17°C , Partly cloudy | Kigali-Rwanda

Abagenerwabikorwa ba VUP barasabwa kwizigamira

Yanditswe na Twagira Wilson

Ku ya 19-05-2019 saa 15:26:27

Bamwe mu baturage batishoboye bo mu murenge wa Matimba mu karere ka Nyagatare, mu kazi bakora ko gutunganya imihanda mu rwego rwa VUP bavuga ko amafaranga bahabwa y’agahimbazamusyi yatangiye kubateza intambwe mu bukungu no mu mibereho myiza, ariko bagasaba ko ako gahimbazamusyi kakongerwa naho ubuyobozi bukabakangurira kwizigama.

Ubuyobozi bw’Umurenge wa Matimba bubagira inama yo kwizigamira bahereye kuri ayo mafaranga bahabwa kugira ngo arusheho kubafasha mu buzima bwabo bwa buri munsi.

“VUP-Vision Umurenge Program” ni gahunda igenda ihindura imibereho y’Abanyarwanda b’amikoro make, aho benshi kuri ubu bagenda bagaragaza ubuhamya bw’intambwe bateye mu bukungu no mu mibereho myiza y’imiryango yabo.

Mukandori Beatrice wari aho atunganya umuhanda uva kuri santere ya Matimba werekeza ahitwa i Kagezi, avuga ko hari ukuntu bagurizanya ku mafaranga ibihumbi icumi bahembwa kugira ngo arusheho kubagirira akamaro.

Nkuko bivugwa na Mukandamage Alivera na Munyakazi Emmanuel bahamya ko imibereho igenda iba myiza hagereranyijwe na mbere bataratangira gukorera muri VUP, dore ko kuri ubu bashoboye no kwigurira amatungo magufi babikesheje ako kazi.

N’ubwo bishimira aka kazi bakora n’uko kabafasha ariko ngo amafaranga ibihumbi icumi bumva akiri make hagereranyijwe n’ibyo baba bakeneye mu buzima bwa buri munsi, aho akaba ari ho bahera basaba inzego zibishinzwe kureba uko yakongerwa.

Umunyamabanga Nshingwabikorwa w’Umurenge wa Matimba Karangwa Edouard arasaba abo bagenerwabikorwa ba VUP ko bahera ku mafaranga bahabwa bakizigamira biciye mu matsinda kugira ngo arusheho kubagirira akamaro.

Umurenge wa Matimba utuwe n’abaturage 25,929. Kugeza ubu muri uyu murenge hari inkingi ebyiri za VUP harimo iyi y’abatishoboye bakora imirimo y’amaboko bagahabwa agahimbazamusyi (Expended public work) n’abageze mu za bukuru batishoboye bahabwa inkunga y’amafaranga yo kubunganira (Direct support). Abagenerwabikorwa ba VUP bose hamwe muri uyu murenge bagera kuri 473.

TANGA IGITEKEREZO

Leave a Reply

Your email address will not be published. Required fields are marked *