28°C , Sunny | Kigali-Rwanda

Abahererekanya amafaranga kuri terefoni barasabwa gushishoza bakirinda abakora uburiganya

Yanditswe na Tumukunde Georgine

Ku ya Feb 21, 2019 saa 6:21
Abakoresha terefoni mu guhererekanya amafaranga barasabwa kujya bagira ubushishozi

Abaturarwanda barakangurirwa kujya bagira ubushishozi mu bijyanye na serivisi zo guhererekanya amafaranga hifashishijwe terefoni igendanwa kuko hari abatekamutwe bifashisha iri koranabuhanga rimaze gutera imbere bagakora ubujura cyangwa ubwambuzi bushukana.

Uwintore Nothelme ukora  mu Ishami rishinzwe kurengera abafatabuguzi mu Rwego Ngenzuramikorere  (RURA), asaba abafatabuguzi  b’ibigo by’itumanaho kujya bitwararika kuko ubujura buhindura isura uko iterambere mu by’itumanaho rihinduka.

Avuga ko ugiye kubitsa kuri konti ye  ya Airtel Money, Tigo Cash cyangwa MTN Mobile Money,  agomba guha amafaranga umuntu yizeye kandi mbere yo kugenda akabanza kureba niba ayo mafaranga yagiye kuri konti; atari ubutumwa bugufi gusa bamwoherereje butajyanye na yo.

Aranabakangurira kujya bahisha umubare w’ibanga wabo. Yagize ati: “Hari abafatabuguzi berekana umubare banga wabo kubera uburangare, nk’umuntu agahereza terefoni ye undi akamenya umubare banga, akaba ashobora gukoresha Sim Swap (Simuswapu) akaba yabikuza amafaranga. Umubare banga ni umwihariko w’umuntu ntabwo abantu bawusangira”.

Mu gihe umufatabuguzi abona ko atakiri ku murongo w’itumanaho agomba kwihutira gukoresha “Sim Swap”, akanagira  umubare w’ibanga ugizwe n’imibare itandukanye uko ari itanu.   Ikindi ni uko  ntawukwiye gutuma undi  kumubikuriza kuri terefoni ngo amuhe  indangamuntu n’umubare w’ibanga cyangwa ngo asabe  ucuruza izi serivisi (Agent) kubimukorera ngo anamuhe  umubare w’ibanga we.

ABAHUYE N’UBURIGANYA BARAKANGURIRA ABANTU KUJYA BASHISHOZA

Ndacyayisenga Jean de Dieu wo mu Karere ka Nyarugenge yagize ati: “… byambayeho, umuntu yafashe terefoni yange, yari yacunze  umubare w’ibanga, ahita anyiba  amafaranga yari kuri konti yange, mpamagaye kuri …(kimwe mu bigo by’itumanaho) bambwira ko uwo muntu ayabikuje, bandangira n’umukozi ayabikujeho   ngo nge kumureba, mugezeho ambwira ko uwayabikuje yahise agenda atanamwanditse … Kandi icyo gihe uwo wibye nomero ya terefoni ahita ayikuraho”.

Uwizeyimana Carine wo mu Karere ka  Ruhango,  yavuze ko yibwe terefoni, uwayibye atangira kujya ahamagara abantu asanze kuri Simukadi ye  abasaba amafaranga yo kwivuza kuko nta bushobozi afite. Ati: “Amahirwe ni uko abo yahereyeho ahamagara ari abo mu muryango wange, bahise bahererekanya amakuru mbere yo kohereza amafaranga, basanga nta kibazo mfite. Ariko bamwe bari batangiye kuyakusanya ngo bayohereze bazi ko ari nge! Abantu bage bashishoza, kandi uhuye n’ikibazo ahite yitabaza inzego zibishinzwe.”

Ntambara Emmanuel umwe mu bacuruza serivisi zo guhererekanya amafaranga avuga ko na bo bajya bahura n’ubwo buriganya, kandi bakagira igihombo cyo kwishyura umufatabuguzi wibwe mu gihe hari uwamwiyitiriye akabikuza amafaranga ye.

Yagize ati: “Hari igihe uwibwe ahamagara ikigo k’itumanaho kikamubwira ngo nage kureba Agent wayabikuje, kandi nyamara na we aba yayabikurije umuntu atazi ko ari umujura, ubwo bikaba ngombwa ko wishyura uwibwe. Uwibye aba yigendeye kare mutari bumubone”.

UBUNDI BURIGANYA BUJYA BUKORWA N’UKO ABANTU BAKWIRINDA KUGWA MU MUTEGO

Ishami rishinzwe kurengera abafatabuguzi muri RURA rigaragaza bumwe mu buriganya bujya bukorwa, rikanatanga inama ku bafatabuguzi kugira ngo birinde.

● Hari abiyita abakozi b’ibigo by’itumanaho bagahamaga ra abantu bababeshya ko batsindiye amafaranga ngo kuko bakoresha terefoni yabo neza mu guhererekanya amafaranga.  Abantu bakwiye gushishoza ntibitabire guhabwa ibihembo batigeze baharanira.

● Hari n’ abambara imyenda bakanitwaza amakarita agaragaza ko ari abakozi mu by’ihererekanya ry’amafaranga hakoreshejwe terefoni, hari igihe abafatabuguzi bibwira ko babishinzwe koko babaha amafaranga ngo babazigamire (babashyirire kuri terefoni) bakababeshya ko bayashyizeho ariko ko hari ikibazo cya  rezo (reseau) akaba ari yo mpamvu adahita agaragara kuri konti.

Abafatabuguzi bakwiye kujya begera abakozi bafite aho bakorera hazwi hamenyerewe aho kwiyambaza uwo bahuriye mu muhanda badashobora kongera kubona baramutse bamukeneye.

● Hari umubare w’ibanga ukoreshwa iyo utaragena uwawe; uwo mubare ushobora kumenywa n’abantu bose kuko ahanini ari zeru eshanu. Ugomba  gushyiramo umubare w’ibanga wawe wihariye utazwi n’abandi  mbere y’uko utangira kohereza amafaranga.

● Hari uhamagara akakubwira ko  yakoherereje amafaranga yibeshye agusaba kuyamusubiza kandi nyamara abeshya. Ukwiye kureba koko ko hari amafaranga yagiye kuri konti aho guhita wohereza.

● Hari abazana amafaranga y’amakorano. Aha na ho bisaba kugira ubushishozi.

● Uwohereza amafaranga hari igihe yibeshya kuri nomero ashaka koherezaho, yashaka kuyasubirana uwayakiriye akaba yakwanga kuyamusubiza kuko yayakoresheje cyangwa kubera ko gusa atabishaka.

Ni byiza kubanza gusuzuma ko nomero zigiye koherezwaho amafaranga zanditse neza kugira ngo amafaranga atoherezwa ku wo atagenewe.

● Ukwiye kwirinda gushyira muri terefoni yawe porogaramu (software) utazi cyangwa utizeye umutekano wazo. Rimwe na rimwe ziba ziherekejwe na virusi ituma umujura abona ibyo ukorera kuri terefoni yawe akaba yanabona umubare w’ibanga wawe akaziba amafaranga  yawe.

Ugomba  gusuzuma buri gihe terefoni no kuvanamo porogaramu zitizewe zishobora gutuma amakuru yawe arimo n’umubare w’ibanga amenyekana.

UGIZE IKIBAZO YAKWITABAZA INZEGO ZIBISHINZWE

Kimwe mu bigo by’itumanaho kivuga ko iyo umuntu yibwe akabibamenyesha bamukurikiranira ikibazo bafatanyije n’inzego z’umutekano, uwibye yafatwa, umufatabuguzi akaba yasubizwa ibyo yibwe. Abafatabuguzi bakaba bakwiye kujya bamenyekanisha ahari abiyitirira ikigo k’itumanaho bagamije kwiba.

Uwintore Nothelme ukora mu Ishami rishinzwe kurengera abafatabuguzi muri RURA, avuga ko uko iterambere rijya mbere  ari na ko n’ abatekamutwe bahimba imitwe yo kunyunyuza abandi amafaranga batavunitse, ni yo mpamvu abafatabuguzi bagomba gufata ingamba bakitwararika.

Mu gihe hari uhuye n’uburiganya yakwihutira kubimenyesha  ikigo gitanga serivisi z’itumanaho, ikibazo kitakemuka, akaba yakigeza kuri RURA mu nyandiko cyangwa agahamagara kuri 3988.

Abakoresha terefoni mu guhererekanya amafaranga barasabwa kujya bagira ubushishozi