21°C , Partly sunny | Kigali-Rwanda

Abakirwaye COVID-19 mu Rwanda bageze munsi y’igihumbi

Yanditswe na Imvaho Nshya

Ku ya 22-02-2021 saa 20:39:04

Guhera mu mpera z’umwaka ushize wa 2020, hagiye hagaragara imibare idasanzwe y’abatahurwaho icyorezo cya COVID-19, inzego zisobanura ko byatewe n’ubwiyongere abakerensaga ingamba zashyiriweho gukumira ikwirakwizwa ry’icyo cyorezo cyugarije Isi yose.

Umujyi wa Kigali, byagaragaraga ko ari ho ubwandu bushya bwiganje, wasubijwe muri Gahunda ya Guma Mu Rugo yamaze iminsi 21 ndetse n’ingendo zihuza Uturere n’Umujyi wa Kigalli n’Uturere ubwatwo zirahagarikwa, amasaha y’ingendo zemewe aragabanywa.

Umusaruro w’iminsi ishize hafashwe ingamba zikomeye zo kwirinda n’ubwitange abaturage bagaragaje mu ishyirwa mu bikorwa ryazo, biragenda bigaragara mu mibare y’abandura ndetse n’abakira ku munsi, aho imibare y’abarwayi bashya yigeza kugera kuri 500 ku munsi yongeye kumanuka ikagera ku bantu 50 n’abakira bakarushaho kwiyongera.

Kuri uyu wa Mbere tariki ya 22, Minisiteri y’Ubuzima yatangaje ko abakirimo kwitabwaho n’abaganga bageze kuri 955, nyuma y’igihe kinini babarirwa hejuru y’igihumbi. Ni mu gihe abarwayi bashya batangajwe ari 146 naho abakize bakaba 189.

Uyu munsi nanone hatangajwe urupfu rw’abantu 3 bazize icyo cyorezo, bituma abamaze guhitanwa n’icyo cyorezo bagera kuri 252 bangana na 1.3% by’abacyanduye. Ababuze ubuzima ni abagabo batatu b’imyaka 85 na 77 bo mu Mujyi wa Kigali n’undi wa 43 wo muri Gicumbi.

Muri rusange abamaze gutahurwaho icyo cyorezo ni 18,199 barimo 16,992 bakize, bakaba bangana na 93.3%.

Abarwayi bashya babonetse uyu munsi barimo abo mu Mujyi wa Kigali 51, Kirehe 14, Karongi 11, Nyaruguru 10, Rulindo 9, Kayonza 9, Huye 6, Nyamagabe 5, Muhanga 5, Rwwamagana 5, Rubavu 4, Ruhango 3, Gisagara 2, Rusizi 2, Ngororero 2, Gatsibo 2, Kamonyi2, Nyanza 1, Gakenke 1, Gicumbi 1 na Rutsiro 1,

Imibare y’abamaze gutahurwaho icyo cyorezo yabonetse mu bipimo 980,705 birimo 2,655 byafashwe mu masaha 24 ashize.

Abaturarwanda barasabwa kutirara kuko icyorezo kigihari ndetse hashize igihe hafashwe ingamba nshya zigamije gukumira ikwirakwizwa ryacyo, harimo no kwirinda ingendo zitari ngombwa by’umwihariko mu Mujyi wa Kigali aho ubukana bw’icyorezo bukomeje kugabanyuka.

Minisiteri y’Ubuzima yatangaje ko yatangiye gukingira abari mu byiciro byibasiwe kurusha ibindi ihereye ku bakora mu bigo bivurirwamo COVID-19 n’abaganga bita ku barwayi umunsi ku wundi.

Ibindi byiciro bizakomerezaho ubwo u Rwanda ruzatangira kwakira inkingo rwemerewe muri gahunda ya COVAX n’iy’Ikigo cy’Umuryango w’Ubumwe bw’Afurika gishinzwe gukwirakwiza imiti.

Guhera kuri uyu wa kabiri tariki ya 23 Gashyantare 2021   mu Rwanda ingendo ziraba zibujijwe guhera saa mbiri kugeza saa kumi za mugitondo mu Gihugu hose, ingendo zihuza Uturere dutandukanye zikaba zibujijwe ndetse n’izihuza Uturere n’Umujyi wa Kigali zirabujijwe keretse gusa ku mpamvu za serivisi z’ubuzima cyangwa izindi z’ingenzi.

Amashuri yo mu Gihugu hose yemerewe gufungurwa guhera ku ya 23 Gashyantare 2021  kimwe n’insengero zari zisanzwe zaremerewe gukora nyuma y’ubugenzuzi zakorewe bukagaragaza ko zujuje ibisabwa mu kubahiriza amabwiriza yo kwirinda COVID-19, hemerewe 30%.

Imyitozo ngororamubiri ikorerwa mu nyubako z’imyidagaduro (gyms) no kogera muri pisine (swimming pool)  byo birasubitswe  mu rwego rwo kwirinda ko byaba inzira yo gukwirakwiza ubwandu bushya bukomeje kwiyongera, uretse ku bantu bacumbitse muri za Hoteli na bo bamaze kwisuzumisha icyo cyorezo.

Mu gihe u Rwanda rutaragera ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero,  kwambara neza udupfukamunwa no gukaraba intoki kenshi bakoresheje amazi meza n’isabune cyangwa alukoro .

Abamaze kwandura ku Isi barasaga miliyoni 112 barimo abasaga  miliyoni 87 bakize n’abapfuye barenga miliyoni ebyiri n’ibihumbi 481.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.