17°C , Mostly cloudy | Kigali-Rwanda

Abahuguriwe mu kigo cy’urubyiruko cya Kigali barashima ubuyobozi bwabatekerejeho

Yanditswe na Sezibera Anselme

Ku ya 27-01-2020 saa 17:00:55
Ikigo cya KESC kimaze gutanga umusaruro ku batari bake

Bamwe mu rubyiruko rwahuguriwe mu kigo cy’Urubyiruko cya Kigali giherereye mu murenge wa Kimisagara mu karere ka Nyarugenge mu Mujyi wa Kigali, barashima ubuyobozi bw’Umujyi wa Kigali bwabatekerejeho bukabashakira aho kongerera ubumenyi bwanatumye babona akazi abandi bakakihangira.

Umujyi wa Kigali washyizeho ikigo cyunganira abakoresha n’abashaka akazi kurushaho gusobanukirwa ibyerekeranye n’akazi n’amakuru ajyanye n’isoko ry’umurimo mu gihugu, kiswe KESC (Kigali Employment Service Centre), aho abashaka akazi bamaze kugera ku 6.000 bize amashuri bafite ubumenyi butandukanye abasaga 1000 bamaze kukabona.

Muhire Janvier yagize ati: “Narangije ya kaminuza mu by’ubuhinzi n’ubworozi sinagira amahirwe yo kubona akazi, kuko ubu nari maze imyaka 4 njya gukora ibizamini by’akazi ariko bikarangira ntabonetse mu batsinze. Nahisemo kubyihorera niyemeza kugana ikigo cya KESC ngo nihugure mu myuga ari bwo nahise mpugurwa mu bijyanye n’ubuhinzi bwa kijyambere bukorewe ahantu hato.

Nifashishije isambu yo mu rugo ubu ndahinga ibihumyo kuri metero kare hafi 20 ariko nezaho ibihumyo bishobora kumpa umushahara nibura nibarira nk’amafaranga 250.000 ntakekaga akazi nawuhemberwaho. Ibyo rero bituma nshima ubuyobozi bwatekereje urubyiruko bukabukoraho n’ubukangurambaga bwo kwitabira kuko twagannye iki kigo duseta ibirenge ngo twarize ntitwakizamo”.

Uwamahoro Chantal ati: “Kuri ubu nkorera rwiyemezamirimo washinze uruganda rukora imigati mu bijumba hariya Kicukiro, mazemo imyaka 2, twahuye ndangije amashuri yisumbuye mu karere ka Rubavu aho n’ubundi nize ibyo guteka kandi mukorera neza yaranshimye kandi ampemba neza. Mu by’ukuri nsanga mbikesha ubumenyi navanye muri KESC kubera uburyo batwigisha gutinyuka, gusobanura imishinga yacu ndetse no kugaragaza ibyo twifitemo, ibyo ndabishimira ubuyobozi kandi ibigo nk’ibi bikwiye mu gihugu hose ngo bifashe abatagira akazi kukihangira cyangwa kugahatanira”.

Umukozi w’Umujyi wa Kigali ukorera muri icyo kigo cy’Umujyi wa Kigali, KESC, ushinzwe gutegura amahugurwa, kuganiriza abashaka akazi no kubashishikariza kwitabira serivise zitangwa n’ikigo KESC Rusimbi Charles, yavuze ko icyo kigo cyashyizweho mu 2013 mu rwego rwo gutegura abashaka akazi kugira ngo nibagera ku isoko ry’umurimo bazitware neza.

Akomeza avuga ko hari n’abandi bagera ku bihumbi 3000 bahawe amahugurwa bishakira akazi.

Yagize ati: “Tugira n’abafatanyabikorwa mu rwego rwa Leta ndetse no mu bikorera dusinyana na bo amasezerano ku buryo igihe cyose habonetse imyanya y’akazi tubahuza n’abashaka akazi muri urwo rubyiruko”.

Mu byo KESC ifashamo abakoresha ni ukubahuza n’abashaka akazi hibandwa ku kubanza gusuzuma ubushobozi bw’abashaka akazi, gutegura umunsi uhuza abakoresha n’abashaka akazi, imyimenyerezo n’ubundi bufasha.

Hari ugusesengura urutonde rw’abashaka akazi bakarebamo abakandida bujuje ibisabwa ku myanya yashyizwe ku isoko bakaba ari bo basaba akazi. Hari kandi no gufasha abashaka akazi gukoresha ubushobozi bafite kugira ngo bibafashe kubona imirimo, no guhugura abashaka akazi ku buryo bwo kuzagakora neza.

Rusimbi avuga ko abashaka akazi, KESC ibafasha kubona amatangazo y’akazi, amahugurwa no kwimenyereza akazi mu bigo by’abikorera, ibya Leta, ibyo mu gihugu n’imiryango mpuzamahanga, bandika abashaka akazi no kubagezaho amakuru y’akazi, gufasha abashaka akazi kubongerera ubumenyi n’amahirwe yo kubona akazi ku isoko ry’umurimo.

Hari no gufasha abashaka akazi gukoresha ubumenyi bifitemo kugira ngo bibafashe mu rugendo rwo gushaka akazi, kubona akazi no guhabwa ubufasha n’amakuru ajyanye n’umurimo. Ibindi bikorerwa abashaka akazi ngo ni uguhitamo ibyo bazakora, uburyo bwo kwihangira imirimo, kwimenyereza akazi n’amahugurwa.

Rusimbi ati: “Abo bakora ibyo bintu baba barahawe amahugurwa yo kubinoza, kwihangira imirimo ndetse hakaba n’abandi bahugurwa mu gukora imishinga n’ibindi. Guhuriza hamwe ibyo bakora ni byiza kuko abantu babasha kubisura bakamenya ba nyirabyo kandi bakaba bashobora no kugura mu gihe babishimye”.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.