22°C , Mostly sunny | Kigali-Rwanda
Ibiyobyabwenge byangiza ubuzima bw'ababinywa

Abagororerwa Iwawa biyemeje gutanga umusanzu mu guca ibiyobyabwenge

Yanditswe na Twagira Wilson

Ku ya 12-07-2019 saa 15:42:02

Urubyiruko rugororerwa mu kigo ngororamuco cya Iwawa rwiyemeje kurwanya ibiyobyabwenge bashyira ahagaragara ababicuruza kugira ngo batange umusanzu wo kubaka igihugu kizira ibiyobyabwenge.

Ibi babivuze ku wa Kane tariki ya 11 Nyakanga 2019, ubwo basurwaga na komite y’igihugu ishinzwe kurwanya ibiyobyabwenge mu bukangarumbaga yateguye bwo kurwanya ikwirakwizwa n’ikoreshwa ry’ibiyobyabwenge.

Nsengiyumva Musa ukomoka mu karere ka Gisagara, akaba umubyeyi wa Kwizera Ibrahim, bombi ubu barimo kugororerwa mu kigo ngororamuco cya Iwawa nyuma gufatwa bakoresha ibiyobyabwenge. Hakaba hashize icyumweru uyu mubyeyi ajyanywe muri iki kigo, aho yasanze umuhungu we uhamaze amezi agera kuri abiri.

Kimwe na bagenzi babo bagaragarije abagize komite ihuriweho n’inzego zinyuranye igamije kurwanya ibiyobyabwenge, uburyo byabagizeho ingaruka mbi, biyemeza ko bagiye kubirwanya bagaragaza ababicuruza.

Umuyobozi w’ihuriro ry’amadini, amatorero na Sosiyete sivile rigamije kurandura ibiyobyabwenge Bishop Birindabagabo Alex avuga ko biyemeje gushyira imbaraga mu bukangurambaga bugamije kurandura ikoreshwa n’icuruzwa ry’ibiyobyabwenge.

Umunyamabanga wa Leta muri Ministeri y’ubuzima ushinzwe ubuzima rusange n’ubuvuzi bw’ibanze Dr. Ndimubanzi Patrick asanga ubu bufatanye hagati y’inzego zitandukanye hamwe n’abaturage mu gukumira no kurwanya ibiyobyabwenge bwitezweho gutanga umusaruro.

Ubushinjacyaha bw’u Rwanda bumenyesha abajya mu bucuruzi bw’ibiyobyabwenge n’urusobe rw’imiti ikoreshwa nkabyo ko ibihano byiyongereye, dore ko amategeko ateganya ko ufatirwa mu bikorwa byo guhinga, guhindura, gutunda, kubika, uha undi, kugurisha mu gihugu ibiyobyabwenge iyo abihamijwe n’urukiko, ahanishwa igifungo cya burundu n’ihazabu y’amafaranga y’u Rwanda ari hagati ya miriyoni 20 na miriyoni 30.

TANGA IGITEKEREZO

Leave a Reply

Your email address will not be published. Required fields are marked *