22°C , Partly sunny | Kigali-Rwanda

Abagaruka mu ngo iwabo ni abakoreraga ahandi imirimo yahagaritswe

Yanditswe na NYIRANEZA JUDITH

Ku ya 02-05-2020 saa 12:45:41
Abatwaraga abagenzi kuri moto kuko batemerewe gutwara abantu mu rwego rwo kwirinda, mu ntangiriro z'icyorezo cya Koronavirusi, ababishoboye basubiye ku ivuko

Muri iki gihe k’icyorezo cya Koronavirusi cyugarije Isi, hari abantu babaga baragiye gukorera ahandi biba ngombwa ko bagaruka iwabo bitewe n’uko imirimo bakoraga yahagaze.

Umuyobozi w’Akarere ka Rulindo, Kayiranga Emmanuel yatangarije Imvaho Nshya ko abagarutse ari abahavuka bakoreraga ahandi 841 bari bafite imirimo hirya no hino mu gihugu.

Yagize ati : “Baje basanga imiryango yabo si ukuvuga ko babagayo ariho ingo zabo ziri, ni ukujya gukora akazi ariko bakagaruka. Bageze kuri 841, baragarutse bari mu miryango yabo babayeho nk’abandi baturage, bose barabaruwe bajyanwa ku bigo nderabuzima barapimwa nta kibazo kandi kugeza ubu igihe bamaze hashize ukwezi nta kibazo bafite nta kiragaragara basa n’aho baziye rimwe, urebye muri iyi minsi nta bwo bakiza”.

Umuyobozi w’Akarere ka Rubavu wungirije ushinzwe imibereho myiza y’abaturage, Ishimwe Pacifique yatangarije Imvaho Nshya ko abaturage bagaruka ku ivuko akenshi baba baturutse muri Repubulika iharanira demokarasi ya Congo. Abagarutse barapimwa kandi abaturage batanga amakuru mu gihe hari uwo babonye utari uhasanzwe.

Yagize ati : “Abaturage bacu baba batashye ntitwabareka ngo bagume mu kindi gihugu kuko bizeye ko mu Rwanda hari uburyo bwiza burimo gukorwamo ngo abantu badahungabanywa n’iki cyorezo bakihutira gutaha. Buri munsi nibura ntitwakira abantu bari munsi ya 30. Abaturage batanga amakuru ubwabo iyo hari uwo babonye btaherukaga kubona aho batuye.”

Umuturage wo mu karere ka Muhanga, mu murenge wa Muhanga, wakoreraga i Kigali yavuze ko mu gihe akazi yakoraga kari gahagaze yagombaga gutaha. Yagize ati : “Natwaraga moto muri Kigali, kuva numvise ko nta kongera gukora, naje ijoro ryose ndataha ubu ndi mu rugo nta kibazo ndafasha umugore tugahinga, nta kibazo imibereho ikomeje kuba myiza ngereranyije n’iyo nza kuguma muri Kigali nta cyo mpakora kandi nkeneye kurya”.

Umwanditsi:

NYIRANEZA JUDITH

Tanga Igitekerezo

Email yanyu ntigaragazwa ku rubuga. Amazina na Email ni ngombwa.