20°C , Mostly cloudy | Kigali-Rwanda

Abaganga b’ibitaro bya Gisirikare baganirijwe ku ndwara ya kanseri

Yanditswe na Kayitare Jean Paul

Ku ya 09-01-2019 saa 16:49:14
Dr Jose Bufill inzobere mu ndwara za kanseri yasangije ubunararibonye abaganga mu bitaro bya Gisirikare ku ndwara za kanseri (Foto Kayitare J.P)

Abaganga b’ibitaro bya Gisirikare bya Kanombe, baganirijwe ku ndwara ya kanseri na Dr. Jose Bufill wavuye muri Leta Zunze Ubumwe z’Amerika, inzobere mu kuvura indwara za kanseri.

Lt Col Dr. Ntaganda Fabien, umuganga w’inzobere mu buvuzi bw’indwara ya kanseri y’ibere, avuga ko intego yabo ari ukuvura umunyarwanda nk’uko Amerika cyangwa u Burayi bavura abaturage babo.

Mu kiganiro n’Imvaho Nshya, Lt Col Dr. Ntaganda yavuze ko igikorwa cyo kwihugura gikorwa buri munsi.

Avuga ko ubuvuzi buhora butera imbere umunsi ku wundi akaba ari yo mpamvu bihugura buri munsi.

Yishimira kandi ko ibitaro bya Gisirikare byagize amahirwe yo kubona umuhanga w’indwara za kanseri uvuye muri Amerika, bityo akabaganirira ku bijyanye na kanseri y’ibere.

Lt Col Ntaganda agaragaza ko bishimiye ubumenyi bahawe na Dr Bufill, akavuga ko biteguye guha umunyarwanda ubuvuzi nk’ubuhabwa umuturage wo muri Amerika cyangwa i Burayi.

Yagize ati “Dr Bufill yaduhaye ubumenyi ku bigezweho cyane cyane ku buvuzi bwo muri Amerika kuko byanga bikunda uko umurwayi wo muri Amerika cyangwa i Burayi avurwa, ni ko natwe dufite intego yo kuzavura umurwayi wacu hano mu Rwanda.”

Dr. Jose Bufill yashimye ubuvuzi bwo mu Rwanda ndetse anishimira ko Abanyarwanda bavurwa hakoreshejwe ubwishingizi, mu gihe ubwishingizi bwo muri Amerika budakora akaba ari kimwe mu bigora abarwayi bakeneye ubuvuzi muri Amerika.

Yagize ati “Icyo nababwira ni uko ubuvuzi burimo kugenda buhenda cyane. Ndashimira cyane u Rwanda kuko ni igihugu nabonye abaturage bacyo bakoresha ubwishingizi bw’indwara kandi burakora neza mu gihe ubuvuzi bwo muri Amerika ubwishingizi budakora. Abarwayi bacu bagorwa cyane no kugira ngo babone ubuvuzi.”

Lt Col Dr Ntaganda avuga ko u Rwanda rufite amahirwe kuko ngo mu gihe ruzaba rumaze kubona abantu barangije kwiga bakabona ubumenyi bwo kuvura abarwayi benshi, ari ikintu kizaba ari kiza kandi n’abaganga bagashishikarizwa kugendana n’ikoranabuhanga rigezweho. Ati “Ikindi dukwiye gukora ni ugukangurira abaganga bacu bakiga bakamenya ikoranabuhanga riba rigezweho.”

Lt Col Dr. Ntaganda Fabien, inzobere mu buvuzi bw’indwara za kanseri mu bitaro bya Gisirikare i Kanombe, yishimiye ibiganiro bahawe na Dr Jose Bufill (Foto Kayitare J.P)

Akomeza avuga ko hari inyigisho bakora buri cyumweru mu bitaro bya Gisirikare. Avuga ko batumira abanyeshuri baba barimo kwimenyereza umwuga mu byiciro bitandukanye baba abaforomo, abakora imirimo ya tekiniki n’abaganga. Yishimira kandi ko bagize amahirwe yo kubona inararibonye ku ndwara za kanseri yavuye muri USA.

Ku rundi ruhande, Lt Col Dr. Ntaganda, avuga ko ubuvuzi bw’indwara ya kanseri y’ibere burimo gutera imbere, agashimangira ko ubunararibonye bahawe na Dr. Bufill buzabafasha mu kuvura iyi ndwara.

Ati “Ubuvuzi bwa kanseri y’ibere navuga ko burimo gutera imbere, dufite amahirwe menshi yo kuvura iyi ndwara.”

Cyusa Kabagire Alice uba muri Amerika muri Leta ya Indiana wakurikiranye ibiganiro byahawe abaganga bo mu bitaro bya Gisirikare, bitanzwe na Dr. Bufill, avuga ko yarwaye kanseri yo mu maraso akavurwa na Dr Bufill bityo ngo asaba iyi nzobere mu ndwara za kanseri ko yaza kuganiriza abaganga bo mu bitaro bya Gisirikare i Kanombe.

Nyuma y’ibiganiro yabwiye Imvaho Nshya ko hashize umwaka umwe akize burundu kanseri yo mu maraso. Yagize ati “Ni nge wagize igitekerezo cyo gutumira Dr Bufill kuza mu Rwanda, ni muganga wange ni na we wamvuye kanseri umwaka ushize. Uyu munsi Dr. Bufill yavuze ku ndwara ya kanseri y’ibere mu Rwanda, kuko ari yo ikunze kurwarwa mu Rwanda. Ikindi ni uko nge yamvuye kanseri y’amaraso kandi narakize burundu.”

Cyusa agira inama Abanyarwanda yo kwimenya, kwisuzumisha kare by’umwihariko kuri buri muntu wese urengeje imyaka 40 y’amavuko, kwisuzumisha inkondo y’umura ku buryo buhoraho. Yongeraho ko kwivuza kare ari ingenzi bityo ibyo bikaba bikwiye gukorwa na buri munyarwanda wese.

Kansiime Joy na we wakurikiye ibiganiro byatanzwe na Dr. Bufill, yavuze ko yababwiye iby’indwara za kanseri kandi ko hari byinshi bazimenyeho agashimangira ko hagiye haboneka inzobere mu ndwara zitandukanye by’umwihariko za kanseri byabafasha mu kongera ubumenyi ku bwo yari asanganywe.

Yagize ati “Dr. Bufill yadusobanuriye ku ndwara ya kanseri y’ibere ndetse anatubwira ku ndwara ya kanseri y’amaraso. Mu gihe turimo kwimenyereza umwuga w’ubuganga mu bitaro bya Kanombe, dukomeje kubona izindi nzobere ku ndwara za kanseri byamfasha mu kwiyungura ubumenyi kuri izi ndwara.”

Dr Jose Bufill inzobere mu ndwara za kanseri yasangije ubunararibonye abaganga mu bitaro bya Gisirikare ku ndwara za kanseri (Foto Kayitare J.P)

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.