20°C , Partly cloudy | Kigali-Rwanda
Abahanzi babarizwa muri KINA Music na bo bikuye muri Salax Awards. Uyu ni umujyanama wabo Ishimwe Clement.

Abahanzi barikura muri Salax, Ahmed ati “abo ni abatifitiye icyizere”

Yanditswe na Ndamyirokoye François

Ku ya 07-02-2019 saa 17:18:04

Nyuma y’uko kompanyi yitwa AHUPA itangaje ko yagiranye amasezerano na Ikirezi Group yo gutegura itangwa ry’ibihembo rya Salax Awards 7 abahanzi barimo Christopher, Dj Pius, Charly na Nina, Urban Boys na Oda Paccy ndetse n’abahanzi babarizwa muri KINA Music bikuye muri iki gikorwa.

Abahanzi babarizwa muri KINA Music na bo bikuye muri Salax Awards. Uyu ni umujyanama wabo Ishimwe Clement.

Nubwo ahanini aba bahanzi nta wugaragaza impamvu yikura mu irushanwa ariko mu myaka yatambutse iri rushanwa ryagiye rivugwamo utubazo tujyanye no kudaha amafaranga abahanzi uko abaterankunga babaga bayagennye.

Biherutse gutangazwa ko impamvu KINA Music yikuye mu irushanwa ari uko itabashije kumvikana n’abategura Salax ku byo babasabaga.

Mu 2016 iri rushanwa ryateguwe n’Ikirezi Group na bwo abahanzi bagenda bikuramo biza no kurangira irushanwa ritabaye dore ko icyo gihe byavuzwe ko babuze abaterankunga.

Ibyiciro uyu mwaka birimo guhatanira ibihembo ni 6. Muri buri kiciro uzatsinda azahabwa miriyoni imwe y’amafaranga y’u Rwanda naho indirimbo izaba iya mbere umwaka wose izahembwa ibihumbi 500 by’amafaranga y’u Rwanda.

Uwakoze indirimbo mu buryo bw’amashusho igakundwa kurusha izindi “Producer” azahembwa ibihumbi 500 by’amafaranga y’u Rwanda n’uwakoze indirimbo mu buryo bw’amajwi igakundwa cyane kurusha izindi na we azahembwa ibihumbi 500 by’amafaranga y’u Rwanda.

Ku ya 29 Werurwe 2019 ni bwo hazabaho itangwa ry’ibi bihembo ku bazaba batsinze.

Uwera Ahmed Pacifique uri mu barimo gutegura itangwa ry’ibihembo bya Salax Awards yavuze ko kwikuramo kw’abahanzi nta mpungenge n’imwe bibateye ngo kuko abahanzi bamwe barimo kuvamo kuko nta kizere cyo kuzatsinda bafite.

Abikuyemo kandi Ahmed ahamya ko bari baremeye kwitabira icyo gikorwa bafata umwanzuro wo kubivamo nyuma.

Ati “Abari kwikuramo bari barashyize umukono ku masezerano ko bazitabira iri tangwa ry’ibihembo”.

Ashimangira kandi ko yizeye ko igikorwa kizagenda neza nubwo bamwe mu bahanzi bari kwikuramo.

Dj Pius na we yikuye muri Salax Awards

Abahanzikazi Charly na Nina bamwe mu bikuye muri Salax Awards

TANGA IGITEKEREZO

Leave a Reply

Your email address will not be published. Required fields are marked *