20°C , Mostly cloudy | Kigali-Rwanda
Abagore bahamagarirwa gushyira ingufu mu birebana no kwizigamira kuko ari byo bizatuma baca ukubiri n’ubukene ( Ifoto Imvaho Nshya)

Abagore beretswe ko kwizigamira byabavana mu bukene

Yanditswe na MUKAGAHIZI ROSE

Ku ya 09-10-2018 saa 09:05:13

Perezida w’Inama y’Igihugu y’Abagore (CNF) asanga nubwo hari ikibazo cy’ubukene kikibangamiye abagore, kwizigamira byababera igisubizo cyo kubwigobotora.

Dr. Bayisenge Jeannette avuga ko Leta yashyizeho bumwe mu buryo bwihuse bwo kubigeraho burimo no kubakangurira kwitabira kwizigamira, binyuze mu mirenge SACCO.

Iyi gahunda ikaba yaraje yunganira izindi, nk’iyo kwitabira kubitsa mu mabanki atandukanye, ibigo by’imari iciriritse n’ibindi.

Munezero Daphrose, umucuruzi w’imbuto, akaba n’umuyobozi w’itsinda rigizwe n’abagore bakoraga ubuzunguzayi, avuga ko kwizigamira byatumya babasha kwiteza imbere, bituma bihangira imirimo iciriritse.

Yabwiye Imvaho Nshya ati “Nkatwe dukora imirimo iciriritse iyo ubonye igihumbi cyangwa kuzamura ukayajyana muri banki runaka buhoro buhoro mu gihe gito aba amaze kuba menshi ku buryo wakwaka inguzanyo ukongeraho ayo wari ufite ukaba wakora umushinga ugaragara.»

Yakomeje avuga ko hari benshi mu bagore usanga batita kuri iyi gahunda, utwo babonye bakadusesagura mu tubari n’ibindi bidafite umumaro.

Abagore bahamagarirwa gushyira ingufu mu birebana no kwizigamira kuko ari byo bizatuma baca ukubiri n’ubukene ( Ifoto Imvaho Nshya)

Uwimbabazi na we yagize ati “Mbona umugore witabiriye gahunda yo kwizigamira n’iyo yaba make ariko ageraho akagwira, nkange ngerageza kuzigama n’iyo yaba ibihumbi bibiri kandi agenda yiyongera ku buryo nabashije kubaka amazu ajyanye n’ikerekezo.»

Dr. Bayisenge Jeannette, Perezida w’Inama y’igihugu y’abagore ahamagarira abagore gushyira ingufu mu birebana no kwizigamira kuko ari byo bizatuma baca ukubiri n’ubukene.

TANGA IGITEKEREZO

Leave a Reply

Your email address will not be published. Required fields are marked *