Abahinzi barasabwa kwinjira mu ikoranabuhanga ryo kuhira imyaka ku buso buto

Yanditswe na MUKAGAHIZI ROSE

Ku ya Feb 4, 2018

Abahinzi barakangurirwa gukoresha imashini zivomerera imyaka kugira ngo babashe guhangana n’ihinduka ry’ibihe. Ni muri urwo rwego mu Karere ka Ruhango hatangijwe ku mugaragaro igikorwa cyo gukangurira abahinzi n’abaturage muri rusange kwinjira muri gahunda yo gukoresha ikoranabuhanga mu kuhira imyaka ku buso buto (Small Scale Irrigation Technology/SSIT) hafi y’ibishanga no mu mabanga y’imisozi.

Abahinzi barakangurirwa gukoresha imashini zivomerera imyaka kugira ngo babashe guhangana n’ihinduka ry’ibihe.

Iki gikorwa cyatangirijwe mu mudugudu wa Karama, Akagali ka Nyakabungo, Umurenge wa Ntongwe kuri site ya Nyamukumba, ahahuriye abahinzi 59 bo hirya no hino mu Karere bari ku rutonde rw’abazunganirwa ku bikoresho byo kuhira, ndetse n’abaturage baturiye igishanga cyabereyemo iki gikorwa.

Abitabiriye iki gikorwa beretswe bimwe mu bikoresho byo kuvomerera imyaka, basobanurirwa uko bikoreshwa, igiciro cyabyo n’ubwunganizi Leta itanga.

Iki gikorwa kikaba kigamije guha ababikeneye ubushobozi bwo guhitamo ibikoresho babonye kandi bazi uko bikora.

Umuyobozi w’Akarere ka Ruhango, Mbabazi François Xavier, yasabye abahinzi kwitabira bihagije gukoresha ikoranabuhanga mu buhinzi kugira ngo babashe guhangana n’ihindagurika ry’ibihe, bityo bashobore kubona umusaruro mwiza.

Yagize ati “Turasabwa kongera umusaruro; mu kongera umusaruro turakoresha uburyo bwose bushoboka. Murabona ko ibyo Leta isabwa yabikoze: yashyize nkunganire mu mafumbire, ishyira nkunganire mu mbuto, none nkunganire yageze no ku bikoresho byo kuhira. Iyo woroherejwe ku ifumbire, ukoroherezwa ku mbuto, ukoroherezwa ku mazi, nta kindi kiba gisigaye uretse gushyiraho akawe. Ikitugenza rero nta kindi, ni ukugira ngo tubabwire ko tubashyigikiye cyane muri iyi gahunda, kandi tubasabe kuyinjiramo mu buryo buhagije.”

Umuyobozi w’Akarere kandi yasabye abahinzi kureka ‘ubuhinzi bw’amarenzamunsi’ bagakora ubuhinzi bugamije inyungu kandi nyinshi. Ikoranabuhanga rikaba ari imwe mu nzira zo kubigeraho.

Ati “Imwe mu mpamvu zituma ubuhinzi bwacu akenshi tubufata nk’aho butaduha amafaranga ahagije yerekeranye n’uburyo tubukora. Usanga twizera cyane ikirere, cyadutenguha tugahomba. Usanga kandi duhinga tutarateganyije umuti w’ibyonnyi, nyamara kandi haragiye haboneka ibimenyetso bisa n’integuza. Rero nk’uko no mu yindi myuga bitegura bihagije, umuntu agashaka ibyangombwa bihagije kandi hakiri kare, no mu buhinzi, niba ushaka kongera umusaruro no kuwukuramo ubukire, bisaba ko nawe witegura bihagije.”

Mbabazi akaba yizeza abahinzi ubufasha bw’ubuyobozi kugira ngo iyi gahunda izarusheho kunoga no kugenda neza.

Ati “Ubuyobozi burahari kugira ngo bubunganire, aho mwagira ikibazo hose mwegere abayobozi banyu, mwegere abatekinisiye bacu bazabafasha”.

Ku rundi ruhande abahinzi bamenye iyi gahunda bashima ibyiza byayo, bakanashishikariza abandi kwihutira kuyinjiramo.

Nzabakenge Fabien wo mu Murenge wa Mbuye ashaka kujya yuhira urutoki rwe kuri hegitari imwe, ibiti 1200 bya kawa, n’imyumbati kuri hegitari eshanu.
Avuga ko hari ibindi bice by’Igihugu yabonyemo abahinzi bavomerera imyaka yabo bakoresheje ikoranabuhanga, agahamya ko bifite inyungu nyinshi cyane ngo kuko ukoresha ubu buryo adapfirwa ubusa n’igihe k’izuba.

Ngo iyo abandi badafite icyo bakora kubera izuba, we aba afite imyaka, bityo ikazera ikenewe ku isoko akabona amafaranga menshi.

Uyu muhinzi akaba asaba by’umwihariko abashaka gukora ubuhinzi bw’umwuga kudacikwa n’aya mahirwe mu gihe Leta igikomeje gutanga ubwunganizi kuri izi mashini.

Muri uyu mwaka w’imihigo 2017-2018, Akarere ka Ruhango kahize kuhira imyaka ku buso bungana na hegitari 90 hifashishijwe imashini.

Mu rwego rwo gufasha abari mu kiciro cya mbere cy’ubudehe kudacikanwa n’aya mahirwe, inama njyanama y’Akarere yemeje ko abo muri iki kiciro bifuza izo mashini bazunganirwa ku kigero cya 75%.