19°C , Mostly cloudy | Kigali-Rwanda
Abambasaderi bifatanyije n'ubuyobozi bw'Ihuriro rigamije kwigenga kw'Afurika ishami ry'u Rwanda gukora umuganda (Foto Mike U.)

Abahagarariye ibihugu by’Afurika mu Rwanda basanga kwibohora kw’Afurika gushoboka

Yanditswe na KAYITARE JEAN PAUL

Ku ya 30-05-2018 saa 07:28:07

Abahagarariye ibihugu byabo by’Afurika mu Rwanda bagera kuri 15 baherutse kwitabira umuganda wasozaga icyumweru cyahariwe kwibohoka kw’Afurika, bavuga ko mu gihe Abanyafurika baba bashyize hamwe kwibohora kw’Afurika bishoboka.

Abambasaderi bifatanyije n’ubuyobozi bw’Ihuriro rigamije kwigenga kw’Afurika ishami ry’u Rwanda gukora umuganda (Foto Mike U.)

Ambasaderi George Nkosinati Twala uhagarariye ba ba ambasaderi b’ibihugu byabo by’Afurika mu Rwanda akaba n’Ambasaderi w’igihugu cy’Afurika y’Epfo mu Rwanda, ashima igikorwa cy’umuganda bitabiriye ariko kandi akavuga ko ibyo ari igisubizo nk’abanyafurika, ikindi agashimangira ko kwibohora kw’Afurika bijyana no gushyira hamwe kw’Abanyafurika.

Ati “Ibi bikorwa ni intangarugero kuko bihuza abaturage, bigahuza abasenateri n’abandi. Kuri nge nsanga umuganda ari igikorwa gishobora kuzana agaciro n’ubumwe hagati y’abayobozi n’abayoborwa […] ndabona rero ukwibohora kw’Afurika gushoboka ariko bikajyana nuko abantu babigiramo uruhare”.

Ambasaderi Nkosinati akomeza asaba bagenzi be b’abadipolomate ko ibikorwa by’umuganda babigeza mu bihugu byabo bahagarariye. Ati “Nishimiye iki gikorwa cy’umuganda kuko ni igisubizo ku banyafurika, bikaba bigaragaza agaciro kacu. Iki gikorwa gikwiye kutubera intangarugero nkaba nsaba abadipolomate bagenzi bange ko ibikorwa by’umuganda twabishyira no mu bihugu byacu duhagarariye mu Rwanda”.

Ambasaderi Wonekha Oliver, uhagarariye Uganda mu Rwanda, ashimangira ko Abanyafurika bagombye gushyira imbaraga mu kwishakamo ibisubizo. Ati “Ibi ni ibintu nk’abanyafurika tugomba kujya twishakamo ibisubizo. Nagira ngo mbabwire ko kwishyira hamwe kw’Abanyafurika ari byo bizatuma kwibohora nyako kwacu nk’Abanyafurika bigerwaho”.

Umuyobozi wa Komisiyo ishinzwe ubucuruzi, ubukungu n’ubukangurambaga mu Ihuriro rigamije kwigenga kw’Afurika “Pan-African Movement”, Shyaka Michael Nyarwaya, avuga ko mu cyumweru cyahariwe umunsi wo kwibohora kw’ Afurika cyasojwe mu cyumweru gishize, gisozwa n’umuganda witabiriwe n’inzego zitandukanye zirimo Visi Perezida w’Inteko Ishinga Amategeko umutwe wa Sena, Hon Gakuba Jeanne d’Arc n’abanyamuryango b’Ihuriro rigamije kwigenga kw’Afurika mu byiciro byose.

TANGA IGITEKEREZO

Leave a Reply

Be the First to Comment!

avatar