17°C , Partly cloudy | Kigali-Rwanda
Minisitiri w'Ubuzima Dr Gashumba Diane ( ibumoso), Elini Aklilu wo muri kaminuza ya Sweden (hagati) na Dr Muligande Charles, Umuyobozi wa Kaminuza y'u Rwanda wungirije ushinzwe ubushakashatsi (Iburyo) (Foto Mugisha B)

Abagenzura imiti na MINISANTE bariga ku ireme ry’ubushakashatsi bukorwa

Yanditswe na Mugisha Benigne

Ku ya 15-05-2019 saa 14:01:18

Abashinzwe ubugenzuzi bw’imiti na Minisiteri y’Ubuzima bahuriye mu nama yo kurebera hamwe ireme ry’ubushakashatsi bw’imiti mu rwego rwo gukoresha imiti yujuje ubuziranenge.

Afungura ku mugaragaro iyi nama yahuriyemo ibihugu binyuranye by’Afurika, Minisitiri w’Ubuzima Dr. Gashumba Diane yavuze ko iyi ari intambwe nziza itewe n’abashinzwe ubushakashatsi mu by’imiti n’abashinzwe ubugenzuzi bwayo kuba bahuriye hamwe kugira ngo baganire ku ireme ry’ubushakashatsi bukorerwa imiti.

Yagize ati “U Rwanda rwiyemeje gukurikirana ireme ry’imiti yinjira mu gihugu, kuko isigaye ipimwa muri laboratwari zibishinzwe, bityo igakoreshwa bigaragara ko yujuje ubuziranenge bukenewe no kureba ko nta ngaruka zikomeye ishobora kugira ku murwayi.”

Dr. Karangwa Charles, Umuyobozi w’agateganyo w’Ikigo gishinzwe kugenzura ibyo kurya n’imiti mu Rwanda, avuga ko Leta y’u Rwanda yashyizeho iki kigo kugira ngo imiti yinjira ku isoko ry’u Rwanda ige iba ifite ubuziranenge.

Yakomoje ku miti imwe n’imwe yakuwe ku isoko ry’u Rwanda kuko ibipimo byagaragaje ko itujuje ubuziranenge.

Ati “Hari imiti twakuye ku isoko ry’u Rwanda kuko itemewe gucuruzwa, twayikuye ku rutonde rw’imiti, harimo Mebendazole n’indi miti imwe yifashishwa mu kuvura ababyeyi babyaye ngo badakomeza kuva.”

Avuga ko hari imiti 15 igomba gupimwa ariko ngo imaze gukorerwa isuzuma ni igera kuri 3 ikaba imaze nayo kujya ku rutonde rw’imiti yujuje ubuziranenge ishobora gucuruzwa ku isoko ry’u Rwanda.

Avuga ko mbere laboratwari ipima imiti n’ibiryo itaraboneka hari imiti yajyaga izanwa itujuje ibipimo bikenewe ku buryo ihabwa umurwayi ntimuvure, hari ngo n’indi yazaga itujuje ubuziranenge kuko wasangaga ishobora kugira ingaruka ku murwayi, ngo iyo nayo yarahagaritswe.

Dr. Karangwa akomeza avuga kandi ko hari inganda eshatu zimaze gukura imiti yazo ku isoko ry’u Rwanda kuva aho zimenyeye ko u Rwanda rusigaye rugenzura ubuziranenge bw’imiti yinjira.

Avuga ko n’aho bakenera laboratwari zifite ubushobozi buhanitse bwo gupima ubuziranenge bw’imiti, ngo yoherezwa mu bindi bihugu bifite ubwo bushobozi bakareba ibisubizo bityo bakemeza ko iyo miti yujuje ubuziranenge cyangwa itabwujuje.

Yakomoje ku bavuga ko imiti yo muri Afurika n’u Buhinde iteye impungenge ko itujuje ubuziranenge, aha Dr. Karangwa yavuze ko imiti itujuje ubuziranenge itareberwa ku nkomoko yayo, ahubwo ngo byose bigaragazwa n’ibipimo bya Laboratwari.

Ati “Hari n’imiti twahagaritse ku isoko ry’u Rwanda kandi ituruka mu bihugu by’u Burayi n’Amerika, nk’umuti uvura inzoka uzwi ku izina rya mebendazole, iyo twakuye ku isoko wakorewe muri Laboratwari yo mu gihugu cy’u Bubiligi, kandi abawukoze bemeye ko ufite ikibazo tubasaba kuwukosora kugira ngo wuzuze ibisabwa.”

Dr. Karangwa avuga ko imiti ya mebendazole yose itakuwe ku isoko ry’u Rwanda, ngo iyakuweho ni ikorerwa mu gihugu cy’u Bubiligi, ngo izindi mebendazole nta kibazo zifite.

Inama yabereye i Kigali ku bushakashatsi n’ubugenzuzi bw’imiti yahuje abashakashatsi bo mu bihugu bya Sweden, Ethiopia, Kenya, Tanzaniya, Maroc n’u Rwanda rwayakiriye, ikazamara icyumweru.

Minisitiri w’Ubuzima Dr Gashumba Diane ( ibumoso), Elini Aklilu wo muri kaminuza ya Sweden (hagati) na Dr Muligande Charles, Umuyobozi wa Kaminuza y’u Rwanda wungirije ushinzwe ubushakashatsi (Iburyo) (Foto Mugisha B)

TANGA IGITEKEREZO

Leave a Reply

Your email address will not be published. Required fields are marked *