Abakora imideli barasaba gushyigikirwa mu guha agaciro ibikorerwa mu Rwanda

Yanditswe na GISUBIZO Gentil M.

Ku ya 30-12-2020 saa 10:44:45
Ntawirema Celestin, Umuyobozi wa Rwanda Cultural Fashion Show, usaba ko Leta yafasha abanyamideli

Uyu mwaka wa 2020 kimwe no mu zindi nzego zinyuranye ntiwahiriye abakora n’abamurika imideli mu Rwanda, kubera icyorezo cya Covid-19 akaba ari muri urwo rwego basaba ubufasha Leta kugira ngo ibikorerwa mu Rwanda bikomeze kuba ku isonga no guhabwa agaciro.

Mu kiganiro Imvaho Nshya yagiranye na Ntawirema Celestin umwe mu baharanira icyateza imbere imideli akaba n’Umuyobozi Mukuru wa “Rwanda Cultural Fashion Show” yavuze ko Leta ikwiye gushyigikira imideli n’abayikora kuko ari rumwe mu nzego zigaragariza Isi bimwe mu bikorerwa mu Rwanda.

Ntawirema yakomeje avuga ko  bafite icyifuzo cyo gusaba Leta ko yafasha abantu  bari  mu mideli cyane ko bafite urugaga rw’abakora n’abatunganya imideli bise ” Rwanda Fashion Council” uru rukaba ari urwego ruzahuriza hamwe abagize icyitwa  “Collective.rw”, gihuriwemo na Kigali Fashion Week, Rwanda Modelsy, Meresides Benz fashion week, RCFS n’abandi.

Ati : “Ndasaba ko Leta yadufasha hagashyirwaho amategeko no gushyira abantu mu byiciro bitewe n’ibyo bize ndetse guteza imbere n’abanyempano bakora bakanamurika imideli.”

Ntawirema avuga ko usanga hagenda hafashwa abantu runaka kandi hakwiye kujyaho ingamba zihamye runaka hagafashwa abantu bibumbiye mu nama y’igihugu y’ubuhanzi hatitawe ko umwe ari uvuye hanze cyangwa uvuye mu Ntara.

Yagize ati : “Hari igihe usanga umuntu ashoboye ariko nta bushobozi afite bwo kwigaragaza ngo amenywe, ahubwo ugasanga hafashwa bamwe na bamwe kuko basanzwe barubatse amazina cyangwa se basanzwe babikora ariko batari mu gihugu imbere, icyifuzo cyanjye rero numva hakwiye gufashwa buri wese ushoboye, kwishyira hamwe kwacu byazamura Made in Rwanda bigakurura n’abanyamahanga bakaza kujya bagura ibikorwa byacu.”

Uyu munyamideli yanakomoje kandi ku gitaramo ngarukamwaka cya “Rwanda Cultural Fashion Show” cyabaye ku nshuro ya munani mu buryo butari busanzwe kuko hifashishijwe murandasi  n’itangazamakuru ritandukanye n’uko cyari gisanzwe kigenda, kubera icyorezo cya Koronavirusi.

Ati : “Uyu mwaka wa 2020 wabaye umwaka utandukanye n’iyindi cyane kubera icyorezo cya COVID-19, Hari ibikorwa twateganyaga gukora muri uyu mwaka tutakoze kuberako ahanini ibikorwa byacu byo gutegura ibitaramo byo kumurika imideli bitari byemewe , ku mpamvu zo gukumira ikwirakwizwa ry’iki cyorezo.”

Yakomeje agira ati : “Kuko abantu benshi bari basanzwe bakoresha ikoranabuhanga natwe ni ko byari bimeze , twari twaramaze kubaka urubuga rwa RCFS ku buryo abakiriya n’abakunzi b’imideli bakomeje gukorana natwe mu buryo bw’ikoranabuhanga. Hari ibintu byinshi twakoze harimo kuba twarateguye igikorwa cyo guhuriza hamwe abanyamideli baturutse mu bihugu 12, hirya no hino ku isi, hagamijwe kuganira ku ruganda ry’imideli muri Afurika.”

Igitaramo cya Rwanda Cultural Fashion Show 2020 cyasorejwe kuri televiziyo no ku mbugankorambaga kubera COVID-19

Yongeyeho ko haganiriwe ku cyakorwa ngo ibikorerwa mu Rwanda binyuze mu mideli bikomeze bitere imbere kandi mu gihe kirambye.

Yakomeje avuga ko iki gikorwa cyitabiriwe n’abantu batandukanye kandi cyagize akamaro kanini nkuko abakitabiriye babigaragaje.

Ntawirema kandi yakomeje avuga ko mu byo bishimira byagezweho harimo kuba barateguye ibiganiro byigisha kandi bisobanurira Abanyarwanda ibikorerwa mu Rwanda ndetse n’uburyo umuntu ushaka kwinjira muri ubu bucuruzi yabigenza.

Ati : “Twakoze ibiganiro bitandukanye byaciye mu bitangazamakuru byinshi bitandukanye, ibindi byakozwe harimo gusoza twerekana imideli ikorerwa mu Rwanda aho twanakoze ikiganiro cyihariye cyo kuvuga aho ibikorerwa mu Rwanda bigeze ndetse n’uruhare rwa Rwanda Cultural Fashion Show mu guteza imbere imideli y’u Rwanda.”

Divine Muziranenge yifashishijwe mu kwerekana imyambaro mu gitaramo gito cya Rwanda Cultural Show cyabereye kuri Televiziyo y’u Rwanda

Yakomeje avuga ko bagaragaje imbogamizi bafite zirimo ko umwaka urangiye badakora bivuze ko abantu benshi bahabwaga akazi barimo abamurika imideli babuze ibiraka byabagaburiraga mu gihe habaga hakozwe ibitaramo by’imurikamideli, ndetse na bo ubu bafunze ibiro mu gihe bagitegereje uko iki cyorezo kizarangira.

Yavuze ko kandi umwaka utaha bafite ibikorwa byinshi cyane birimo kwitegura inama mpuzamahanga ya CHOGM 2021  izabera mu Rwanda.

Aho bifuza kuzereka abashyitsi n’abandi bazitabira iyi nama ko umuco nyarwanda binyuze mu myambarire.

Munana Justin ubwo yatambukaga yerekana imyambaro

Ibindi bikorwa bateganya harimo gutangiza ishuri ryigisha kumurika imideli (Modelin School) ndetse n’ishuli ryigisha guhanga imideli (Fashion School).

Barateganya kandi gukomeza gutanga umusanzu wabo mu kubaka imideli nkuko bigaragara iyo urebye abahanga imideli bazwi kandi bakomeye baraciye muri iki gikorwa cya RCFS.

Uwimbabazi Moniah ushinzwe Iyamamazabikorwa muri Rwanda Cultural Fashion Show, mu myambaro yakorewe mu Rwanda

Umwanditsi:

GISUBIZO Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.