19°C , Showers | Kigali-Rwanda
Hafashwe ingamba zo gutuma imbuto ziyongera ku isoko ( Foto Rose M )

Abahinzi bahinga imbuto ziribwa bifuza guhabwa ubumenyi

Yanditswe na Mukagahizi Rose

Ku ya 12-04-2019 saa 06:13:34

Abahinzi b’imbuto ziribwa bavuga ko inzego zishinzwe ubuhinzi mu Rwanda zikwiye kubongerera ubumenyi kuko ari ubuhinzi bukigaragaza imbogamizi zirimo indwara zinyuranye zibasira ibihingwa byabo.

Habimana Tharcisse, ahinga imbuto mu Murenge wa Mayange mu Karere ka Bugesera, avuga ko amaze igihe kinini ahinga imbuto ziribwa ariko ko akeneye kwitabwaho cyane cyane ahabwa ubumenyi buhagije mu buhinzi, imiti irwanya indwara ndetse n’ingemwe z’indobanure.

Kanyange Jeannette, utuye mu Murenge wa Muyira mu Karere ka Nyanza, we avuga ko kubona imiti iterwa mu mbuto ziribwa biba bigoye ari na byo bituma imbuto ziribwa ziba nke ku masoko.

Avuga ko imbuto zifite akamaro kuko zituma abantu bagira ubuzima bwiza, agasanga hakenewe amahugurwa cyane cyane abantu bakumva ko guhinga imbuto bifite akamaro bityo zikaba nyinshi ku isoko. Asanga guhenda kwazo biterwa n’uko zidahingwa cyane mu Rwanda.

Yagize ati: “Numva nk’urubyiruko rukwiye kwihatira kwinjira mu buhinzi bw’imbuto imyumvire igahinduka mu kwita ku buhinzi bw’imbuto kandi bakumva ko imbuto ziribwa n’abantu bose atari abana gusa.”

Dr. Ndabamenye Telesphore, Umuyobozi mu Kigo k’Igihugu cy’Ubuhinzi n’Ubworozi RAB, ushinzwe umusaruro no kwihaza mu biribwa, avuga ko hari ingamba zafashwe zitanga ikizere ko mu mwaka umwe hazagaragara impinduka ku bijyanye n’ubuhinzi bw’imbuto ziribwa.

Yagize ati: “Ubushakashatsi bwakozwe bugaragaza amoko yihuta yera vuba kandi afite umusaruro mwiza, ni yo turushaho kugenda dukwirakwiza mu bahinzi. Tuzi ko tugomba no gukora imbuto nyinshi kugira ngo tubone izo duhereza abahinzi, dufite gahunda yo gutera ibiti 3 by’imbuto ziribwa kuri buri rugo”.

Akomeza yungamo ati: “Ubu RAB yatangiye gushyira imbaraga mu gukora izo mbuto nyinshi cyane cyane izo ngizo zera vuba kandi zifite umusaruro mwiza no gukora ubuhumbikiro kuko bizasaba ko n’abikorera, abatubuzi babigize umwuga bazaba bagaragara muri buri karere. Izo mbaraga zose nidukorana n’inzego z’ibanze tuzaba dufite ubuhumbikiro buhagije hirya no hino mu gihugu nibura mu gihe cy’umwaka umwe abaturage bazabe batangiye kubona imbuto.”

Hafashwe ingamba zo gutuma imbuto ziyongera ku isoko ( Foto Rose M )

TANGA IGITEKEREZO

Leave a Reply

Your email address will not be published. Required fields are marked *