangenzi be gukora kinyamwuga, abatarasaba ibyangombwa bakabisaba kuko harimo inyungu.  Ati: “ Nkurikije ingufu iyi gahunda ifite hari  igihe kizagera hakajya  hakora abanyamwuga gusa, babifitiye uburenganzira abandi bakava ku isoko”.

Habyarimana anagira inama abaturage kwirinda gukoresha abatabifitiye ubushobozi bitwaje ko ngo ari bo baca amafaranga make, kuko igihombo cyaturuka ku  gukora ibyo badasobanukiwe cyaza kiruta kure amafaranga banze gutanga kugira ngo bakorerwe ibifite ubuziranenge.

Asanga na  kompanyi z’ubwishingiza zikwiye kujya zishingira inyubako  zabanje kureba ko amashanyarazi yashyizwemo hakurikijwe amabwiriza.

Umwe mu baturage witwa Izabayo Aimable wo mu Murenge wa Gikondo mu  Karere ka Kicukiro yagize ati: “ Ni ingenzi kuba Leta yarashyize ingufu mu bugenzuzi, bizaca akajagari, ugira gutya wagira ikibazo cy’amashanyarazi ugafata umuntu utazi niba abizi koko yarabyigiye, kuko ngo hari uwamuboye akora itara rikaka akaba aramukurangiye nawe ukamugirira ikizere,… Ni byo usanga bikurura impanuka. Hari n’igihe azana ibikoresho byashaje akakumvisha uburyo nta kibazo byateza”.

Mugenzi we witwa Nyirarukundo Eugenie asanga hakwiye no gukorwa ubugenzuzi ku mazu yubatswe kera. Ati: “ Numva Leta ikwiye no gukangurira abantu bakagenzura inyubako zubatswe kera cyane, ubu hari aho insinga zashaje cyangwa se nyiri inzu akaba afite ibindi bikoresho yagiye yunguka acomekaho kandi bitagihuye n’ubushobozi bwazo bikaba byateza ibibazo”.

Mutware Alexis Umuyobozi ushinzwe  ingufu, amazi, isuku n’isukura muri RURA,  arasaba  abashaka gukomeza imirimo ijyanye n’amashanyarazi ariko batarabyigiye gushaka  aho bakwihugurira; haba mu mashuri y’imyuga abyigisha, ayisumbuye, ababishoboye bagakomeza muri kaminuza.

Arashishikariza abaturage bakenera serivisi zo gushyira amashanyarazi mu nyubako kujya begera ababifitiye uruhushya.

Ati: “Amashanyarazi ni meza aradufasha, ateza imbere Igihugu,  ariko iyo adakoreshejwe neza ashobora gutwara ubuzima bw’abantu cyangwa akangiza ibikorwa remezo, turashaka ko ibikorwa byose bikorwa byujuje ubuziranenge”.

Uruhushya rwo gukora imirimo y’ amashyanyarazi rutangwa na RURA rwongererwa agaciro buri myaka 3.

Umwanditsi:

Tumukunde Georgine

Tanga Igitekerezo

Email yanyu ntigaragazwa ku rubuga. Amazina na Email ni ngombwa.