20°C , Partly cloudy | Kigali-Rwanda

Abagore bakwiye kujya mu nzego z’ubuzima zifata ibyemezo – Jeannette Kagame

Yanditswe na Rutayisire Emile

Ku ya 10-11-2019 saa 08:18:34
Madamu Jeanette Kagame wa kane uvuye ibumoso ari kumwe na bamwe mu bitabiriye inama yiga ku bibazo abagore bahura nabyo byo kutajya mu myanya ifata ibyemezo mu rwego rw'ubuvuzi

Ubwo Madamu Jeannette Kagame yatangizaga inama mpuzamahanga y’iminsi ibiri ibera i Kigali ihuje abayobozi b’abagore mu rwego rw’ubuzima yavuze ko abagore bashoboye kandi kwita ku bijyanye n’ubuzima bibarimo, avuga ko bakwiriye kujya mu myanya ifata ibyemezo mu rwego rw’ubuzima.

Jeannette Kagame yavuze ku kamaro n’uruhare rw’umugore mu muryango ku Isi yose mu bijyanye n’ubuzima, agira ati “Urebye ku Isi yose usanga umugore ari we ufata iya mbere mu kwita ku buzima bw’umugabo we, abana, ababyeyi be ndetse n’abavandimwe be kandi ugasanga babitangira bakiri bato. Uko guhora umugore ari umuntu uhangayikishijwe n’ubuzima bw’abandi kwagombye kwitabwaho agahabwa umwanya wo hejuru mu buyobozi akajya afata ibyemezo kuko ubuzima bumurimo.”

Madamu Jeannette Kagame yavuze ko ubuvuzi bwiza budafite abo bwagenewe, ahubwo ko ari ubw’abantu bose utagendeye ku bukungu, igitsina, ubwoko, kuba ufite ubumuga cyangwa utabufite, kureba aho usengera cyangwa umutwe wa poritiki, ahubwo avuga icyakorwa kugira ngo bugerweho.

Ati “Kugira ngo ubuvuzi bwiza bugerweho hagomba imbaraga zirenze poritiki, amategeko cyangwa izindi ngufu, mu rwego rw’ubuvuzi ahubwo hakenewe abantu bazima beza kandi bari mu mwanya mwiza, bazi gufata ibyemezo bizima byiza kandi mu gihe kiza kugira ngo abantu bose bagire uburenganzira ku buzima.”

Yakomeje avuga ko hakwiye abantu bo mu nzego zo hejuru bazi kumva ibibazo kandi bakamenya kubibonera ibisubizo, agasanga abagore bakenewe muri izo nzego zo hejuru.

Madamu Jeannette Kagame yagarutse ku mibare itangwa na OMS igaragaza ko abagore bakora mu bijyanye n’ubuzima bagera kuri 70% by’abakora mu buzima ku Isi yose, ariko ko gusa 25% ari bo bafite imyanya y’ubuyobozi. Yavuze ko ugendeye kuri iyo mibare usanga hari abagore benshi bafite ubushobozi kandi bafite uburambe mu rwego rw’ubuzima ariko ugasanga batarigeze bahabwa amahirwe yo kugira ngo bage mu myanya ifata ibyemezo, imyanya ituma batega amatwi bagatanga ibitekerezo byabo ku bibazo biba mu rwego rw’ubuzima.

Yavuze ko yizeye ko iminsi 2 y’inama izatuma barebera hamwe impamvu hari intera hagati y’umugabo n’umugore no kumva impamvu abagore batazamuka mu nzego zo hejuru mu kazi k’ubuvuzi no kunoza uburyo abagore bakora mu rwego rw’ubuvuzi baba abayobozi.

Yavuze kandi ko ari ugutegura abagabo ntibumve ko babangamiwe n’abagore bashaka kujya mu myanya y’ubuyobozi, ahubwo umugore agahabwa amahirwe yo kuba mu bayobozi bakuru bakajya mu myanya iri hejuru kuko abagore mu buvuzi baza ku isonga.

Kugira ngo bizagerweho, Jeannette Kagame yavuze ko abagore bagomba guhabwa amahugurwa no kongererwa ubushobozi mu bijyanye no kuyobora. Ati “Birashoboka ugendeye ku ruhare abagore bagira ku guha agaciro ibintu bikenewe mu muryango”.

Yavuze kandi ko hakwiriye gushyirwaho amashyirahamwe akomeye y’abagore abahuza bakajya baganira mu bibazo biriho kandi bakabishakira umuti.

Yasoje yizera ko inama izabaha kugenda bagakuraho ubusumbane bwakunze gukorerwa abagore mu mirimo igihe kirekire, yishimira ko inama yabereye mu Rwanda, abashyitsi bari mu Rwanda ababwira ko na nyuma y’inama bashobora no kuzakomeza kunezezwa n’ibyiza by’u Rwanda.

Dr. Filomina Chioma Steady inzobere akaba umushakashatsi n’umwarimu muri Kaminuza, yatanze ikiganiro agaragaza uburyo abagore bagiye bagira imirimo ikomeye ndetse bakaba abamikazi imirimo bakora bakayitwaramo neza.

Yagarutse ku gaciro kahabwaga umugore aho umwami wasangaga ategekana na nyina mu bihugu byinshi by’Afurika cyangwa bagategekana na bashiki babo mu bihugu bimwe na bimwe.

Mu rwego rw’ubuvuzi, Dr. Filomina yashimye u Rwanda, avuga uburyo rwagabanyije ku buryo bugaragara imfu z’abana n’abagore bapfa babyara.

Dr. Binagwaho Agnes wabaye Minisitiri w’Ubuzima mu Rwanda akaba n’umuyobozi muri Kaminuza ya ‘Global Health Equity’ yishimiye ko inama yabereye mu Rwanda ari ingenzi ikaba ari ubwa gatatu ibaye.

Ati “Iya mbere yabereye muri Leta Zunze Ubumwe z’Amerika, indi ibera mu Bwongereza, none indi ibereye mu Rwanda muri Afurika. Nishimiye ko Kaminuza ya ‘Global Health Equity’ yateguye ndetse igatera inkunga iyo nama yahuje ibihugu bigeze kuri 80 byo ku Isi harimo abagabo n’abagore baturuka ku migabane yose y’Isi”.

Kandi ati “Nta bwo umugore yakemura ibibazo bye wenyine adafatanyije n’abagabo mu kubishakira ibisubizo.” Avuga ko ibyiza ari uko byatangirira hasi mu mashuri bigisha abana b’abakobwa gutinyuka, kandi bakabashishikariza kwiga masomo y’ubumenyi (Sciences) kugira ngo bazabashe kwiga ubuvuzi ku buryo mu gihe bazaba barangije kwiga babonye impamyabumenyi bazabasha gufatanya akazi ko mu rugo n’akazi bigiye.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.