Abakinnyi 10 ni bo bazaserukira u Rwanda mu mikino y’Afurika

Yanditswe na BUGINGO FIDELE

Ku ya 11-08-2019 saa 18:31:26
Ntagengwa Olivier (ufite umupira) na Akumuntu Kavalo Patrick, bamwe mu bakinnyi 10 bazaserukira u Rwanda mu mikino y'Afurika

Abakinnyi 10   ni bo bazaserukira u Rwanda mu mikino y’Afurika “All African Games 2019” izabera muri Maroc kuva  tariki 19 kugeza 31 Kanama 2019.

Aba bakinnyi bakaba bari mu mikino itatu ari yo gusiganwa ku magare, imikino ngororamubiri na Volleyball ikinirwa ku mucanga “Beach Volleyball”.

Ikipe izahagararira u Rwanda muri Volleyball ikinirwa ku mucanga “Beach Volleyball” mu bagore izaba igizwe na  Munezero Valentine  uzaba afatanyije na Mukandayisenga Benita naho mu bagabo ni Ntagengwa Olivier afatanyije na Akumuntu Kavalo Patrick.

Ntagengwa Olivier (ufite umupira) na Akumuntu Kavalo Patrick, bamwe mu bakinnyi 10 bazaserukira u Rwanda mu mikino y’Afurika

Iyi kipe izatozwa na Mudahinyuka Christophe kuri ubu uri kumwe n’aba bakinnyi mu Buyapani aho bagiye gukorera imyitozo kuva tariki 01 Kanama 2019.

Muri iki kiciro bazagenda tariki 13 Kanama 2019 batangire irushanwa kuva tariki 16 kugeza 21 Kanama 2019.

Abakinnyi bakina umukino wo gusiganwa ku magare ni Mugisha Moise, Areruya Joseph, Munyaneza Didier na Nzafashwanayo Jean Claude. Umutoza akaba ari   Sempoma Felix ndetse  na Maniriho  Eric nk’umukanishi.

Aba bakinnyi bakaba bakomeje imyiteguro aho Areruya na Munyaneza bari mu Buyapani mu myitozo  aho bajyanye n’umutoza Sempoma mu gihe Mugisha Moise yitabiriye amarushanwa mu gihe cy’ukwezi mu Bubiligi naho Nzafashwanayo akaba ari muri RDC mu irushanwa.

Iyi kipe izahaguruka mu Rwanda 20 Kanama 2019 izakine irushanwa kuva tariki 24 kugeza 28 Kanama 2019.

Mu mikino ngororamubiri “Athletisme” hazagenda abakinnyi 2 ari bo Hitimana Noel na Yankurije Marthe naho umutoza wabo akaba ari Kanyabugoyi Anicet. Aba bakinnyi na bo  bakaba bari mu Buyapani mu myiteguro.

Aba bakinnyi bazerekeza muri Maroc tariki 22 Kanama 2019 bakine tariki 29 Kanama 2019.

Iri tsinda ry’abakinnyi bazaserukira u Rwanda bazagenda bayobowe na  Ijimbere Naickey uzanzwe ari umukozi muri Komite Olempike y’u Rwanda na Sibomana Rusika Emmanuel Rusika Emmanuel  uzaba ari umuganga.

Imikino iheruka u Rwanda rwegukanye imidari 5

Iyi mikino y’Afurika “All African Games” iba buri myaka 4 yaherukaga kuba muri 2015 ubwo yeberaga muri Congo Brazzaville aho u Rwanda rwari rwahagarariwe n’abakinnyi bagera kuri 52 baturutse mu mikino 9 itandukanye irimo Fencing, Volleyball, Beach Volleyball, Karate, Amagare, Tennis, NPC, imikino ngororamubiri na Taekwondo.

Igihugu cy’u Rwanda cyatahanye imidari 5 harimo umudari wa zahabu wegukanwe na Hadi Janvier mu gusiganwa ku magare mu muhanda “Road Race”. Mu magare kandi ikipe y’u Rwanda yegukanye umudari wa Bronze mu gusiganwa n’isaha hakabarwa ibihe byakoreshejwe “Team Time Trial”.

Mu bafite ubumuga, Muvunyi Hermas yegukanye umudari wa zahabu mu isiganwa rya metero 400 naho Hakizimana Theogene yegukana umudari wa Bronze mu guterura ibiremereye.

Undi mudari ni uwegukanwe n’ikipe y’abagore muri Beach Volleyball aho ikipe yari igizwe na Nzayisenga Charlotte na Mutatsimpundu Denise yegukanye umwanya wa 3.

Muri uyu mwaka wa 2019 imikino y’abafite ubumuga  nta bwo izakinwa ahubwo biteganyijwe mu ntangiriro z’umwaka utaha wa 2020 hazaba imikino  y’Afurika mu bafite ubumuga nayo ikabera muri Maroc.

Hadi Janvier ubwo yegukanaga umudari wa Zahabu mu mikino y’Afurika muri 2015 mu gusiganwa ku magare

Ikipe y’u Rwanda mu mukino wo gusiganwa ku magare ubwo yegukanaga umudari wa Bronze

Muvunyi Hermas yegukanye umudari wa Zahabu mu gusiganwa metero 400 mu kiciro cy’abafite ubumuga

Hakizimana Theogene wegukanye umudari wa Bronze mu guterura ibiremereye mu kiciro cy’abafite ubumuga

Ikipe ya Beach Volleyball mu bagore yegukanye umudari wa Bronze

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.