19°C , Partly cloudy | Kigali-Rwanda
Abahoze ari abazunguzayi bavuyemo ba rwiyemezamirimo bakomeye

Abagore bishimira iterambere bagejejweho n’ubuyobozi bwiza

Yanditswe na MUGISHA BENIGNE

Ku ya 12-03-2018 saa 06:31:04

Ku munsi mpuzamahanga w’abagore, abagore bakora imirimo inyuranye ibabeshaho batangaje ko bishimira intambwe y’iterambere bagezeho kuko ari nziza kandi itanga ikizere cy’ejo hazaza.

Abahoze ari abazunguzayi bavuyemo ba rwiyemezamirimo bakomeye

Bamwe mu bagore bakora umurimo w’ubucuruzi mu gace ka Nyabugogo bari bazwi ku izina ry’abazunguzayi babwiye Imvaho Nshya ko hari intambwe y’iterambere bamaze gutera kuva bareka ubucuruzi bwo mu muhanda bakoraga bahanganye n’abashinzwe umutekano.

Muragijemariya Agnes ni umugore waretse ubucuruzi bwo kuzunguza akaba acururiza mu isoko rishya ryabubakiwe, yagize ati “Nkiri mu bucuruzi bwo mu muhanda sinasinziraga, nararaga ndota abantu banyirukaho bashaka kunyambura ibyo mfite kuko ari bwo buzima nirirwagamo kuva mu gitondo kugeza nimugoroba, ariko ubu ndaryama, ngasinzira, ndarya bikagera mu nda kubera ko twahawe isoko ducururizamo kandi tubona inyungu zirenze izo  twabonaga tukiri mu muhanda.”

Muragijemariya avuga ko ubu azinduka akajya kurangura, yamara kubona imari akajya mu kibanza ke mu isoko agacuruza kandi bikagenda.

Ati “Iri soko twahawe ryaturinze izuba n’imvura yatunyagiraga amanywa n’ijoro, ubu ndacuruza imbuto, mbasha kwishyura amahoro y’isuku, nishyura imisoro y’akarere ndetse nkabona n’ibindi nkenera mu buzima bwa buri munsi, birimo ibiryo by’abana, mituweli n’imyambaro.”

Avuga ko nta gihombo na gito yagize mu kuva mu bucuruzi bwo mu muhanda ko ahubwo yageze ku iterambere akesha Leta kuko bahawe ibibanza mu isoko rishya bakanahabwa n’inkunga y’igishoro.

Kampire Dative we acuruza ibirayi mu isoko rizwi nko kwa Mutangana, avuga ko kuva yakwinjira mu bucuruzi bw’ibirayi yahinduye imibereho y’urugo rwe.

Ati “Nafashe inguzanyo mu Murenge Sacco wa Jabana, ntangira gucuruza ibirayi, maze kugera kuri byinshi kuko natinyutse ngashyira mu bikorwa imishinga nahoraga ntekereza mu mutwe ariko nkarekera aho.”

Avuga ko nyuma yo gushishikarizwa n’inzego z’abagore guhaguruka bakiteza imbere kuko na bo bashoboye, Kampire avuga ko yaje kwitabira amahugurwa y’Inama y’igihugu y’abagore bakabwirwa amahirwe abagore bafite mu iterambere ry’igihugu, ngo ni bwo yageze mu rugo abisangiza umugabo we wahise amutera ingabo mu bitugu akamwungura ibindi bitekerezo akanamufasha kubona inguzanyo muri Koperative Umurenge Sacco.

Ati “Rwose politiki nziza y’igihugu itinyura abagore kwikorera no kwiteza imbere ni yo yatumye mba ngeze aho ndi ubu, ndasaba n’abandi bagore bagenzi bange guhindura imyumvire bagatekereza imishinga mito cyangwa iciriritse yabateza imbere.”

Nyirafaranga Languide wiyitaga nyirakuru w’abazunguzayi nawe acururiza mu isoko rishya ry’imbuto, avuga ko imyaka yose irenga 25 yakoraga ubucuruzi bwo mu muhanda atigeze yunguka nk’uko ubu yunguka, akaba ashimira Leta yafashe iya imbere ikabubakira isoko.

Ati “Iyo abashinzwe umutekano batubuzaga gucururiza mu mihanda, twumvaga ko ari ukuduhohotera, tugahora duhanganye na bo, twumvaga rwose bitazashoboka ko tuva mu muhanda kuko twumvaga nta handi  twavana amaramuko.”

Aba bagore bose bemeza ko ubuyobozi bwiza bwabafashije gutekereza icyo bakora no guhindura imyumvire bahoranye yo gukora ubucuruzi butemewe, kuri ubu bakaba bashima intera bagezeho biteza imbere.

TANGA IGITEKEREZO

Leave a Reply

Be the First to Comment!

avatar