22°C , Mostly cloudy | Kigali-Rwanda
Perezida Paul Kagame avuga ko u Rwanda rw’uyu munsi rwubatswe ari uko agaciro, uruhare n’inshingano by’abagore mu gihugu bihawe umwanya bikwiye kandi byaraharaniwe

Abagore ni inkingi ikomeye y’imibereho myiza n’ubukungu-Kagame

Yanditswe na MUGABO LAMBERT

Ku ya 09-03-2018 saa 09:08:51

Ku munsi mpuzamahanga w’abagore, umunsi ngaruka mwaka uba buri tariki ya 8 Werurwe wizihijwe ku munsi w’ejo hashize, Umukuru w’Igihugu Paul Kagame mu butumwa yagennye kuri uyu munsi, yavuze ko abagore ari inkingi ikomeye y’imibereho myiza n’ubukungu mu gihugu.

Perezida Paul Kagame avuga ko u Rwanda rw’uyu munsi rwubatswe ari uko agaciro, uruhare n’inshingano by’abagore mu gihugu bihawe umwanya bikwiye kandi byaraharaniwe

Mu butumwa Perezida Paul Kagame yageneye Abanyarwanda n’Isi yose muri rusange ku munsi mpuzamahanga w’abagore wabaye ejo hashize, yagarutse ku ruhare rw’abagore mu mibereho myiza n’ubukungu by’igihugu, avuga ko abantu bakwiye kugira icyo bavuga ku munsi nk’uyu kuko ufite agaciro kanini. Yavuze ko Isi yose imaze gutera intambwe ndende mu guha abagore n’abakobwa ubushobozi bukwiye, kandi ko u Rwanda rwagize uruhare rwarwo.

Aha, Perezida Kagame yagize ati “Aho tugeze ubu, twahageze kubera imiyoborere myiza, ivugururwa ry’amateka na politiki nziza muri rusange. Abantu bose bakomeje kumva ko ubusumbane hagati y’abagabo n’abagore nta nyungu bufite, ahubwo ko butera igihombo kinini. U Rwanda rw’uyu munsi, rwubatswe ari uko agaciro, uruhare n’inshingano by’abagore mu gihugu cyacu bihawe umwanya bikwiye kandi twarabiharaniye. Uko ni ko bimeze no mu bindi bihugu aho uburinganire bufatwa nk’ihame rikomeye”.

Umukuru w’Igihugu akaba yaragarutse ku ruhare rw’abagore mu bukungu n’imibereho myiza, maze agira ati “Abagore ni inkingi ikomeye y’imibereho myiza n’ubukungu mu gihugu muri rusange. No mu bihe by’intambara cyangwa se amakimbirane bagira uruhare runini mu kubungabunga amahoro n’umutekano. Ariko kandi, ibyifuzo n’ibitekerezo byiza, ndetse n’ibigomba gukorwa kuko ari byo bikwiye, nta bwo ari ko bimeze ku Isi hose.”

Yavuze ko ibimaze iminsi bivugwa mu makuru bijyanye n’ihohoterwa rikomeje gukorerwa abagore, hari icyo byakagombye kuba bikora, ati “Bikwiye kudukangurira twese, ko ibyo tumaze kugeraho tutabifata nk’ibisanzwe, ahubwo ko tugomba kubirinda”.

Perezida Kagame akaba avuga ko hakiri byinshi byo gukorwa kugira ngo abagore bumve ko bafite umutekano n’amahirwe angana n’ay’abandi. Akaba atanga uburyo byagerwaho, ati “Kugira ngo ibi tubigereho ni ngombwa ko dufatanya, tugakorera hamwe twese, abagore n’abagabo”.

Kagame yasoje ijambo rye avuga ko nta gihombo giterwa n’uburinganire hagati y’abagabo n’abagore n’abakobwa na basaza babo, kandi bafite ububasha bungana. Ati “Ndabifuriza mwese umunsi mwiza mpuzamahanga w’abagore”.

TANGA IGITEKEREZO

Leave a Reply

Be the First to Comment!

avatar