20°C , Partly sunny | Kigali-Rwanda
Komiseri wungirije ushinzwe abasora mu kigo k'igihugu k'imisoro n'amahoro, Drocelle Mukashyaka

Abaguzi barasabwa kwaka inyemezabuguzi zihuye n’igiciro baguriyeho

Yanditswe na admin

Ku ya 27-12-2017 saa 09:04:14

Ubuyobozi bw’Ikigo k’igihugu k’imisoro n’amahoro burasaba abaguzi kujya basaba inyemezabuguzi kandi bakareba ko zihuye n’ikiguzi baguriyeho ibicuruzwa kugira ngo bibarinde bose kugira uruhare mu inyerezwa ry’umusoro.

Komiseri wungirije ushinzwe abasora Drocella Mukashyaka avuga ko hari abacuruzi banyuranya n’imikorere y’ukuri bagahitamo gutanga inyemezabuguzi zidahuye n’ukuri kw’amafaranga abaguzi baba batanze.

Ati ”Hari abacuruzi batanga inyemezabuguzi zitari zo  ziriho ibiciro bidahuye n’amafaranga abaguzi baba batanze, ndasaba abaguzi kujya bareba mbere yo kujyana ibicuruzwa niba amafaranga baguze ibicuruzwa ari yo ari ku nyemezabuguzi.”

Umukozi w’imwe mu nzu igurisha ibikoresho byo mu biro ikorera mu Mujyi wa Kigali, avuga ko iyo batinze kwishyurwa amafaranga ku bikoresho baba batanze bibagiraho ingaruka.

Ati ”Twe dukoresha EBM iyo dutsindiye isoko ryo gutanga ibikoresho dutanga na fagitire ya EBM. Iyo dutinze kwishyurwa kuri iryo soko bitugiraho ingaruka kuko tuba dusabwa kwishyura umusoro ku nyongeragaciro ku gihe. Birumvikana bituma dushaka amafaranga kugira ngo tuwishyure iyo twambuwe cyangwa tugatinda kwishyurwa, murumva ko wa musoro twatanze kuwusubizwa bisaba inzira ndende.”

Uwimana Daphrose na we ukorera mu Mujyi wa Kigali ubucuruzi bw’ibikoresho byo mu biro  avuga ko gukora ubucuruzi bisaba ubunyangamugayo.

Ati ”Iyo utabaye inyangamugayo uhura n’ibibazo, hari abatanga inyemezabuguzi za EBM zidahuye n’ukuri kw’ibiciro by’abaguzi baba baguriyeho, ibyo bakabikora bagamije kunyereza umusoro, abo ariko ntibakiri benshi kuko barabizi iyo bafashwe barahomba bikomeye.”

Komiseri wungirije ushinzwe abasora Mukashyaka asaba abacuruzi guharanira ubunyangamugayo mu mikorere yabo batanga inyemezabuguzi z’ukuri.

Ati ”Dukomeje gushishikariza abacuruzi gutanga inyemezabuguzi z’ukuri n’abaguzi kujya babanza kureba niba ibiciro biri ku nyemezabuguzi zabo ari byo kugira ngo hatabaho kunyereza umusoro.”

GATETE JEAN BOSCO

TANGA IGITEKEREZO

Leave a Reply

Your email address will not be published. Required fields are marked *